Kem Lingón 103
103
Lingón Dabid bè yóm kbong nawa Dwata tau
1Tey kdóyónu ke Dwata dou.
Tódô hotuhu nawahu dmóyón du abay se laen kô dù belenen yóm kun boluy.
2Tey kdóyónu ke Dwata.
Là kô naw e klifót du yóm tey kehyu nmoen.
3Gotu hnifóten kdê salau,
ne gotu kóhen kdê desu.
4Tendo gel hensengen yó kem gel tô hatayu.
Gel tnóbóngen ou mlan bè yóm kbong nawahen do ne yóm kkoduhen do.
5Tey kehegsengelen nawahu lemwót bè yó kem hyu gel blayen do.
Bud huléken kgisu,
hol lómón ke bude mulék lomi tau.
Yóm kgisu yó, hol lómón kgis banug.
6Yóm Dwata, sal gel hlanen yóm kukum tedeng
bè yó kem tau gel hen-gnok.
7Deng eles gel hetngónen ke Musis ekni yó kem atulen,
ne gotu htonen yóm tey nmoen lem blóng yó kem tau Israél.
8Tey kmodu yóm Dwata, ne tey bong nawahen tau.
Là kóen mahil lembut,
ne là monolen yóm kbong nawahen tekuy.
9Ke deng hnifóten yóm salà, là kô bud bentiken du,
tódô mkó bè nawahen.
10Là kô yó du tafak Dwata tekuy
yóm tafak hol bang bayad yó kem salà tekuy.
Ne là kô balaen du tekuy
yóm bang hol balà yó kem sidek gel nmò tekuy.
11Yóm kbong nawa Dwata yó kem tau wen klikò le du,
mkay senta kbong yóm te kmawang.
12Lómón klayuken dmata kdaw kól e desdef,
yóm gónó Dwata e mbot yó kem salà tekuy.
13Lómón yóm kbong nawahen kem ngaen yóm mà le,
lómón yó se kbong nawa Dwata yó kem tau wen klikò le du.
14Tódô tngón Dwata yóm tehe kifilen tekuy,
olo kuy lemwót bè kfung.
15Yóm klowil tekuy te tonok,
mkél bè yó kem bnes.
Ne lómón yó kem bulók lem bnes tek likot le mowil sana le matay.
16Ke nyuf lenos, tódô tekuy kmanas,
lómón ke là tekuy tehe nô dini.
17Okóm bè yó kem tau wen klikò le ke Dwata,
laen kô dù sónen yóm kbong nawa Dwata kul.
Balù hilu bud lugod le,
yó ne yóm kehyu nawan ebélê le
18syan ke là mkóhen bè nawa le yóm tehe senfasad le Dwata,
ne ke hol le teneb mimón du yó kem kun hlau.
19Bè longit gónó Dwata myón kmamal yóm klamangen,
du se hol dandónen geta bè kdéen.
20Hol dóyón ye Dwata, yu kem alì kemgis ne alì gembek
gel hógówen gu bè longit.
Yu se yó kem tendo gel mimón du ke wen dóken,
ne tendo gel hmungol du ke wen monen.
21Hol dóyón ye Dwata se kuy,
yu kem mfasang nô bè longit.
Yu se yó kem tóbóng lówóhen tendo gel mò du yóm kun kóyô.
22Hol dóyón ye Dwata, yu kem deng dlimunen,
balù kihu gónó ye nô bè klamangen yóm knamalen.
Ne hol dóyónu Dwata se dou.
Currently Selected:
Kem Lingón 103: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
