Kem Udél Hlalak Tehe Selumun 9
9
Kun tinok yóm khulung hedem
1Yóm khulung hedem lómón ke tau hemdà
gónô ne hitu heheken du.
2Deng wen ken nmoen ne deng eles hensuen yóm bot tilob nómen yóm kul gel ninum ne deng eles hentifesen yóm gónó le mken.
3Deng dóken yó kem libun tóbóng lówóhen mò na a fen tmaba bè yóm gónón mfatu bè benwu bong.
4Yó hmonen kul, “Mógów ye e dini kem tau là ngelem kehedem,” ne senged se bud monen bè yó kem tau book.
5“Géhél ye e dini na ye e ken yóm dou ken na ye e ninum yóm dou ninum deng wen bolen.
6Kó ye yóm là kngelem kehedem ye anì tahà ktau ye ne lolò ye kmò klan yóm khulung temnef.”
Ni se koni yó kem udél yóm khulung hedem.
7Ke bnólówem yóm tau gel sedekà mom henwogen uu.
Ne ke bnólówem yóm tau gel mò sidek mom hen-gnómen uu des.
8Béem dog bnólów ne yóm tau sedekà, déke mom knutó nawahen uu.
Ke bnólówem yóm tau hulung hedem mom kenbong nawan uu.
9Ke hnauhem yóm tau hulung hedem mom temnù yóm khulungen hedem.
Ke tolokem yóm tau tedeng kmoen mom bud temnù yóm kun dnalang.
10Yóm klikò te ke Dwata hol but yóm khulung te hedem.
Ne yóm ketngón te yóm Dwata laen dù belenen yó uléken yóm khulung te temnef.
11Yakà yóm khulung hedem du htahà ktauhem ne wen he suden yóm klowilem.
12Ke wen khulungem hedem ni se yóm kóm kehyu.
Okóm ke mom kenbéem laen dù dumu glayam són sem uu.
Kun tinok yóm kbook
13Yóm kbook lómón ke yóm libun mlos laen dù yaken ne laen dù mtukul gónón henek.
14Sónmoen myón bè bak dól gónóen duhen ke bè yóm gónón mfatu bè benwu bong,
15na a tmaba ebè yó kem tau mius mekteng kul kógów.
16Yó monen mò kul, “Hol ye husek e dini yu kem tau là ngelem kehedemen ne yu kem tau book.”
Ne yó bud udélen ebélê le, monen,
17“Tey mnóm minum du yóm él hennagaw ne tey mnóm se yóm gel kenem bè gónón gebnos.”
Ni se koni yó kem udélen mgoy yóm kbook.
18Okóm yóm tau gbóy béléen là kô tngónen du yó kem tau tehe gna mógów ebéléen, yóm deng knô le bè benwu yó kem tau matay.
Currently Selected:
Kem Udél Hlalak Tehe Selumun 9: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
