Kem Udél Hlalak Tehe Selumun 8
8
Kehyu yóm khulung hedem
1Hnungolem. Yóm khulung hedem lemwót
bè Dwata lómón ke tau tendo tmaba.
Dalang se yóm khulung temnef, hgelen se kun udél.
2Yó gónón mdà hatu bè yóm gónón mfatu moni bè lan ne bè yó kem gónón sesyat lan.
3Tmaba seblà bè yó kem lan husek e lem benwu bong ne tódô keten yó kem bak sut gónón e tmaba.
4Yó utóm tabahen, monen, “Ebélê ye kem logi, gónóhu e tmaba.
Tódô kdéen tau gónón e gbak nim udélu ni.
5Yu kem tau là dengen ngelem kehedemen hol dnalang ye yóm khulung milô.
Yu kem tau book hol kenmón ye yó kem udélu.
6Hnungol ye, wen tey knóón tulónu kuy ne kdéen lemwà gu lem baku hono tedeng.
7Sok fes yóm tulónu hono ktahuhen, yakà teyen sidek keklitu du yóm kéng.
8Tódô kdê yó kem udél btang gu lem baku hono tedeng.
Laen kô kéng du duhen ke gónón seblékê.
9Ni kem udélu ni tey mtukul bè yó kem tau hulung temnef ne tedeng bè yó kem tau temngón.
10Hol nélékem yóm dou hlau senta tembaga futì ne nélékem yóm ketngón senta yóm tahu blówón.
11Yakà khulung hedem du yóm mkay senta kem kimu legen mebtes, là se wen bud dumu nóyóem ke gemsenged du.
12Ou se yóm khulung hedem gónón gu yóm khulung tau milô.
Bud ou se gónón gu yóm ketngón tau ne khulung tau mit du hyu yóm kun kmò.
13Yóm tau kmikò ke Dwata hol knutó nawahen yóm sidek.
Dalang se do, knutó nawahu yóm kehegmón ne yóm keheklabak.
Knutó nawahu snéen yó kem nmò sidek ne yó kem mò udél seblékê.
14Béléu se gónón gu yó kem atul hyu ne khulung mit du hyu yóm kmò ktau.
Ne bud ou se gónón gu yóm khulung temnef ne kfasang.
15Lemwót béléu yóm khulung le mogot benwu yó kem tau hol geta.
Lemwót béléu se yóm khulung le mò yó kem udin tedeng yó kem smugung bélê le.
16Lemwót béléu se yóm khulung le mogot benwu yó kem tau gel malak ne yó kem tau smugung bélê le tedeng kmò le.
17Bong nawaw du kihu tau kembong nawa do ne kihu tau hol mebel do tonen o.
18Béléu se gónón gu lemwót yóm kendengen laen tul ksideken ne yóm kdóyón, ne yóm ktedengen ne yóm kehyu klowil.
19Yóm guta ye béléu mkay senta yóm hol tahu blówón ne mkay senta yóm tembaga futì alì megélék yóm blayu kuy.
20Yóm dou kmò klan sal mlan bè ktedengen ne sal hlanu bè yóm là keskihuhen.
21Yó kem kembong nawa do sal gel blayu kul yóm mò kendengen le ne tódô hennoku kimu yóm gónô le.
Gónón lemwót yóm khulung hedem
22Gu laan Dwata là deng mò du yó kem dumu nmoen ekni deng sana gegna ne kmoen do.
Ou yóm khulung hedem yóm hol tanay nmoen.
23Gu laanen là deng wen benwu he deng sana yó ne nim ou.
24Gu laanen là deng wen yó kem mohin ne gu laanen là deng wen yó kem tbul él deng sana yó ne nim o.
25Gu laanen là deng wen yó kem bulul lembang ne gu laanen là deng wen kem bulul lemnek deng sana yó ne nim o.
26Gu laan Dwata là deng mò yóm klamangen benwu ne yó kem numahen
ne balù yóm kbut kmoen yóm tonok deng sana yó ne nim o.
27Nóe ditu se bè yóm tehe kehnóen kul bè gónó le nô yó kem longit ne bè yóm kesgawagen longit ne yóm mohin.
28Ne bude se nô bè yó bè yóm le kehnóen du te kmawang yó kem lobun ne yóm ktukéhen yó kem sfut mohin.
29Ne bude se nô bè yó bè yóm koluhen kem él mohin, yóm kmonen du hol bê le nulé yóm bengelen du.
Ne bude se nô bè yó bè yóm kehbegelen yóm klamangen tonok.
30Tehehe nô bè soluhen lómón yóm tau gel malak bè kmò nmò.
Ou se yóm kun gónó hligal ket kdaw ne gele hligal se do bè soluhen.
31Ne hligale du snéen yóm benwu nmò me ne yó kem tauhen.
Kmò yóm tau hulung hedem
32Duhen ni kem ngà, hol hnungol ye o.
Wen kligalen yóm tau mimón do.
33Hol hnungol ye yóm gel toloku kuy ne hfulung ye hedem ne hol bê ye kenbê.
34Wen kligalen yóm tau gel hmungol do ne ket kdawen se tendo mingat do bè bak sut ne eles nangaten ou bè bak dólu.
35Yakà yóm tau mton do tonen se kehyu klowilen ne gutahen yóm kehyu nawa Dwata ebéléen.
36Okóm yóm tau là tonen do hensideken knóen.
Kdê yó kem kembê do kenbong nawa le yóm hatay.”
Ni se koni yó kem udél yóm khulung hedem.
Currently Selected:
Kem Udél Hlalak Tehe Selumun 8: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
