Kem Udél Hlalak Tehe Selumun 7
7
Kehlayuk bè yóm libun hdóyón
1Ó Man, hol nimónem yóm monu mò kóm ne
hol eles hnóem lem hendemem yó kem dou hlolò.
2Hol nimónem yóm dou hlolò anì tahà ktauhem.
Hol hentilobem mimón du abay se alì bong muhen yó kem toloku kóm.
3Hol suem te henmuem ne suem lem hendemem yóm dou hlolò.
4Yóm kehyu nawam ebè yóm hol dumum setwoli,
yake lómón yó snéen yóm kehyu nawam ebè yóm khulung hedem ne lómón ke hol weem yóm khulung temnef.
5Yakà kenlung le kóm bè libun mdà yehen tô hegbóy kóm bè tilob kudélen.
6Bè yóm sotu kdaw, temngele e sentu beng yóm dou gónô.
7Tódô tonu se yó kem là ngelem kehedem le duhen yó kem logi lomi lemnok ne wen sotu bélê le yóm laen dù ledemen.
8Yó nmoen, mógów ebè gónón seblà nô yóm libun hdóyón.
Ne yó tódô lanen miwes moni bè gónóen
9bè yóm deng kkimelen ne efet bè yóm kesekleweten.
10Ne yó tódô wen libun semlong du, tey kehegkesen ne eles hendemen yóm mò kmò kgoyen du.
11Nim libun ni du se yóm libun alì mlos ne kembel, là kóen menek bè gónóen.
12Yó nmoen, tódô keten bè yó kem gónón wen tauhen mangat.
13Ne tonen se yóm logi yó koni.
Tódô dlu lenkefen ne neleken ne là kóen myak temngel ebéléen.
Monen mò du,
14“Kemdaw eginu yóm kedsuu bè yóm fasadu ke Dwata ne deng wen ken nmou bè gónô.
15Yó gónóhu mebel kóm ni, tey óyóu ston kóm. Hyu deng ni u.
16Deng lenafinu ne yóm gónóhu tungô yó kem tey nes bnetek tilob lemwót bè Idyip.
17Deng tódô gotu du ne yó kem alì tilob boohen, suu du yóm mér ne alus ne sinamon.
18Mungi do ne, na te hol hotu óyô te suloy buteng.
Na te knoyung kifu seflilil.
19Là kóen mnô yehenu, tolo mógów mayuk.
20Deng eles hbongen filak nwiten, bà mom lewu fedyanen he tu kuléken.”
21Tahu se, lemwót bè yóm alì khulungen hemtilob hlan du yóm udélen ebéléen gónón gbóy yóm logi ni.
22Tódô henmungen se mung du lómón ke yóm safì nwit le ebè yóm gónó le tmétê du
ne lómón ke yóm uhu mlan seblà yóm gónón e mdò hanak
23ne tódô mtool hosoen.
Yóm logi ni, hol lómón ke yóm onuk mlan e seblà yóm gónón wen holot, là kô tngónen du ke yó hatayen.
24Yó gónóm mon, kem ngà logi, hol hnungol ye o ne hol kenmón ye yó kem monu mò kuy.
25Béem hegmung kehedemem ebè yóm libun lómón ni kmoen ne hol béem senebed yóm kun lan.
26Yakà dengen tey dê ne tau meglà lemwót béléen ne là kem bud gsóhem du ne tau matay lemwót béléen.
27Yóm kun gónô lómón ke lan ebè yóm gónó le nô yó kem tau matay ne ke mógówi e du matayi.
Currently Selected:
Kem Udél Hlalak Tehe Selumun 7: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
