Kem Udél Hlalak Tehe Selumun 6
6
Là kfasad fen mayad utóng dumu tau
1Ó Man, deng wen kô hmóyóem mayad utóng
bè dumu tau?
Ne deng fenmahem kô mò heblatem du?
2Dengi gholot kô bè yó kem udélem ne glolò le yóm hmóyóem kul?
3Ke lómón yó nmoem, Man, dengi gnô lem hólólen ne yóm tau yó.
Okóm ni dé kmoem du anì wen lanem lemwà knóem; holi géhél mógów ebéléen ne hol henkoduhem anì hewaen u.
4Béi tlek kendel tungô duhen ke hegnô
5ke là nam na lenwà knóem.
Mkéli bè yóm onuk bnes gel hlayuk bè yóm alu nmò tau ne yóm uhu hemlóy yóm tau mlok.
Là kehduk
6Ó tau lemfu, yake hol dnalangem kul kmò yó kem gulom ne holi hfulung hedem.
7Balù yóm klaen dù malak kul
8ewenem sana kwen ken eles sentifun le mò eles tgama le bè yóm kdawen élél ken.
9Ó tau lemfu, mò kegenen de yóm ktungóem? Kilón de kebtikem?
10Mom yó monen, naw skél hidong he, naw na hegnô likót
11okóm bè yóm igoem tungô tódô nuluken u yóm kélélem lómón kuluk yóm tau gel mnagaw.
12Són tendo mò tulón seblékê bè lanen mógów yóm tau gel mò sidek, yóm tau laen dù gónón e kól.
13Hekniten matahen ne yóm kestulónen hlanen bè kekdol tihen ne tdoken yóm ksukaten kóm.
14Laen kô dumu nô lem hendemen, són moen tendo matul mò sidek
ne balù kihu lanen mógów són moen sembeweg kem tau.
15Yó gónóm mon, wen glumfak mekto sut béléen ne laen kô bud gónón e mlo.
16Wen nem kay nmò knutó nawa Dwata, o, hitu dé yóm alì kenliten.
Ne ni sii lu:
17Tanayen kehegmón.
Glewuhen tmulón kéng ne getluhen yóm monok là duón.
18Gfaten yóm tendo hemdem matul mò sidek.
Glimuhen yóm tendo módód mò sidek.
19Gnemen yóm tmifù kéng ne ghituhen yóm tau hesfatayen kem dumu tau.
Ketgama yóm là kesdà kem tau syehen
20Ó Man, hol hendemem yóm gel hlolò maem kóm ne hol kenmónem yóm gel tolok yéem.
21Hol eles tendo hendemem yóm kul hlolò ne hol suem te henmuem
22abay se yóm kul gel tolok malak yóm kóm klan, gel bnenteyen u ke kifu ne gel hnauhen u ke kemdaw.
23Yóm kul hlau lómón ke solok alì mtataw nóngen ne yóm kul kestódô kóm toloken kóm yóm klowil hyu.
24Ni kem hlau ni kenlungen uu bè yóm libun sidek nmoen duhen yóm libun mdà yehen tô hegbóy kóm bè tilob kudélen.
25Béi gbóy du yóm olo kun ktilob ne béem abay nmung se yóm kun tilob ketngel ebéléem.
26Yakà gbek tau smukéy du udì filak yóm libun hdóyón, okóm bè yóm ksamuken yóm tuha libun dumu tau gomong he yóm kun klowil.
27Laen dù tau semning ofi ke là mlób nesen.
28Laen dù tau mdà gu ta yó kem bala ofi ke là mlób hólól tihen.
29Lómón se ni laen dù tau smamuk tuha libun dumu tau, duhen ke mogot du ke là megtafaken.
30Balù yóm kkodu le du yóm tau mnagaw lemwót bè kbitilen,
31okóm ke sok gekfô le ewenem sana kehebtad le du bè yóm knagawen baluen ke gotu yóm kdéen kimu lem gónóen.
32Okóm yóm tau mò samuk bè tuha libun dumu tau lómón ke laen dù ledemen.
Yóm tau mò du nim ni heglaen knóen.
33Tódô bnoug le ne laen bud madat du ne laen se tul kkóhen tahen yóm yaken.
34Yakà alien lemenget ne sidek kebuten yóm fun yehen ne sok meles laen kô koduhen du.
35Là kô henmóyóen du balù kihu kimu btad le béléen ne là gsengel nawan du balù nô kbong yóm basa le du.
Currently Selected:
Kem Udél Hlalak Tehe Selumun 6: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
