Kem Udél Hlalak Tehe Selumun 31
31
Yó kem tehe udél Lemwél
1Ni se yó kem tehe udél tolok yéen ke
Lemwél yóm tehe sotu tau hol geta.
2Yó monen, “U se yóm hol dou ngà balà Dwata yóm knihu béléen.
Ni se yó kem hlauhu kóm.
3Béem namà bè yó kem libun sidek nmò le yóm kgisem ne filakem
yakà lu du gónón gel gbà klowil yó kem tau hol geta.
4Hol hnungolem nim ni Lemwél,
là kóen hyu kinum le yóm lemengel yó kem tau hol geta
ne dalang se yó kem dumu tau mogot benwu ke hemdeen le minum.
5Ke sok le minum déke klifót le yó kem udin ne là gmò le du yóm tedeng bè yó kem tau élél.
6Yóm ninum lemengel hinum yóm tau móyón matay
ne yóm tau alì sidek kegnómen du yóm ksidek klowilen.
7Tódô bayaem yóm kinum le anì klifót le yóm alì kélél le ne yóm alì sidek kegnóm le du.
8Uu mdà du bè yó kem tau là hulung le skuya bè udél yóm ktedengen
dalang se bè yó kem tau laen dù tmóbóng kul.
9Uu fen mdà du yóm kukum tedeng.
Hol nmoem yóm tedeng bè yó kem tau élél ne bè yó kem tau laen dù gmò le.”
Ni se koni yó kem udél tolok yéen ke Lemwél.
Yóm libun hyu kmoen
10Mdangan gónó mton du yóm libun mò yehen hyu kmoen
ne ke wen libun lómón yó kmoen tey hyu senta yóm kimu legen mebtes.
11Tey ksalig tuha logihen du ne laen dù gónón élél béléen.
12Yóm klawihen mowil yóm libun yó tey hyu kmoen ebè tuha logihen ne laen se gónón hemsidek du.
13Gel nebelen yóm mò nmoen nes ne tey wen óyóen mò du.
14Gel wen kem ken gel nwiten gu bè yó kem lanen mógów
lómón se yó kem kafal tau mò udél swa gel lemulón ken gu bè yó kem dumu benwu mayuk.
15Sal gel temkifu mò ken bè yó kem fes lówóhen ne tulónen yó kem libun heseken yóm hmoen kul.
16Nan tenngel yóm tonok benlihen ne lemwót bè yóm filak ulék yó kem kun deng nmò, yóm huluhen du.
17Tey móyô mò nmò, kemgis ne leged.
18Tngónen yóm tey kbong muhen yóm nmoen mò gel hbaluen ne balù kifu sana kmoen du.
19Gel tembong ne ominen mewel du mò nes le.
20Là kóen sgafas nawahen ebè yó kem tau élél ne gel benlayen yó kem tau là deng wen gónón ma.
21Là kô tnafa nawahen du yóm bulónen tnaw abay se deng eles wen nes le mfól yó kem fes lówóhen.
22Gel wen kumù nmoen ne yóm kun nes gel lesek tey hyu ne tey tilob beteken.
23Tey tótól yóm tuha logihen bè gónó skukum ne du se sotu logi gónó le galak bè kul benwu.
24Ne yóm libun yehenen ni koni gel mò nes ne hilet ne hbaluen bè yó kem tau gel mò udél swa.
25Nim libun ni wen kgisen ne tey kadat kem tau du ne laen kô tnafa nawahen e lem hulin kdaw.
26Bè yóm kudélen sal gel gdilô du yóm khulungen hedem ne sal gel hyu yóm hlauhen.
27Sal gel wen gónón lala ne tendo snoloen yóm wen muhen bè yó kem fes lówóhen.
28Nim libun ni sal gel hegfan yó kem ngaen yóm tey kehyu nawa le ebéléen
senged se yóm tuha logihen tey kdóyónen du.
29Monen, “Tey dê libun hyu kmò le okóm uu yóm hol lemyu bè kdéen.”
Ni se koni udél yóm tuha logihen.
30Yóm nawa olon hyu ta, gsukat du tau ne yóm ktilob libun, mahil lana,
okóm megdóyón yóm libun kmikò ke Dwata.
31Hol henblatem béléen yóm kdéen deng nmoen abay se tey knóón du ke nadat yóm kdéen tau.
Currently Selected:
Kem Udél Hlalak Tehe Selumun 31: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
