Kehedem Tau Tmolok 3

Là gomongen bè nili yóm tsaptér 1 kól bè tsaptér 2. Yó tulónen bè ni, yóm kdéen sal laen dù gónón e kól anien ke hotu tau gelen mò nmò laen kô dù gutahen du. Ne yóm tau, anien ke gotu hennagien yóm kdê tonen talak tonok ne wen kendengenen ne hligal mken ne minum, okóm laen dù gónón e kól snéen, hol lómón ke ktesem lenos olon tódô mlan ne là bud tonem du. Ne bud tulónen yóm tau hulung hedem ne yóm tau nungel senged kul matay. Yó gónóm mon yóm kdéen laen dù gónón e kól.

Sal mdengen kul kdaw yóm kdéen nmò tau

1Sal mdengen kul kdaw yóm kdéen gel nmò tau talak tonok.

2Wen kdaw hesut ngà ne wen se kdaw matay.

Wen se kdaw mulu ne wen se kdaw muta.

3Wen se kdaw hmatay ne wen se kdaw hkó des.

Wen se kdaw gembà ne wen se kdaw bud hemdà.

4Wen se kdaw mkik ne wen se kdaw kmuli.

Wen se kdaw langag ne wen se kdaw madal.

5Wen se kdaw sembulét botu ne wen se kdaw bud semtifun du.

Wen se kdaw sekef ne wen se kdaw slayuk.

6Wen se kdaw mebel ne wen se kdaw lemana.

Wen se kdaw hemyu ne wen se kdaw mbot.

7Wen se kdaw kemsê ne wen se kdaw kmefeng.

Wen se kdaw tódô yem ne wen se kdaw mudél.

8Wen se kdaw sbong nawa ne wen se kdaw sutó nawa.

Wen se kdaw sgida ne wen se kdaw menek.

9Tedu se hol guta tau du yóm alì khotu le gel le mò nmò? 10Sónmou hemdem du nim ni ke gel hennagiu yóm dê kay hmò Dwata yó kem tau. 11Deng tilob kmò Dwata du yóm kdê nmoen bè yóm kul kdaw. Deng eles suen bè nawa tau yóm óyô temngón du yóm mò kmoen elem hulin kdaw, ewenem yó, là kô tngón tau du yóm kdê nmò Dwata kewóten bè kbuten efet kól bè sónen. 12Yó gónów hemdem du, són olo hyu bè tau ke wen kligal le ne ke hotu le nawa le mò du yóm hyu yóm igò le tolo mowil. 13Hyu ke hligal le mken ne minum yó kem tau, hnigal le ulék yó kem deng leniteg le, abay se yóm kdéen yó hono basa lemwót bè Dwata.

14Deng eles tngónu balù kihu nmò Dwata, deng duhen yó ne. Là gbek tau temnù du, ne là se gbek le mkó du. Yó mu Dwata du nim ni anì wen klikò tau du. 15Balù kihu sut nim kmoen ni, ne balù kihu sut elem hulihen kdaw, deng kem tehe yu ne ekni ksuten. Tendo sensulit Dwata yóm kdéen.

Là ktedeng yóm kukum nwit tau

16Sotu bud tonu talak tonok, bè yóm gónó le gel skukum, deng eles nô bè yó ne yóm sidek. Tahu se, yóm gel kkukum le tau, là tedengen. 17Yó hendemu, “Angat wen kdawen knukum Dwata yóm kdéen tau hlanen bè yó kem gel nmò le, tau tedeng nmoen, duhen ke tau sidek nmoen.”

18Bud hendemu, yó gónó Dwata tódô mayà kul mò sidek yó kem tau mò gónón tmilów kul, anì bè yó gónó le temngón du yóm keskél le bè ógóf. 19Abay se yó kem tau ne yó kem ógóf, senged kul mnawa ne senged kul se matay. Yó gónóm mon, laen dù gónó le stólóng tau yóm ógóf. Hono laen dù gónó le e kól. 20Senged se gónó le e mulék. Bè kfung gónó le gu lemwót, bud ebè kfung se gónó le e mulék. 21Tau du de kun temngón du yóm tulus tau mógów eta ne yóm tulus ógóf mulék elem tonok? 22Duhen ni se yóm dou kton du, tey hyu bè tau ke hol hligal du yóm kmoen nmò. Yó se mu le mowil. Ke deng matay yóm tau, laen dù tau bud gembek mit du mulék anì wen kligalen elem hulin kdaw.

Là gomongen bè nili yóm tsaptér 4 kól bè tsaptér 9:8. Yó tulónen bè ni yóm alì kehegnok yó kem tau talak tonok, balù sotu ke wen tau tmóbóng kul abay se tey le mfasang yó kem tau hemgnok. Ne yóm tey khotuhen gelen mò nmò anì wen gónón ma abay se nélés nawahen kem dumun tau. Okóm yóm kdéen ni sal laen dù gónón e kól, lómón ke ktesem lenos là bud tonem du ne. Ne yó bud tulónen bè ni snéen yóm tau laen dù ngaen ne laen dù dumun setwoli tey khotuhen gel mò nmò anì wen kendengenen. Tikóng deng wen kendengenen là kô gsengel nawahen du abay se yóm kdéen laen dù gónón e kól.

Yó dumu bud tulónen bè ni yóm là kehyu yóm tódô kendel mò fasad bè Dwata, ke tódô fà te mudél yake na te na hendem gna, déke gebkó te yóm udél laen dù muhen. Ne ke fmasad te bè Dwata, hol dnohò te abay se ke Dwata kun là megtondohen. Yó sotu bud tulónen bè ni, blay Dwata bè tau yóm kdê wen muhen du, kendengen ne któtól, okóm là hefligal Dwata du. Yóm klowil tau laen dù muhen balù nô kfasangen ne balù nô któtólen angat kmanas hol lómón ke olung là bud tonem du ne. Yóm tau tilob knawahen bong muhen senta yóm hboo alì mebtes. Ne yóm khulung hedem mkay senta yóm kwen filakem. Yóm khulung hedem ne filak gotu gwahen kdéen, okóm yóm khulung hedem fen lemwà klowilem. Bud sotu tulónen bè ni gbak ebè yóm kimón tekuy du yóm tau hol geta. Balù kihu nmò yóm tau hol geta gbeken mò du, okóm ke nimón tekuy yó kem kun hlau menek kbenwu tekuy. Yó sotu tulónen, yóm hatay, tódô kdéen tau gmumfak du.

Currently Selected:

Kehedem Tau Tmolok 3: tbl

Highlight

Copy

Compare