Kem Udél Hlalak Tehe Selumun 24
24
Kem udél hlalak gbak ebè yóm dê kay kmò tau
1Béem hendémê yóm kul kmò klowil
yó kem tau gel mò sidek
ne béi se tô mit swè bélê le.
2Són tendo hendem le matul yóm sidek,
tódô ket kebngat le sumóng le sal gel wen tau hensidek le.
3Lemwót bè khulung tau hedem gónón mdà yóm gónô
ne lemwót bè khulungen temnef gónón baling mbegel.
4Ne lemwót bè ketngónen gónón tódô ket du kimu mebtes ne tilob.
5Mom hyu he yóm tau hulung hedem senta yóm olon kemgis
ne yóm temngón senta yóm kemnu.
6Song hyu yóm mit sgida ke na hninggel semsatul du gna
ne ke dê tau matul bè yóm kwit du yó gónó le gemmò.
7Ngelem yó kem udél hulung hedem là getnef tau book du,
là kô tngónen du ke tedu mò udélen ke myón bè kukum.
8Yóm tau tendo gel matul mò sidek tótól du yóm nmoen.
9Yóm tau book tódô ket natulen sal gónó gemsalà
ne kenlit kem dumu tau yóm tau gel semdekà.
10Ke tlek kóm lenmek bè yóm kwen glumfakem là kóen wen kgisem.
11Béi hengayà hewà du yóm tau golu etahen hekawang yóm hatay
ne dalang se yóm tau són khatay du duen.
12Déke monem, laen kô dou hentngón du,
okóm Dwata temngón du yóm nô lem but blututem ne du hemdeng du yóm kóm kmò.
Tendo tnanuden u, ne benlayen u ofol geblà bè yóm deng nmoem.
13Ó Man, mkeni tneb abay se tey hyu ne tey mnóm béléem yóm tneb.
14Lómón se ni kehyuhen béléem yóm khulung hedem ke hol suem bè nawahem.
Ke ni se nmoem, dohò tonem kehyuhen ne dohò kgutahem du yóm hendeenem.
15Béi abay matul mò sidek bè gónô yóm tau tedeng kmoen
lómón yóm kun kmò yóm tau gel mò sidek ne béem hensidek se yóm kun gónó nô.
16Yóm tau tedeng kmoen baluen ke hilu duléken wen hemsidek du sal bud gel gebtik,
okóm kul yó kem tau gel mò sidek glumfak hlayam le.
17Ke wen gónón glayam yóm tau dumum sfohon béen timu óyóem du
ne béem fen tô hnigal ke wen hemsidek du.
18Yakà ton Dwata du yóm kmoem yó ne là kóen hligal du,
déke mom kóhen kebuten du yóm hohonem yó.
19Béem lenóngón yó kem tau gel mò sidek ne béem hendémê se yóm kul kmò.
20Yakem wen nefet nawan ne laen se hyu gutahen yóm tau mò sidek.
21Ó Man, hol knikoem Dwata ne yóm tau hol geta béléem
ne béi segbót bè yó kem tau hguluk bélê le.
22Yakà mekto ksuten bè yó kem tau hguluk yóm glumfak gu bè Dwata ne yóm tau hol geta yó
ne tmau du de eles tô temngón du yóm tey keglà lemwót bélê le yó?
23Yó kem tau hulung hedem mon du ni kem ni:
Là kóen hyu yóm tau kmukum ke mtukul nfihen.
24Ne ke là hensalaen du yóm tau gel mò sidek,
tnuled le kem dumun tau ne tey sidek kebut kdéen tau du.
25Okóm yó kem tau kmukum ke tnafak le yóm tau wen salaen
hyu klowil le ne tey ksalù kem tau kul.
26Yóm balà laen kéngen ilô yóm tahu keswè.
27Béem tagad hendem kmoem gónô ne kyehenem ke là nam hol hbalay du kmoem hulu bè tonokem
anì hol wen klowilem.
28Béem lenbù gbót tmifù yóm dumum ne béi se tódô lembù mò tulón etahen.
29Béem mon nmou béléen yóm deng nmoen béléu mò belesu du.
30Deng lanu lem numa yóm tau lemfu ne gu lem hulu yóm tau laen dù ledemen ni,
31ne tonu tódô tfeng sual ne kluon ne gotu hugón yóm labat botu hilolen.
32Yóm ktonu du nim ni tey kehedemu du ne tey wen hlauhen do.
33Yó hlauhen do nam na tungô likót ne nam na hegnô likót,
34okóm bè yóm igoem tungô tódô nuluken u yóm kélélem lómón kuluk yóm tau gel mnagaw.
Currently Selected:
Kem Udél Hlalak Tehe Selumun 24: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
