Kem Udél Hlalak Tehe Selumun 21
21
1Dwata se fen malak du yóm kun kmò
kógów kehedem yóm tau hol geta,
balù kihu gónó Dwata e bemklil du lómón kebeklilen yóm lel él.
2Ofo tau hemdem du ke hono tedeng yóm kun kmò,
okóm Dwata hemdeng du yóm nô lem but blututen.
3Tey hyu nawa Dwata du yóm tedeng
ne yóm là kkihu senta yóm gel dsù ebéléen.
4Bè yóm kehtonen salù ne keheklabaken gónón galak yóm tau gel mò sidek
ne yó se mit du gemsalà.
5Yóm tau mefesek ke tilob katulen du yóm nmoen yó se mit du gónón wen klowilen,
okóm yóm tau henkosohen yóm kendengenen baling élél.
6Yóm kendengen guta tau mlan bè ktulónen kéng tódô kmanas
lómón keklanasen bulók kulón ne ni se gónón gholot e lem hatay.
7Lemwót bè yóm alì ksidek nmò le yó kem tau gel mò sidek gónó le golu elem hatay,
abay se kenbê le mò yóm tedeng.
8Yóm kun kmò klan yóm tau gemsalà là kóen btol,
okóm yóm tau laen dù belen kehedemen tedeng yóm kun nmò.
9Mom hyu he ke nô te hatal yóm tau,
senta ke setnù le tuha libunen yóm gel mit du sgés lem gónô.
10Yóm tau gel mò sidek són nusolen yóm kmoen sidek
ne laen kô koduhen kdumun.
11Sok megtafak yóm tau gel semdekà
bè yó he gónón baling hulung hedem yóm tau là ngelem kehedemen.
Ne ke hnauhem yóm tau hulung hedem mom temnù ketngónen.
12Dwata se yóm temngón du yóm kun gmónô yóm tau gel mò sidek
ne bud du se heglà kul.
13Yóm tau là kenmónen du kehkoduhen béléen yóm tau élél,
là se wen kemmón du yóm kun kehkodu.
14Yóm kimu lifut blay hebóhen lebut
ne yóm kimu mò wa nawa lifut blay, hkóhen yóm sidek kebut.
15Sok tedeng yóm kukum tey hligal yó kem tau tedeng kmò le,
okóm yó kem tau gel mò sidek bud ni se tenkedu le.
16Yóm tau senyaten yóm lan ebè yóm khulung hedem
mahil knóen bè kul gónó nô yó kem matay.
17Yóm tau alì beyen bè yó kem kun gónó hligal, baling élél
ne yóm tau beyen bè yó kem ninum lemengel ne yó kem ken segkay, là kô wen kendengenen.
18Yóm hlayam nmò yóm tau gel mò sidek bè yóm tau tedeng kmoen
mom bud mulék etahen.
19Mom hyu he ke nô bè benwu laen dù menwu du yóm tau
senta ke setnù le tuha libunen yóm gel mit du sgés ne lembut du.
20Yóm tau hulung hedem tey mdengen kken le ne tey wen kimu mebtes nô bè gónô le,
okóm yóm tau book tódô namaen hekawang yóm kun.
21Yóm tau sen-galuhen yóm ktedengen ne kogot nawa tau béléen
tonen se ktahà ktauhen ne kadat tau du.
22Yóm tau hulung hedem gbeken muluk ebè yóm kul gónó nô yó kem tau alì hulung sfatay
ne genbaen yóm kul gónó heklung alì genléd nawa.
23Yóm tau eles gel nabungen kudélen
yó se hlayuk du bè yó kem gfà.
24Sedekà boluy du yóm tau heklabak ne hton salù
ne yóm alì sidek keheklabaken bè ket nmoen.
25Yóm sen-galu nawa yóm tau lemfu yó se yóm hmatay du
yakem móyô mò nmò se.
26Yóm tau lemfu són ófô yóm tendo nô bè nawahen,
okóm yóm tau tedeng kmoen là kóen segafas keblayen.
27Tey kenlit Dwata yóm dsuen ebéléen yóm tau gel mò sidek,
hol néen ke yó gónón tô demsù anì mkó tahen yóm salaen.
28Yóm tau gel tmifù kéng là kô gel hentahu le du,
okóm yóm tau mudél mlan bè ktahuhen mekteng kungol le du.
29Yóm tau gel mò sidek olon hmingón hegfan du yóm ktedeng kmoen,
okóm yóm tau tedeng kmoen gel hendemen yóm ktedeng kmoen ebè kem dumun.
30Là kóen lemyu senta Dwata yóm khulung tau hedem
duhen yóm khulungen temnef ne khulungen hmau.
31Baluen he ke deng eles hentifes yó kem kudà mò gel nit sfatay,
okóm són Dwata gónón gel lemwót yóm kegmò.
Currently Selected:
Kem Udél Hlalak Tehe Selumun 21: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
