Kem Udél Hlalak Tehe Selumun 22
22
1Mom hyu he yóm tau ke néléken yóm
któtól bè kehyu kmò senta yóm kbong kendengenen
ne mom hyu he ke tótól bè yóm kehyu nawa senta yóm kwen tembaga futien duhen tahu blówónen.
2Yóm tau élél ne yóm tau mdengen
senged le bè yóm kmò Dwata kul.
3Yóm tau hulung milô eles dilóen ne senyahen yóm sidek,
okóm yóm tau là ngelem kehedemen mom mógów e du ne yó gónón glayam.
4Yó ofol yóm tau heglaan ne kmikò ke Dwata
duhen yóm kendengenen ne kegdóyónen ne ktahà ktauhen.
5Yóm tau là btol kehedemen tey dê gónón btang ne gholot
ne yóm tau eles mabung hlayuk bè yó kem sidek.
6Eles hdalang yóm ngà yóm kmò kwiten du hyu yóm kun kmò
ne sok deng malay knawahen là kô gkóhen du.
7Yóm tau mdengen, knamalen yóm tau élél
ne yóm tau mutóng hesek yóm tau hemdóm.
8Yóm tau gel mulu yó kem nmò là tedengen, glumfaken bunguhen
ne gesón se kehegnoken kem dumun.
9Nuyag Dwata yóm tau bkas nawahen ebè kem dumun
ne gel benlayen ken yó kem tau élél.
10Anì tefnô yóm kesbólów, hdó yóm tau gel sedekà,
dalang se yóm kesegled ne kudél hemsidek nawa.
11Yóm tau henlomen yóm klaen dù belen kehedemen
ne yóm alì kehyu yó kem udélen, yó se gónón geswè bè yóm tau hol geta.
12Tendo gel olun Dwata yóm ktahuhen,
okóm tnangkisen yó kem udél yóm tau mò kéng.
13Yóm tau lemfu tódô kem mngak liyun hekawang,
monen, “Mataye mni ke hewae.”
Mò dawahen anì là moen nmò.
14Yóm ksamuk lómón ke holot gónón bkó
yóm tau lenbut Dwata.
15Sana kmoen se yóm ngà sal gel wen là kguliten,
okóm bè kfes du mkó du béléen.
16Yóm tau lenugihen yóm tau élél anì temnù kendengenen, baling élél.
Senged se kbalingen élél ke bemlay bè yóm tau mdengen.
Kem udél hlalak gbak ebè yóm dê kay nmò
17Ni sii yó kem udél yóm tau hulung hedem,
monen, “Hol henklinguhem se yóm dou udél ne hol suem lem hendemem yóm dou ketngón.”
18Yakà teyen hyu nawahem du ke hol suem lem hendemem
ne ke gbekem bud tmulón du bè kem dumum.
19Kóyóu ke hol snaligem Dwata
ne ni se yóm hetngónu kóm ni.
20Snulatu bélê ye yóm tlu folò kem udél hlalak.
Ni kem udél hlalak bè kehlau ne ketngón ni
21mò hetngón du kóm yóm ktahuhen
anì gbekem bud tmulón du bè yóm tau mdók kóm, yóm tahu duhen.
22Béem nongò yóm tau élél baluen ke gbekem mò du
duhen ke nitem skukum igoen élél.
23Yakà Dwata du mdà du béléen yóm kun sentulón
ne hensideken klowil yóm tau hemsidek yóm tau élél.
24Béi mit swè bè yóm tau sunget
duhen slomong bè yóm tau alì sidek kebuten.
25Déke gdalangem yóm kun kmò
ne yó gónóm gholot ne là bud gmoem du yóm hyu.
26Béem fnasad fen tô mayad utóng dumu tau.
27Sok là gbekem mayad du balù yó he kem gónóm tungô sana kwa le du.
28Hol béem abay kó yóm sana ilô bè blóng tonok tehe nmò yó kem gónó ye semfu.
29Tonem kô yóm tau alì gulit kmoen nmò?
Knóón kmoen nmò bè yó kem tau hol geta, là bè yó kem tau hkawang du.
Currently Selected:
Kem Udél Hlalak Tehe Selumun 22: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
