Kem Udél Hlalak Tehe Selumun 20
20
1Yóm kesedekà ne kehfulów tau lemwót
bè yóm tifas ne kem ninum lóbô
ne yóm tau lengel du là kóen hulung hedem.
2Yóm klikò tau du yóm alì sidek kebut yóm tau hol geta
lómón yóm klikò tau du yóm ngel yóm mon le liyun.
Yóm tau hebut yóm tau hol geta hfatayen knóen.
3Megdóyón yóm tau là miten sbólów,
okóm sok fes tau book sal gel mit sgés.
4Yóm tau lemfu là kô tenblaen du yóm bantang kdaw kehyu dmadu.
Yó gónóm mon bè yóm kdaw kuta tódô tô mebel okóm laen dù tonen.
5Yóm kngelem yó kem atul nô lem hendem tau lómón yóm linu alì nelem,
okóm yóm tau alì hulung temnef tngónen bè ketdeken du.
6Tey dê tau smalù du yóm kul kogot nawa,
okóm olon mtukul gónó mton du yóm tau gsalig.
7Hyu nawa le kul yó kem kun ból yóm tau tedeng
ne laen dù belenen yóm kun kmò.
8Sok bangen kmukum yóm tau hol geta
gotu dilóen yó kem tau gel mò sidek ne knukumen lu.
9Laen kô dù tau gembek mon du,
“Deng gotu hólósu ne lem but blututu ne laen dù salau.”
10Tey kenlit Dwata yóm kihu nmò lemingko
ne yó kem btes là tódóen.
11Balù yóm ngà sana kdilô du bè yó kem nmoen
ke laen dù kéngen duhen ke tedeng kmoen.
12Dwata se fen bemlay du kut yóm klingu mò hungol
ne yóm mata mò hton.
13Béem henlom ktungóem déke balingi élél,
btiki ne moi nmò ne là kói élél ken.
14Yóm tau sal gel senlónen yóm hbalù lanen tô mkos btesen,
okóm bè yóm deng kewóten tey ksaluen du yóm deng benlihen.
15Yóm udél yóm tau temngón hol mkay senta yóm tahu blówón
ne yó kem kimu mebtes.
16Ke sok wen tau fmasad mayad utóng yóm tau là deng tngónen du
yake nan hlun sandà kdê kimuhen dé yóm tau fmasad yó mò gónón tahu.
17Yóm ken nwa mlan bè sukat tey mnóm bè yóm tau ma du,
okóm kogolen bè yó mom wen gfaen du.
18Baling yóm atul ke wen gónó halak
ne na hol henyu semsatul du gna, ominen hyu mit sgida.
19Yóm tau lemnek ksumóngen gel tulónen yóm lifut tulón du,
yó gónóm mon béi segbót bè yóm tau tódô faen kudélen.
20Matay se kun yóm tau tnuleden kem tuhahen,
lómón yóm solok mlef lem gónón mget kifu.
21Yóm umun lenolok nwa
laen dù kligalem du bè hulihen.
22Béem abay mon, “Melese se dou.”
Nam na hatan kun kmò du Dwata, du he tmóbóng kóm.
23Tey kenlit Dwata yó kem nmò lemingko
ne yóm tmimbang lemugi, là kóen hyu.
24Deng eles natul Dwata yóm kun kmò kógów klowil yóm tau,
okóm là kô tngón tau du yóm kun kógów klowil.
25Yóm tau tódô faen mò fasad bè Dwata angat gsel
ne mom yó he tô kehkuónen mebel lanen hemdohò du deng kogolen.
26Yóm tau hol geta hulung hedem dilóen yó kem tau gel mò sidek
ne bè yóm ktafaken kul laen kô bud kodu mung du.
27Bè Dwata gónón lemwót yóm kehedem tau
ne tódô tngón tau se yóm hyu ne yóm là hyuhen ne laen dù gbuni bè Dwata.
28Yóm kogot nawa ne yóm kteneb yó se mit du hyu knóen yóm tau hol geta
ne yóm kun ktedeng yóm hembegel du yóm kun kogot.
29Yóm gónó le megsalù yó kem lomi lemnok duhen yóm kul kgis
ne yóm gónó le megdóyón yó kem logi deng tuha duhen yóm kubón le.
30Yóm lebened lemwót bè kestódô gónón mkó yóm nmò sidek
ne bè yóm kboug gónón sfili yóm kehedem tau.
Currently Selected:
Kem Udél Hlalak Tehe Selumun 20: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
