Kem Udél Hlalak Tehe Selumun 19
19
1Mom hyu he yóm tau élél laen dù kéngen
senta yóm tau book ne gel mò kéng.
2Là kóen hyu ke tódô faem kmoem ke là deng eles tngónem du
duhen ke alì hentlagadem ne dengi mom su.
3Lemwót bè yóm kun kbook yóm tau gónón gbà klowilen,
ewenem sana kehnuléken ke Dwata.
4Yóm kbong kendengen yóm tau mit du dê dumun swè,
okóm yóm tau élél mom hnayuk yóm dumuhen.
5Yóm tau tmifù kéng là kô lugun du là tnafak
ne yóm tau lemgas yóm kéng là kóen gewà lem tafak.
6Yóm tau masa tey dê tau móyô mit du swè
ne yóm tau gel bemlay tey dê tau swè du.
7Yóm tau élél sal gel knutó nawa yóm kdê dumun setwoli
milud he yó kem ween gotu le hlayuk béléen.
Baluen ke són moen lemolò hkodu bélê le là kô tonen kul.
8Yóm tau ma yóm khulung hedem henyuhen klowilen
ne yóm tau hol msù du bè nawahen yóm khulung temnef, hyu klowilen.
9Yóm tau tmifù kéng là kô lugun du là tnafak
ne yóm tau lemgas yóm kéng hukolen klowilen.
10Là kóen knóón bè yóm tau book ke genbóten klowil yóm tau wen kendengenen
ne milud he kóngóhen bè yóm hesek ke du kmamal yó kem tau hol geta.
11Yóm khulung tau hedem bemlay du kanay nawa,
ke gemsalà le béléen yó kem dumu tau tódô hnifóten, yó se gónón megdóyón.
12Yóm klikò tau du yóm alì ksidek kebut yóm tau hol geta
hol lómón klikoen du yóm ngel yóm gel mon le liyun.
Okóm yóm kun kehyu nawa ebéléen yóm tau hol geta lómón kehyuhen bè bnes yóm amù.
13Yóm logi book nmoen glumfak maen
ne yóm libun tendo niten sgés tuha logihen lómón yóm tdak él tendo hfulów muni.
14Yóm gónô ne yó kem kendengenen yóm logi sal umun lemwót bè kem tuhahen,
okóm yóm libun hulung milô mò yehenen, lemwót bè Dwata.
15Yóm kefu tau mit du lemnga
ne lemwót bè kduken mò nmò gónón glayam bitil.
16Yóm tau mimón yó kem hlau Dwata htahaen ktauhen,
okóm yóm tau là kenmónen yóm udél Dwata hukolen ktauhen.
17Yóm tau knoduhen yó kem tau élél lómón ke hendómen Dwata
ne Dwata he hulék du yóm deng blayen.
18Eles tnedengem yóm ngaem gu laanen là deng gtufì
hol béem tódô lugun du là sentódô, déke matay bè yóm sidek nmoen.
19Yóm tau sunget yake tódô du mayad salaen
abay se ke fen bnayadem béléen tenmónen mò du.
20Hnungolem yóm kehlau le kóm
ne henmóyóem yóm kestódô le kóm anì hulungi hedem.
21Tey dê yó kem atul nô lem hendem tau,
okóm són yóm kun kóyô Dwata baling du.
22Yóm keseglom tau yó se yóm hemyak du
ne mom hyu he yóm élél senta yóm mò kéng.
23Yóm klikò tau ke Dwata gónón mowil
ne hyu ktungóen ne laen dù hemenen.
24Yóm tau lemfu olon mnok te huyówen
ne là dog gsungiten du kenen.
25Lemwót bè yóm ktafak le du yóm tau heklabak
gónón baling hulung milô se kun yóm tau là dengen ngelem kehedemen.
Ne ke bnólówem yóm tau hulung temnef temnù ketngónen.
26Yóm tau hensideken klowil maen ne hdóhen yéen
yó se yóm logi hemyak ne hudél knô.
27Ó Man, ke béi hmungol hlau
yó gónóm tlas bè yó kem udél mit kóm temngón.
28Yóm tau tmifù kéng sendekaen yóm tedeng
ne alì nóyóen yóm sidek.
29Deng wen tafak eles mangat kul yó kem tau semdekà
ne yó kem tau book eles wen se bogul tgama kul.
Currently Selected:
Kem Udél Hlalak Tehe Selumun 19: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
