Kem Udél Hlalak Tehe Selumun 11
11
1Tey keklit Dwata du yóm tau lemingko,
okóm tey kehligalen du yóm tau tedeng kun kmò.
2Sal gel mulék myak yóm tau heklabak,
okóm yóm tau heglaanen knóen hulung hedem.
3Tendo le galak bè yóm ktedengen yó kem tau tedeng kmò le,
okóm yó kem tau là gsalig kul bè yóm kul keseblékê, yó se heglà kul.
4Laen kô muhen bè tau yóm kendengenen bè yóm kdaw katayen,
okóm yóm ktedeng kmoen htahaen ktauhen.
5Lemwót bè yóm kun ktedeng yóm tau laen dù belenen mit du ebè kehyuhen,
okóm yóm tau gel mò sidek lemwót bè yóm sidek gel nmoen mit du meglà.
6Yóm kul ktedeng yó kem tau gsalig yó se hegewà kul gu lem yó kem sidek,
okóm yó kem tau là gsalig kul, gholot le bè yóm sidek alì nusol nawa le.
7Sok matay yóm tau gel mò sidek tódô lana yóm kun hendón
ne laen kô gónón e baling yóm kendengen nefet nawan.
8Yóm tau tedeng kmoen gewà gu lem yóm hlayam
ne yóm tau gel mò sidek mom yó yóm meflayam.
9Lemwót bè kun kudél gónó le meglà kem dumun yóm tau là madat ke Dwata,
okóm lemwót bè ketngón yóm tau tedeng kmoen gónó le gewà.
10Tey le hligal yó kem tau bè yóm benwu ke wen hyu sut bè yóm tau tedeng kmoen
ne ke matay yóm tau gel mò sidek tey keklélé le du.
11Megkay yóm benwu bong lemwót bè kul kuyag du yó kem tau tedeng kmò le,
okóm yóm kul udél yó kem tau gel mò sidek fen heglà du.
12Là kóen hulung hedem yóm tau sendekaen kem dumun,
okóm yóm tau hulung temnef tódô yem.
13Yóm tau gel semtebong sal bud gel tulónen yóm lifut tulón du,
okóm yóm tau gsalig là kô bud gel sentebongen du.
14Tódô klà le yó kem tau bè yóm benwu là wen tau mdengen malak kul,
okóm ke dê tau matul bè kwit kul hyu, tey hyu knô le.
15Yóm tau fmasad mayad yóm utóng yóm tau là deng hol dilóen du tey keglayamen du,
okóm yóm tau bê mò du laen kô tnafa nawahen.
16Gel gutahen kegdóyónen yóm libun hyu kmoen,
okóm là kun yóm tau gel hmugus olon gmuta kendengenen.
17Mulék hyu knóen yóm tau hyu kmoen bè kem dumun,
okóm yóm tau sidek baluhen hensideken knóen.
18Là kóen tahà kmuhen du yóm gutahen yóm tau gel mò sidek,
okóm yóm tau gel mò yóm tedeng, gutahen yóm ofol laen tul sónen.
19Tahà ktauhen yóm tau sal gel nmoen yóm ktedengen,
okóm yóm tau són moen mò sidek hukolen ktauhen.
20Tey keklit Dwata kul yó kem tau seblékê kehedem le,
okóm bè yó kem tau laen dù belenen yóm kehedem le, tey kligalen bélê le.
21Ngem! Yó kem tau gel mò sidek là kô lugun Dwata kul là tnafak,
okóm yó kem tau tedeng kmò le gewà.
22Yóm kóngó yóm libun tilob ke là hulungen mit du hyu yóm kmoen,
lómón kóngóhen ke lenahu tising blówón mebtes yóm ngólón sdô.
23Yóm kun hendeen yóm tau tedeng kmoen, hyu gónón e kól,
okóm yóm tau gel mò sidek yóm kun hendón, mom tafak gónón e kól.
24Yóm tau là sgafasen mom temnù yóm gónón wen
ne yóm tau ngalihen yóm tô mò blayen fen temnù kélélen.
25Hyu klowilen yóm tau bkas nawahen
ne yóm tau ten-gelen kem dumun bud wen se temgel du.
26Tey ktuled kem tau du yóm tau gel hembalù ke tlek temginof halay,
okóm meguyag se kun yóm tau tódô kendel hembalù halay.
27Tonen se kadat tau du yóm tau hol sen-galuhen yóm hyu,
okóm yóm tau hnebelen yóm sidek, sut béléen se yóm sidek.
28Mulék gdanà yóm tau tódô doen yóm kun kendengen lómón yó kem doun koyu gel tbó,
okóm yóm tau tedeng kmoen, tey hyu klowilen lómón ke yóm doun koyu alì lembud.
29Yóm tau heglayamen yóm kun fes lówó olon tódô mifu hólólen
ne yóm tau book són moen ghesek bè yóm tau hulung hedem.
30Lemowil béléen kem dumu tau yóm tau tedeng kmoen
ne yóm tau hulung hedem niten ebè Dwata kem dumun.
31Ke guta le ulék yóm deng nmò le bè ni te tonok yó kem tau tedeng kmò le
milud he kul yó du kem tau gel mò sidek ne kem tau gemsalà.
Currently Selected:
Kem Udél Hlalak Tehe Selumun 11: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
