Mika 7
7
Là gomongen bè nili yóm bérs 1 kól bè bérs 6. Yó tulónen bè ni kem bérs ni yóm tey klangag Mika lanen laen dù bud tau tonen tedeng kmoen tebel bè Israél. Laen dù bud tau gsalig. Balù yó kem hol kul fes lówó, là gsaligen kul. Laen dù nawa le tmóbóng kem dumu le. Balù yó kem tau gónó le gel galak ne yó kem tau gel kmukum lem blóng le, là kô le kmukum ke laen dù mò wa nawa le. Yó udél Mika ebélê le, tau le monok. Balù dumu le sulil-lem, gbek le hmatay du. Yó bud udélen ebélê le, deng moni ne yóm kdaw ktafak Dwata kul.
Yóm kegewà lemwót bè Dwata
7Okóm béléu do, són bè Dwata gónów htóbóng. Là kóen megewu nawahu du yóm angat kehewaen dou. Gel hnungolen ou yóm dou Dwata. 8Laen kô dù lan le kmuli do yó kem dou hohon. Denge tlokob, okóm angate bud mdà. Balù yóm deng knóu lem gónón kmifu, okóm Dwata se hlayag do. 9Tódô henbalahu yóm ktafak Dwata do, yakà denge gemsalà béléen. Okóm kogolen bè yó, bud nfihen ou ne tnafaken yó kem hohonu bè kdê yó kem sidek deng nmò le béléu. Tódô hewà Dwata o lem yóm gónón kmifu, nwiten o ebè layag ne bud tonu yóm tey ktedengen. 10Ominen yó kem hohonu, angat ton le snéen kul yóm tey kfi Dwata do. Ne tey sidek kyak le bè yóm tehe gel udél le ebéléu, yóm gel kmon le du, “Nô se yóm Dwata gónóm mogot?” Tódô hol dou mata se angat mton du yóm kdà le kul elaan hol lómón hitok bè lan.
Là gomongen bè nili yóm bérs 11 kól bè bérs 17. Yó tulónen bè ni kem bérs ni, kogol yóm ktafak Dwata kul yó kem kun tau, angat bud hen-guléken klowil le dalang se yóm benwu le bud hetloben. Lemwót bè yóm bud kulék le ebè Dwata yó kem kun tau, ya tey bud któtól le bè klamangen benwu. Okóm yó kem hohon le, tey ktafak Dwata kul. Okóm lemwót bè yóm kton le du yóm deng nmò Dwata bè yó kem tauhen, ya tey klikò le se kul, botong le kenkel bè yóm kadat le ke Dwata.
Yóm tey kehyu Dwata
18Laen kô dù dumu Dwata mkél kóm. Uu se yóm Dwata hmifót salà yó kem dù tauhem mowil. Sal gel wen sónen yóm kebutem tau, abay se yó hol nô bè nawahem yóm kkoduhem kul. 19Angat bud knoduhem mi. Tódô gotu lenuna ndaem yó kem salà me ne botem etu etlaan bè sokol mohin. 20Angat hol hegfanem bè yó kem kóm tau yóm là konol nawam ebélê me ne yóm tey kbong nawahem kum, lómón yóm deng tehe fasadem bè yó kem tehe fù me ekni le Abraham ne Jakub.
Currently Selected:
Mika 7: tbl
Highlight
Share
Compare
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
