Nahum 1
1
1Ni se yóm udél Dwata gbak bè yóm benwu Ninibi, htonen ke Nahum yóm tau menwu bè Élkus.
Yóm alì kebut Dwata yóm benwu Ninibi
2Yóm sana Dwata hol gónó mogot, tey mélés nawahen ke tólóng dwata lolò yó kem tau.
Gel bnelesen yó kem tau kembê du.
Lemwót bè kebuten kul, gotu genlaen lu.
3Là kóen mahil lembut yóm Dwata, okóm tey kfasangen.
Là gbeken du ke là tnafaken kul yó kem tau wen salaen.
Yó gónón hegfan du yóm kfasangen bè yóm tey klifus ne bè yóm tey lenos bong.
Yó kem lobun, olo kfung lemwót bè laan tihen.
4Tek olo bè udélen tódô kti yóm tey mohin bong dalang se yó kem él mlel.
Bud lemwót bè udélen gónón tódô mékéng
yó kem tey tilob gónó motob bè Basan ne bè Karmél ne yóm dlag bè Libanun gotu tbó doun le.
5Botong megsinsig yó kem bulul bè soluhen ne gotu le mnà yó kem bulul lemnek.
Dalang se yóm klamang benwu gotu leminol ne gotu le matay yó kem tauhen.
6Ke wen lenbuten, tau du de gembek mdà bè soluhen?
Tau du de bud mowil bè yóm tey kebuten?
Yóm kebuten yó, hol lómón ke mkal yóm tey dilóf ofi, botong lemusok bè soluhen yó kem léhék.
7Tey hyu yóm Dwata.
Ke wen hlayam sut, tek sónen du yóm gónó e mlo alì mbegel.
Gotu nofinen yó kem tau smalig béléen.
8Okóm yó kem hmohon du, gotu hkonulen lu bè yóm tey dunuk bong.
Ngangen mlo kul efet le kól lem yóm gónón alì mget kkifuhen.
9Kihol ye tô semsatul ke Dwata?
Angat nmoen sónen yó kem sensatul ye yó.
Tek sulék klan keglaen kuy, laen dù lan ye bud semsatul du.
10Yó kmò ktonen kul yó kem hmohon du yó,
lómón ke yó kem bnes skebeng alì semnual ne lómón yóm tau lengel glénggé mógów.
Yó angat kmoen kul, gotu ntemen lu.
Lómó ktemen kul, lómón yó kem lami deng mékéng bè tniba.
11Béléem Ninibi, gónón lemwót yóm tau alì sidek katulen ke Dwata.
Du se yóm tau tódô senflósen hmau kem dumun mò sidek bè yó kem tau bè dumu benwu.
12Yó udél yóm sana Dwata hol gónó mogot ebè yó kem kun tau Israél, monen,
“Yó kem tau Asirya, baluen he ke hilu kwen le ne balù yóm tey kekgis le,
angat gotu genlau lu anì gotu le lana talak tonok.
Ó kem dou tau, deng suléku ne tmafak kuy, là kô bud budu du ne.
13Yó nmou ni, angat lenwau yu lem hólól yó kem hohon ye ne hentohu bélê ye yóm kedina fét le kuy.”
14Yó bud udél yóm sana Dwata hol gónó mogot ebè yó kem tau Asirya nô bè Ninibi, monen,
“Laen dù bud ngà ye ne mò bud mit yóm kuy boluy.
Angat gotu genbau yó kem dwata kéng nô lem yóm gónô gónó ye gel tmaba ebélê le.
Deng eles hokolu sol ye abay se hono sidek yóm gel nmò ye ne là kô hyu hlowil kuy.”
15Tengel ye dé, wen tau sut gu lem bulul mit tulón hyu.
Yó tulónen bud menek kebenwu ye kun.
Ó kem tau bè Juda, bud nmò ye dé yó kem dê gel hnigal ye ne dnohò ye yó kem deng fasad ye ke Dwata,
abay se yó kem tau Ninibi hmohon kuy yó, là bud nled le du ne benwu ye.
Deng le gotu sulék meglà.
Currently Selected:
Nahum 1: tbl
Highlight
Share
Compare
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
