Isaya 42
42
Yóm tau tóbóng lówó Dwata
1Yó udél Dwata, monen, “Ni sii yóm
tau dou tóbóng lówó, yóm tau tendo ten-gelu.
Du se néléku ne tey hyu nawahu ebéléen.
Deng suu béléen yóm dou Tulus.
Ne du mit yóm kukum tedeng bè ket benwu.
2Nim tau néléku ni, là kóen na a gel hetê ne là kô hgelen du udélen, duhen ke mudél mgel gu bè gónón wen.
3Kehlingónu du yóm któbóngen kuy, hol lómón ke yu yóm ngà hulu móyón sfék, okóm là kô nan e tenfok du.
Ne hol lómón ke yu yóm solok sónmoen mudof, okóm là kô nan hlef du.
Du se hol mit du yóm kukum tedeng laen dù sónen bè kdéen tau.
4Laen kô tul kkóhen béléen yóm kgel nawahen.
Angat tódô lenngeben klamang benwu yóm kukum tedeng nwiten.
Balù yó kem benwu mayuk tey kangat le du yóm ktoloken.”
5Bè yóm tehe kedlimun Dwata yó kem longit seglafin, hol lómón ke mból nes lenulun bè klamangen.
Ne bud dlimunen tonok ne kdê yó kem nô tahen.
Deng gotu hlowilen yóm kdéen tau nô tahen.
Ne ni wen udélen ebè yóm tau tóbóng lówóhen, monen,
6“Ou se tmaba kóm, yóm Dwata gónóhem mogot.
Deng benlayu u kfasang mogot kukum anì hentedengem yó kem kukum te tonok.
Hlanu béléem yóm fasadu ebè kdéen tau.
Bud hlanu béléem snéen yóm layag mò hton yóm kdéen tau te tonok.
7Angat htonem yó kem butô ne angat hewaem yó kem tau geblanggù lem yóm gónón kmifu.
8Tek són ou yóm Dwata gónóm mogot.
Là móyóe du ke wen dwata kéng gbót megdóyón béléu.
Tey kekbéu du ke wen dwata lennged gomong megdóyón bè yóm dou nmò.
9Yó kem deng tehe eles tulónu kuy, deng tódô tahu edu.
Ne ni bud wen lomi eles tulónu kuy gu laanen là deng sut.”
Sngal dmóyón ke Dwata
10Semngal tekuy ebè Dwata dé yóm sngal lomi.
Kdéen tau bè klamangen benwu, hol sngal tekuy yóm gónón megdóyón.
Yu kem tau gel mit kafal, hol dóyón ye Dwata.
Dalang se yó kem mowil lem mohin, gbót dóyón ye Dwata.
Ne yó kem benwu mayuk, hol ye semngal ne kdéen tau menwu bélê ye.
11Yóm benwu laen hol wen tauhen, dalang se yó kem benwu lemnek nô lemen, hol dóyón ye Dwata.
Hol dóyón ye Dwata, yu kem tau nô bè Kidar.
Dalang se yó kem tau nô bè syudad Sila, hol ye hligal mensag gu ta yó kem bulul.
12Yó kem tau nô bè yó kem benwu mayuk, yake hol megdóyón bélê ye Dwata ne hol dóyón ye se kuy yóm tey kegetahen.
13Yóm Dwata, hol lómón yóm sendalù deng eles htigel, módód ebè gida.
Ke ston bè kem hohonen, tódô hentéen lu ne mensag, hegfanen bélê le yóm tey kfasangen.
Fasad Dwata bè kem tauhen yóm któbóngen kul
14Yó mon Dwata, “Tey kegenu tódô neb, là kô bnalau du yóm kni le ebéléu yó kem dou tau.
Okóm ni ne kkól yóm butengu malà kul ne tódóe hetê, lómón yóm libun mlutut ke kól yóm kdawen sut blututen, tódô lemangat.
15Angat gotu genbau yó kem bulul lemnek kkólen bè yó kem bulul geta ne gotu hlenesu yó kem bnesen ne koyuhen.
Yó kem benwu tehe wen él mlel du, angat henbalingu lu benwu là hyu menwu du ne gotu hektihu yó kem él tehe bnusungu.
16Angat nalaku yó kem dou tau butô bè yóm lan là deng kul sulék lan du.
Angat henbalingu bélê le layag yóm tehe gónón kmifu ne angat hlóhu bélê le yóm lan sebsuk.
Ni se yóm fasadu kul, là kóen bud mulék elem baku.
17Okóm yó kem tau smalig bè dwata lenbù nmò ne hentahu le lu mò dwata le, angat tey kehyaku kul ne heglaanu lu.”
Kgel kulu yó kem tau Israél
18Bud mon Dwata, “Yu kem tau bokong, hol ye hmungol dé.
Yu kem tau butô, hol tenngel ye dé.
19Tey butô yóm tau dou tóbóng lówó.
Tey bokong yóm tau dou gel hógów.
20Yu kem tau Israél, deng tey dê ne ton ye nmou, okóm là kô kenmón ye du.
Igoen se wen klingu ye, okóm là kô ye mungol.”
21Yóm Dwata gónó tekuy mogot, hol kóyóen ke lenwaen tekuy.
Yó gónón hol hget du bélê tekuy yó kem hlauhen ne yó kem toloken.
Kóyóen ke hol nimón yó kem tauhen.
22Okóm ni, deng wen tau megef kul yó kem kun tau, gotu nwa le kimu le.
Wen se bélê le deng knukub le lem sol nelem, wen se bélê le bnos le gónó le kmukub kul.
Gotu negef le kimu le ne laen kô dù tau tmóbóng kul.
23Yake wen bélê ye móyô hmungol du yóm ni.
Lenwóten ni ne, yake wen bélê ye hol hmungol du yóm monu.
24Tngón ye kô, tau du bemlay tekuy kem tau Israél elem tdok yó kem tau megef tekuy?
Dwata se mò du yóm yó lan tekuy là mimón du.
Là lolò tekuy du yóm kóyóen bélê tekuy ne là nimón tekuy du yóm toloken.
25Yó gónón hol hegnóm du tekuy yóm tey kebuten ne heglayamen tekuy lem gida.
Yóm kebut Dwata, hol lómón ke ofi mken bè klamangen benwu Israél.
Okóm balù udì ke tô getnef tekuy yóm nmoen yó, laen kô dog dnalang tekuy du.
Currently Selected:
Isaya 42: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
