Isaya 41

Là gomongen bè nili yóm bérs 1 kól bè 7. Yó tulónen bè ni yóm eles htulón Dwata ke Isaya bè yó kem tau menwu sentu mohin. Eles hetgama Isaya lu bè yóm angat kegdek yóm tau hol geta lemwót fi dmata kdaw, yóm deng gemmò bè yó kem sendalù deng gnidahen bè ket benwu. Bè yóm kegdeken bè yó kem tau sentu mohin nim tau ni, ya tey sidek klikò le du. Yó nmò le gotu le mò yó kem dwata kéng mò gónó le mni tóbóng. Tey keheget le kul yó kem dwata kéng nmò le anì là mugod le. Mon Isaya mò kul kaem lemwót bè Dwata se hebegel hekgis du yóm tau hol geta monen ni koni, ne bemlay du kfasang anì gemmò bè yó kem kdê benwu gel lanen.

Kegduf Dwata yó kem tau Israél

8Yó udél Dwata, monen, “Yu kem tau Israél, hono kem dou tóbóng lówó.

Deng néléku yu kem tau semfu gu bè yóm tehe weu Abraham.

9Deng gotu sentifunu yu lemwót gu bè hol són tonok, deng tnabahu yu lemwót gu bè doli benwu.

Ne yó monu mò kuy, ‘Yu se yó kem mò tóbóng lówóhu.’

Là kô naw e kenbê kuy igò sem yu yóm dou nélék.

10Hol bê ye abay hlikò, tendohe gel nô bélê ye.

Ou se yóm kuy Dwata, laen kô dù knikò ye.

Tendo gel benlayu yu kgis ne tendo tnóbóngu yu.

Sónmou mofin kuy ne lenwau yu.

11Angat le mulék myak yó kem tau gel kmutó nawa kuy lemwót bè yóm klaen dù gmò le bélê ye.

Yó kem tau mit sfatay bélê ye, angat le matay.

12Tódô lana boluy le te tonok.

13Ou se Dwata yóm kuy gónó mogot.

Tendo gel ten-gelu yu.

Ni hol udélu ebélê ye, ‘Hol bê ye abay hlikò.

Ou se tendo tmóbóng kuy.’ ”

14Bud mon Dwata, “Yu kem tau Israél, là kô ye hol wen se kuy ne laen kô kgis ye.

Okóm hol bê ye abay hlikò, ou se tmóbóng kuy.

Ou se yóm kuy Dwata kem tau Israél yóm Dwata laen dù belenen.

Ou se lemwà kuy.

15Yó angat kmou kuy, hol lómón ke yu yóm karas lomi alì telem nihihen.

Gotu knaras ye yó kem bulul, gotu hensidek ye lu.

Ngang ye mò kul efet le baling kfung.

16Sotun, lómón ke tmeef halay kmò ye kul.

Gotu sohul ye lu eta ne mung le holis bè lenos.

Angat wen lenos bong gotu semkla kul.

Angat ye hligal bè yóm kdaw yó abay se ou se kuy Dwata.

Angat tey kdóyón ye dou, yóm kuy Dwata yó kem tau Israél, yóm Dwata laen kô dù belenen.

17Bè yóm kdaw alì ksidek kleeng le yó kem dou tau, mebel le él bede laen kô dù ton le.

Tódô mékéng lem lihol le.

Timbow le hkodu béléu, tódô kendel bnalau lu.

Abay se ou se kul Dwata yó kem tau Israél yóm hol gónó mogot.

Là kô gbeku tódô mayà kul.

18Yó angat nmou, angat wen tey él hlelu lemwót gu lem tu kem bulul tehe wen él le.

Ne angat wen se kem él hetbulu gu lem sbongen.

Ne yóm benwu tehe là hyu menwu du, angat wen busung él nmou bè yó.

Ne yóm tonok mékéng tehe laen dù élen, angat wen sfut élen.

19Ne bè yóm benwu tehe là hyu menwu du, angat wen kem koyu tmowok du, yó kem koyu sidar ne akasya ne mirtal ne ulib.

Ne bè yóm tonok bà udì ke tehe wen tmowok du, angat henbalingu dlag.

Htowoku bè yó, yó kem koyu boluyen meguu ne dyunipér ne siprus.

20Yó kem nmou yó, angat kdéen tau gotu mton du ne temngón du ou se yóm Dwata hol gónó mogot fen mò du.

Ne tódô tngón le yóm kul Dwata yó kem tau Israél yóm Dwata laen dù belenen, du se mò du yóm ni.”

Là gomongen bè nili yóm bérs 21 kól bè bérs 29. Bè ni kem bérs ni, htulón Dwata ke Isaya yóm kewóten béléen yóm kegmò Sayrus yóm tau hol geta bè Persya, bè yóm kleden yó kem dê benwu ne yóm bud keblayen kul kwalis mulék ebè kul benwu yó kem tau deng negef le. Yó sotu htulón Dwata ke Isaya yóm klaen dù muhen yóm gel ktaba le bè yó kem dwata kéng, abay se là gbek le tmulón du yóm mò kmoen bè yóm gnahen ne là se gbek le tmulón du yóm mò kmoen bè hulin, ne là se gbek le mò du yó kem hentaw ton. Mon Isaya mò kul yóm kul dwata kéng yó, laen kô dù lemen lómón lenos.

Okóm gbek Dwata eles tmulón du kul yóm mò kmoen elem haya. Yó tulónen kul yóm kóyónen kól yóm sotu mò tmóbóng kul bè yó kem hohon le, deng sana gu ditu ne. Dwata se tmóbóng du mò gemlà yó kem hohon le.

Currently Selected:

Isaya 41: tbl

Highlight

Copy

Compare