Kehedem Tau Tmolok 12

1Duhen yó, hol hentulónem nawa yóm Dwata tehe mifil kóm yóm igoem tolo lomi tau. Hol nadatem gu laanem là deng tuha. Abay se ke dengi tuha laen kô dù bud kligalem bè klowilem. 2Hol hentulónem nawa Dwata gu laanen là deng kmifu ketngelem yóm kdaw ne bulón ne yó kem blotik, ne gu laanen là deng lemobun ktonem du yó kem gu hmilolem. 3Angat kól yóm kdawen gotu kenkel gu lem sigelem, ne gu lem tihem laen dù bud kgisem. Yó kem nihihem là holen bud wen dù tebel mò sfaem, ne là se holen bud gmefet ketngelem. 4Angati bokong. Là bud gungolem du ne yó kem udél tau gu bè lan. Là bud gungolem du ne uni gmaling ne uni semngal. Okóm ke dengi tungô, yó kem udél onuk gbeken bemtik kóm. 5Angati likò mógów ebè yóm gónón geta, ne budi likò mógów ebè lan, déke wen gfaem. Tódô bukay wekem ne là budi gembek, ne laen dù bud sen-galu nawahem. Dengi moni bè yóm benwu gónóm nô laen dù tul sónen. Bè yóm kógówem ebè yóm angat gónóm nô laen kô dù tul sónen tey dê kem tau lemangag kóm lemolò lan.

6Tahu se, hol hentulónem nawa yóm Dwata tehe mifil kóm, bè yóm hanà tolo klomihem tau. Hol hendemem gu laanen là deng htó yóm kedina blówón bukay, ne là dengen btang yóm tukung tahu blówón nféten. Béem nangat ke deng btù yóm sakub él bè kokol, ne ke deng btù yóm lebwón gónóhem gel hemsù él. 7Abay se yóm lówó tekuy bud baling kfung, ne fen mulék ebè Dwata yóm nawa tekuy bè yóm tehe gónón gu lemwót.

8Yó udél yóm tau smulat du nim ni, monen, “Laen dù gónón e kól yóm kdéen. Laen kô dù gónón e kól.”

Yóm hol sónen

9Lemwót bè yóm khulungen hedem yóm tau tmolok du nim ni, gotu toloken bè yó kem tau kdê yó kem deng tngónen. Gotu hennagien yóm lan yóm kdéen udél hlalak, ne gotu sentifesen lu. 10Gel nebelen yóm udél hemyu nawa, bede hono tahu kdê yó kem deng snulaten.

11Yóm udél yóm tau hulung hedem, hol lómón ke yóm tuged telem nogot yó kem tau semgyok ubiha mò malak yó kem ubihahen. Yóm udél hlalak, là kóen lana, lómón yóm tutuk tilob klahulen. Deng blay Dwata tekuy ni kem ni, yóm Dwata hol semgyok tekuy.

12Ó Man, wen sotu hol ten-gamahem. Laen kô tul sónen yóm ksulat le bok yó kem tau. Ke alì gedlug kehnagiem du, tey sidek klitegem.

13Ni se mò sónu du. Hol knikoem Dwata, ne nimónem yóm kdê hlauhen kóm, yakà ni du yóm deng sigangen ta yóm kdéen tau. 14Gotu knukum Dwata kdê yó kem gel nmò tekuy, hyu duhen sidek. Balù yó he kem nmò gebnos, gotu knukumen.

Currently Selected:

Kehedem Tau Tmolok 12: tbl

Highlight

Copy

Compare