Kehedem Tau Tmolok 11
11
Holi bemlay ne holi mò nmò
1Holi bemlay, abay se yóm blayem yó, angat bud mulék ebéléem elem hulin kdaw. 2Hdéem gónóm e mólól du yóm blayem, abay se là kô tngónem du ke wen sidek sut elem benwu hulin kdaw.
3Ke alì mfól lobun, ayawen demsù kulón.
Yóm koyu, ke hugón esubô duhen ke hugón ebwak, bè yó se gónón masà.
4Ke nam na hol nangat yóm kehyu kdaw, laen kô dù huluhem, ne laen se kô dù nutahem.
5Là kô tngónem du yóm mò kógów lenos, ne là se tngónem du yóm kmò kbut yóm ngà lem blutut yéen. Hol lómón yó se yóm là ketngónem du yóm kmò Dwata yóm Dwata mò du yóm kdéen.
6Holi heged mulu yóm kdê kay hulu, là kô tngónem du ke mahi du tmowok bélê le, duhen ke tódô kdê le gotu tmowok.
Hlau bè yó kem tuha ne bè yó kem lomi lemnok
7Tey hyu yóm layag, ne tey hyu mton du yóm kdaw. 8Ke deng alì tuha yóm tau, hyu ke hnigalen yóm klowilen ket kdaw. Okóm hyu ke là klifóten du snéen yó kem kdawen gel lebnong. Yóm kdéen angat sut, laen kô dù gónón e kól.
9Ó ngà logi lomi lemnok, holi hligal bè yóm igoem hanà tolo lomi tau. Hol hnigalem yóm klowilem ket kdaw. Nmoem yóm kóm kóyô, ne hotuhem gelem mò du yóm kdéen. Okóm hol béem abay klifót, angat snolò Dwata béléem kdê yó kem deng nmoem. 10Duhen yó, béen dê tnafa nawahem, ne béen dê lenóngón nawam. Yóm ksawangem logi ne yóm kgisem, là kóen legen.
Currently Selected:
Kehedem Tau Tmolok 11: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
