2 Bok Kem Tau Hol Geta 8
8
Kulék yóm libun lemwót bè Suném ebè benwuhen
1Yó tehe mon Ilaysa bè yóm libun boi tehe hlowilen ngaen, “Nwitem kem fes lówóhem, ne mebeli benwu gónóm nô, abay se hbel Dwata bitil bong lem nim benwu Israél ni lem yóm hitu halay.” 2Tahu se, lemwót yóm libun yó loloen yóm deng monen mò du yóm tau Dwata. Nwiten kem fes lówóhen, mógów le etu bè benwu yó kem Flistin, ne hitu halayen nô ditu.
3Tikóng deng yóm hitu halay, bud mulék ebè Israél yóm libun yó, ne mógów ebè yóm tau hol geta anì gwahen yóm gónóen ne yóm tonoken. 4Bè yóm khuseken elem gónô yóm tau hol geta yóm libun yó, tolo le stulón yóm tau hol geta Gihasi, yóm tóbóng lówó yóm tau Dwata. Lomi mon yóm tau hol geta mò ke Gihasi, “Tulónem do kun yó kem tey dê hentaw ton deng nmò Ilaysa.” 5Yóm igò Gihasi tolo tmulón du bè yóm tau hol geta yóm kmò kehlowil Ilaysa yóm ngà deng matay, sut se yóm libun tehe hlowil Ilaysa ngaen anì nan e htóbóng bè yóm tau hol geta bè yóm gónóen ne tonoken.
Bè yóm kton Gihasi du yóm libun yó, monen mò yóm tau hol geta, “Ngem, Sér, ni se yóm libun tulónu kóm koni, ne ni se yóm ngaen logi deng hlowil Ilaysa.”
6Snólók yóm tau hol geta yóm libun yó, “Tahu kô yóm tulónen?” Ne yó balà yóm libun du, monen, “Tahu.” Ne gotu tulónen bè yóm tau hol geta yóm kdéen. Duhen yó, wen genlal nélék yóm tau hol geta mò tmóbóng yóm libun yó, monen, “Tnóbóngem anì bud mulék ebéléen yóm kdê deng tehe nfunen deng lana béléen, balù yóm kdê tbas yóm tonoken bè yóm là knóen bud hulékem ebéléen.”
Là gomongen bè nili yóm bérs 7 kól bè bérs 29. Yó tulónen bè ni kem bérs ni yóm kógów Ilaysa ebè Damaskus yóm yê yó kem syudad bè benwu Aram. Yóm kógów Ilaysa yó, geslaen yóm kwen des yóm tau hol geta bè yó boluyen Bin-hadad. Yóm kungol yóm tau hol geta du yóm kkól Ilaysa bè yó, dóken yóm sotu tau tóbóng lówóhen boluyen Hasaél anì mit basa ebè Ilaysa, hsólóken du ke mkó yóm desen.
Okóm yó mom tulón Ilaysa ke Hasaél, yóm dwng kehegfan Dwata du béléen. Hasaél yóm bud tles yóm tau hol geta mogot yóm benwu Aram. Bè yóm bud kesfulék Hasaél, snólók yóm tau hol geta béléen ke tedu mon Ilaysa? Ne yó tulón Hasaél du, monen, “Angat mkó kun yóm desem.”
Hayahen bè yó, wen kumù nwa Hasaél ne leneben lem él, ominen demken du lem uyó Bin-hadad efet matay. Ne Hasaél bud tles mogot yóm benwu Aram.
Yó bud tulónen bè ni, yóm kesetles tau hol geta bè Israél ne bè Juda, stufì temles kul yó kem ngà le logi.
Currently Selected:
2 Bok Kem Tau Hol Geta 8: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
