2 Bok Kem Tau Hol Geta 9
9
Là gomongen bè nili yóm tsaptér 9. Yó tulónen bè nim tsaptér ni, wen sotu lumbuk yó kem tugod Dwata hanà lomi tau gel galak bè Ilaysa. Sotu kdaw wen sotu bélê le hógów Ilaysa ebè Jihu ngà Jihusafat anì lifut tenwélen hnolo Jihu, mò ilô yóm ketlesen yóm tau hol geta bè Israél. Bè yóm ketwélen ke Jihu hnolo yóm tugod Dwata yó, yó udélen ebè Jihu bè 9:6-10,
“Ni se udél Dwata ebéléem yóm Dwata yó kem tau Israél. Tenwélu uu hnolo mò ilô yóm kbalingem tau hol geta bè yó kem dou tau Israél. Wen hmou kóm, gotu genlaem yó kem fes lówó Ahab yóm amohem. Bè nim nmoem ni gónóhu meles yóm deng gotu khatay yehenen Jisébél yó kem tau tóbóng lówóhu ne yó kem tugodu. Angat himot genlaem yóm kdê fes lówó Ahab, gotu hnatayem yóm kdéen logi fes lówóhen bè benwu Israél, hesek duhen la. Lómón kmou yó kem fes lówó Ahab lómón yóm tehe khimot keglau yó kem fes lówó Jirubuam ngà Nibat, ne lómón yóm tehe khimot keglau yó kem fes lówó Baasa ngà Ahidya. Bè yó bè tonok Jisriil, angat gotu ken yó kem ohu lówó Jisébél yehen Ahab, ne laen dù tau lembeng du.”
Timbow deng kudél yóm tugod Dwata, ominen lemungkà bak dól ne mlóy mulék. Bong ke Jihu kun, snakayen klitun tóken lemwót, Tahu se, tódô uliten bè yóm tehe mon Dwata.
Là gomongen bè nili yóm tsaptér 10. Yó tulónen bè nim tsaptér ni yóm gotu khatay Jihu yóm hitu folò kem ngà Ahab logi, ne yó kem dumuhen setwoli Ahab. Bud hnatayen snéen yóm kdê genlal Ahab ne yó kem ween, dalang se yó kem tau gel blóngen ebè yó kem dwata kéng, tódô tahu e du se yóm tehe eles htugod Dwata ke Ilaydya. Bud tulónen snéen yóm gotu khatay Jihu yóm kdéen tau blóng ebè Baal, ne gotu hfugónen yó kem hehek botu Baal, ne hegbaen yóm gónó le tmaba ebéléen, nmoen gónó le mebel solu yóm kdéen tau. Gotu genbaen yóm kdéen wen mu le du bè yóm gel ktaba le ebè Baal.
Okóm wen gónó Jihu là mimón ke Dwata bè yóm mom ktabahen ebè yóm safì lennged nmò le bè tahu blówón. Yó yóm but gónó le là gemmò bè yóm kled Hasaél du yóm benwu Israél.
Currently Selected:
2 Bok Kem Tau Hol Geta 9: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
