2 Bok Kem Tau Hol Geta 2
2
Kehbatun Dwata ke Ilaydya ebè longit
1Bè yóm kdaw kehbatun Dwata ke Ilaydya ebè longit hlanen bè klifus bong, slomong le mógów gu bè Gilgal Ilaydya lewu le Ilaysa. 2Yó mon Ilaydya mò ke Ilaysa, “Tebeli bè ni ne kóm, abay se hógów Dwata o etu bè Bétél.”
Okóm yó balà Ilaysa du, monen, “Safau bè yóm Dwata là matayen ne safau bè yóm kóm klowil se kóm, là kô naw e tnagak kóm.” Tahu se, hlós le slomong ebè Bétél.
3Bè yó bè Bétél, wen sotu lumbuk tugod Dwata nô bè yó, ne mógów le ebè Ilaysa, mon le mò du, “Deng tngónem kô bè nim kemdaw ni nwa Dwata béléem yóm amohem?”
Bnalà Ilaysa se, monen, “El, tngónu se. Okóm bê tekuy abay sentulón.”
4Omin Ilaydya bud mon du mò ke Ilaysa, “Tebeli bè ni ne kóm, abay se bud hógów Dwata o etu bè Jiriku.”
Okóm yó balà Ilaysa du, monen, “Safau bè yóm Dwata là matayen ne safau bè yóm kóm klowil, là kô naw e tnagak kóm.” Tahu se, bud le hlós slomong ebè Jiriku.
5Bè yóm kkól le bè Jiriku, bud wen sotu lumbuk tugod Dwata nô bè yó, mógów le ebè Ilaysa, mon le mò du, “Deng tngónem kô bè nim kemdaw ni nwa Dwata béléem yóm amohem?”
Bnalà Ilaysa se, monen, “El, tngónu se. Okóm bê tekuy abay sentulón.”
6Omin Ilaydya bud mon du mò ke Ilaysa, “Tebeli bè ni ne, abay se bud hógów Dwata o etu bè Él Jurdan.”
Okóm yó bud balà Ilaysa du, monen, “Safau bè yóm Dwata là matayen, ne safau bè yóm kóm klowil se kóm, là kô naw e tnagak kóm.” Tahu se, bud le hlós slomong yóm lewu le.
7Wen limu folò kem tau lemwót bè lumbuk yó kem tugod Dwata yó koni mung kul, bede mdà le hlayuk yóm igò le mdà bè kilil Él Jurdan le Ilaydya lewu le Ilaysa. 8Omin Ilaydya mlus yóm nesen lafin tofi ta, ominen lemulun du ne fesen bè yóm Él Jurdan. Tódô mesgólól yóm él yó, ne mlan le lemen bè gónón mékéng tonok yóm lewu le.
9Bè yóm kkól le fi fatu, yó mon Ilaydya mò ke Ilaysa, “Gu laan Dwata là deng mit dou, tedu se nóyô hmoem do du?”
Bnalà Ilaysa se, monen, “Blayem do yóm tulusem anì ou mò tlesem.”
10Yó bud mon Ilaydya mò du, “Tey mgel yóm hnihem béléu yó. Song gónóm gmuta du nim hnihem ni ke tonem yóm kwit Dwata do. Okóm ke là tonem du, là se gutahem du.”
11Bè yóm igò le stulón mógów, tódô sut lem blóng le yóm klitun tók hono ofi dyol yó kem kudà hono ofi kmò le. Tódô senkóhen lu yóm lewu le, ne tódô mung bè klifus bong Ilaydya mbatun etta ebè longit. 12Bè yóm kton Ilaysa du yóm deng kbatun Ilaydya yó, botong lemangat, monen, “Ó Mà, ó Mà, tonu yó kem klitun tók yó kem tau Israél ne yó kem tau mit kudà demyol kul.” Okóm timbow lana lem matahen Ilaydya, botong kenséen bè gónón sóól yóm nes lafin ta gel leseken, botong ksidek kegnómen du.
13Ominen mulut yóm nes Ilaydya lafinen ta deng btang bè yóm kbatunen, ne semfulék ebè Él Jurdan, ne mdà bè yó bè kililen. 14Fes Ilaysa bè él yóm nes Ilaydya yó koni, hgelen udélen, monen, “Nô se Dwata du, yóm kun Dwata gónó mogot Ilaydya?” Tikóng deng kfesen yóm él, ominen tódô mesgólól se yóm él, ne tódô mifal etu fatu Ilaysa mlan lem yóm gónón mékéng tonok.
15Timbow ton yóm lumbuk yó kem tugod Dwata bè Jiriku yóm nmò Ilaysa, yó mon le, “Deng nô bè Ilaysa tulus Ilaydya.” Omin le semlong du, gotu le hegdufok ebè tonok bè soluhen. 16Yó mon le mò ke Ilaysa, “Ngem, mi se kem tau tóbóng lówóhem, wen limu folò bélê me alì kemgis. Ke móyói, hfebel te kul yóm amohem, déke deng nit Tulus Dwata hlayuk, ne déke deng wen bulul duhen ke datal deng gónón tmebel du.”
Bnalà Ilaysa se, monen, “Bê. Béem hógów lu.” 17Okóm tey kubug le ke Ilaysa, ngangen efet myak bè yóm tô là khógówen kul. Yó gónón mon du, “Yó ne, hewótem lu.” Tahu se, hewót le lu yóm limu folò kem tau yó. Botong tlu kdaw le tô hmebel ke Ilaydya, okóm là kô ton le du. 18Omin le bud semfulék ebè Ilaysa yóm igoen tolo nô bè Jiriku, ne yó mon Ilaysa mò kul, “Igou sem deng mon du mò kuy, bê ye mógów.”
Tanay hentaw ton nmò Ilaysa
19Bè yó bè Jiriku, gotu le mógów ebè Ilaysa yó kem tau malak bè yó, mon le mò du, “Ó Sér, bè ktonem du tey hyu yóm gónón mdà nim syudad ni, okóm tey sidek élen ne là tembas tonoken.”
20Yó mon Ilaysa mò kul, “Mit ye do edini tukung lomi, hensù ye kahì lemen.” Tahu se, mit le ebéléen. 21Omin Ilaysa mógów ebè yóm sfut él, ne sohulen elem él yóm kahì nwiten yó koni, yó udélen, “Ni se udél Dwata, Deng henbalingu él hyu nim él ni, là buden mit hatay ne, ne baling bud tembas tonoken.” 22Tahu se, tódô lenwóten bè yóm kdaw yó efet ni kmoen ni, baling hyu yóm él yó, lómón yóm deng mon Ilaysa.
23Bud kewót Ilaysa bè yó bè Jiriku mógów ebè Bétél. Bè yóm igoen mógów, wen kem ngà logi lemwót bè Jiriku semdekà du ne hmowon du, mon le, “Mdóhi bè ni kóm, tau lalang, mdóhi bè ni.” 24Omin Ilaysa beklil ne tonen lu, ne henmulaen lu hlanen bè boluy Dwata. Ominen wen lewu bér libun hewà gu lem dlag, ne botong fat folò lewu bè yó kem ngà logi yó koni nséken. 25Kewót Ilaysa bè yó, hlós etu bè Bulul Karmél, ne ominen bud semfulék ebè Samarya.
Là gomongen bè nili yóm tsaptér 3. Yó tulónen bè nim tsaptér ni yóm kbut kogot Juram ngà Ahab yóm benwu Israél. Bud tulónen bè ni snéen yóm kogot Juram benwu glem lem yóm sfolò lewu halay. Yó sotu tulónen yóm klolò Juram du yóm gel nmò Jirubuam bè yóm gel ktabahen bè dwata kéng.
Tonem bè ni snéen yóm kdê gel bayad Misa ke Ahab bè ket halay. Kogol yóm katay Ahab, natù Misa Juram ne yó se lanen là mayad. Okóm yó nmò Juram se kun mni tóbóng bè le Jihusafat ne yóm tau hol geta bè Idom.
Monen bè ni snéen yóm kundug yóm tlu kem tau hol geta ebè Muab, yó alì gfà le bè lan yóm alì kleeng le, abay se bè yóm klaen dù él ton le, yó se gónó le mebel ke Ilaysa mò tmóbóng kul.
Tikóng tngón yó kem tau Muab yóm kwen mundug kul gotu hetgama le yóm kdéen tau hulung mit sfatay tuha duhen kem ngà. Okóm là hegmò Dwata kul ne yó nmò yóm tau hol geta lemwót bè yóm là kegmò le tong gbeken hkekeb yóm ngaen logi twogu mò dsuen. Ya tey kebut kem tau Muab yó kem tau Israél. Omin le mulék ebè benwu le.
Currently Selected:
2 Bok Kem Tau Hol Geta 2: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
