2 Bok Kem Tau Hol Geta 25
25
Kegbà Jirusalim
1Duhen yó, bè yóm deng gesyómen halay kogot Sidikaya yóm benwu Juda, bè yóm gesfoloen kdaw bè yóm gesfoloen bulón, mundug ebè Jirusalim Nibukadnisar, mung du yóm kdê sendaluen ne gotu le kmamfù hilol Jirusalim, ne wen tonok bnuntud le hilol beng yóm syudad anì gkaf le. 2Ngang le kmamfù hilol yóm syudad yó efet sfolò sotu halay Sidikaya mogot yóm benwu yó.
3Tikóng bè yóm gesyómen kdaw bè yóm gfaten bulón, deng tey sidek ne kbel bitil bong lem yóm syudad yó, ne laen dù bud ken le, deng gotu. 4Ominen deng wen genbà yó kem sendalù Babilun bè beng yóm syudad yó. Lemwót bè yóm keslibut le du, yó gónó Sidikaya mlóy kifu, mung du yóm kdê sendaluen, mlan le bè gónó le mò hulu etu bè bak tikeb yóm lewu beng sdà hmilol Jirusalim, tô le mlóy etu bè Datal Jurdan.
5Okóm ktes le lu yó kem sendalù Babilun, ne gafit le Sidikaya bè datal Jiriku. Deng gotu sentebel yó kem sendaluen, ne deng le gotu sekla. 6Omin le kemfô ke Sidikaya yó kem sendalù Babilun, ne nwit le ebè benwu Ribla yóm benwu gónón nô yóm tau hol geta bè Babilun, ne bè yó gónón mékét du kukum. 7Gotu hnatay le yó kem ngà Sidikaya logi yóm igoen temngel kul. Omin le hsit mata Sidikaya ne nfét le kedina, nwit le ebè Babilun.
Kegbà le yóm Gónô Dwata
8Tikóng deng sfolò syóm halay kegen Nibukadnisar kmamal bè Babilun, bè yóm ghituhen kdaw bè yóm ghituhen bulón, gdek bè Jirusalim Nibusaradan yóm kmandér bè yó kem sendalù gel mentey ke Nibukadnisar yóm sotu genlalen. 9Gotu htemen yóm Gónô Dwata bè yó, ne yóm gónô bong yóm tau hol geta, ne kdê yó kem dumu gónô lem Jirusalim. Ket gónô lembang, gotu htemen. 10Gotu hegbaen yó kem sendalù mung du yóm beng hmilol Jirusalim. 11Gotu negef Nibusaradan lu yóm kdéen tau dù tebel lem yóm syudad yó, gomong yó kem tau deng gfi bè yóm tau hol geta bè Babilun. 12Okóm wen kem tau alì élél tebel yóm kmandér yó mò fen mentey yó kem gónó le mulu grép ne yó kem uma bè yó.
13Gotu lenusok yó kem sendalù Babilun yó kem hehek tembaga mdà bè yó, dalang se yóm klitun tembaga gónó le gel lemulón él, ne yóm len-gana tembaga bong bnoluy le Mohin, ne fen gotu nwit le ebè Babilun yó du kem tembaga nô du. 14Bud gotu nwit le snéen yó kem kuleng bè yó, ne kem fala kkólen bè yó kem gel hatay le solok dalang se yó kem ngom ken, ne kdê yó kem ngom tembaga wen mu le du bè yóm gel kedsù le ebè Dwata. 15Kkólen bè yó kem gónó le gel hemsù ofi, ne kem len-gana, ne kdê yó kem ngom nmò le bè tahu blówón ne bè tahu blówón bukay nô lem Gónô Dwata, gotu nwit Nibusaradan.
16Hóyów tô là gbekem kmilu kul yó kem tembaga nô bè yó kem lewu hehek mdà bè yó, ne nô bè yóm len-gana bong bnoluy le Mohin, ne yóm tembaga nô bè yóm klitun gel lemulón él, yóm kdê deng tehe hmò Selumun mò ngom lem Gónô Dwata. 17Yóm kegeta yóm ket sotu hehek, botong tô syóm mitru, ne mukas lewu mitru kegeta yóm tembaga nô bè tukóen, ne bud wen tembaga lébéd hilolen mò klóónen, lómón kmoen bungu koyu pumigrinit.
18Negef yóm kmandér yó snéen Siraya yóm geta bè yó kem tau gel blóng ebè Dwata, ne Sifanaya yóm geta tmodol bè Siraya, ne yóm tlu gel mentey bè bak tikeb yóm Gónô Dwata. 19Negefen snéen yóm genlal bè yó kem sendalù Juda tolo hebnos lem syudad, dalang se yóm limu kem tau gónó tau hol geta gel hmungol hlau, ne yóm tau gel mogot boluy yó kem tau mò mung bè sendalù, ne nem folò kem dumu tau wen boluy le gomong negefen. 20Gotu negef Nibusaradan lu, ne nwiten lu ebè yóm tau hol geta bè Babilun nô bè Ribla. 21Gotu hfatay tau hol geta lu bè Ribla bè tonok Hamat. Duhen yó gotu negef le yó kem tau Juda, nwit le lu mayuk bè yóm kul benwu.
Kbaling Gidalaya gubérnor bè Juda
22Ominen wen tau nélék Nibukadnisar mò gubérnor bè yó kem dù tau tebel bè Juda, duhen Gidalaya ngà Ahikam témê Syafan. 23Deng wen kem kmandér bè yó kem sendalù Juda deng hebnos mung kul kem sendalù le. Tikóng gungol le yóm deng kéléken ke Gidalaya mò gubérnor bè Juda yóm tau hol geta bè Babilun, gotu le mógów ebè Gidalaya bè Mispa, mung kul yó kem tau nalak le. Yó boluy le Ismaél ngà Nitanaya, ne Juhanan ngà Kariya, ne Siraya ngà Tanhumét yóm tau lemwót bè Nitufa, ne Jasanaya ngà yóm sotu tau lemwót bè Maka, ne kdê yó kem tau nalak le, gotu mung kul.
24Smafà bélê le Gidalaya, monen, “Bê ye abay hlikò bè yó kem genlal bè Babilun. Henek ye lem nim benwu ni, ne mogot ye bè yóm tau hol geta bè Babilun. Ke yó se nmò ye, laen kô dù hemen ye.” 25Okóm bè yóm ghituhen bulón bè yóm halay yó, mógów ebè Mispa Ismaél yóm ngà Nitanaya témê Ilisama, tbong tau hol geta se kun, ne wen sfolò tauhen mung du. Hnatay le Gidalaya, gomong hnatay le yóm kdê tau nô béléen, kem tau Juda ne kem tau Babilun.
26Lemwót bè yóm ni, yó gónó le gotu mlóy ebè Idyip yóm kdéen tau Israél, kem tau leneken kkólen bè lebangen, gomong yó kem kmandér le. Knikò le yóm angat nmò le bélê le yó kem sendalù Babilun.
Keklung Dwata ke Jihuyakin yóm tau gónón hemlan du yóm tehe fasaden ke Dabid
27Timbow bè yóm deng getluhen folò hitu halay kegen Jihuyakin blanggù bè Babilun, yó bud tles mogot yóm benwu Babilun, duhen Ibil-mirudak. Tey tilob knawahen ebè Jihuyakin se kun, ne bè yóm gewuhen folò hitu kdaw bè yóm gesfoloen lewu bulón, botong hewaen lem blanggù Jihuyakin. 28Tey tilob gel kudélen ebè Jihuyakin, bong nadaten senta yó kem dumu tau hol geta deng blanggù bè Babilun. 29Duhen yó, gbek Jihuyakin temles du yóm kun nes blanggù gel lesek. Efet katayen, ket kdawen gel mung mken bè yóm tau hol geta. 30Bè yóm klawihen mowil, lemwót yóm tau hol geta bè Babilun yó, wen filak gel blayen du mò blihen yóm gónón élél.
Currently Selected:
2 Bok Kem Tau Hol Geta 25: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
