1 Tutul Israél 10
10
Là gomongen bè nili yóm tsaptér 1 efet kól bè tsaptér 9. Yó tulónen bè ni kem tsaptér ni, hono boluy tau ne boluy yó kem lugod le lenwóten bè Adam efet kól bè Sól. Bud tulónen bè ni snéen boluy yó kem tau tehe negef le deng bud mulék ebè benwu le bè Juda, ne boluy yó kem tau blóng ebè Dwata, ne boluy yó kem sfu Libay tehe negef le deng bud semfulék ebè benwu le.
Yóm katay Sol
(1 Samwél 31)
1Yó nmò yó kem Flistin, bud nundug le yó kem sendalù Israél, ne gotu le mlóy yó kem sendalù Israél. Tey dê bélê le matay bè yóm kesfatay le bè Bulul Gilbuwa. 2Ktes yó kem sendalù Flistin le Sol ne yó kem ngaen logi, ne hnatay le yóm tlu kem ngà Sol logi, duhen le Junatan ne Abinadab ne Malkisuwa. 3Tey kesfatay le Sol yó kem Flistin, ne gafit le Sol yó kem tau mit boho ne gentì le ne tey halien. 4Yó udél Sol ebè yóm tau gel mit klungen, monen, “Dilotem sudengem, tnibóhem ou anì mataye. Là hyuhen ke yó kem tau là temngón ke Dwata yóó yóm hmatay dou, déke sendekà le ou.” Okóm là móyóen yóm tau gel mit klungen yó, likò mò du. Yó gónó Sol tódô dmilot yóm kun sudeng ne hbaken ebè kfuhen ominen hmeeb du. 5Tikóng ton yóm tau mit klung yóm deng katay Sol, bud hbaken ebè kfuhen se yóm kun sudeng, ne ominen tódô hmeeb du. 6Duhen yó, bè yóm kdaw yó segeng le matay le Sol ne yóm tlu kem ngaen logi. Ne laen dù bè yó kem semfu gu béléen bud mogot benwu.
7Timbow ton yó kem tau Israél menwu bè Datal Jisriil yóm gotu klóy yó kem sendalù Israél, ne yóm deng katay Sol ne yó kem ngaen logi, tódô le gotu mlóy se kul, tebel le yó kem benwu gónó le nô. Yó gónóm mon, gotu nled yó kem Flistin yó kem benwu le ne hlós le nô du.
8Hayahen bè yó, lemwót yó kem Flistin mógów le elem blóng yó kem sendalù Israél deng matay, sulék nwa le yó kem nes le ne yó kem ngom le sfatay. Ne ton le deng matay Sol ne yó kem ngaen logi, masà le bè yó ta Bulul Gilbuwa. 9Duhen yó, nlus le onit Sol ne kenleng le liholen. Omin le hógów kem tau ebè klamang benwu Flistin anì heglalag le bè gónô yó kem dwata le ne bè yó kem dumu le Flistin yóm deng katay Sol. 10Lemwót yóm onit Sol, sù le bè gónô yóm kul dwata, ne yóm kuluhen sdang le bè beng yóm gónô sotu dwata le boluyen Dagun.
11Okóm tikóng gungol yó kem tau bè Jabis-gilyad yóm deng nmò le bè Sol yó kem Flistin, 12lemwót yó kem sendalù le, tódô le lemwót anì na le e nwa lówó Sol ne lówó yó kem ngaen logi, ne nwit le mulék ebè Jabis. Ne lebeng le kem tiol le laan yóm koyu ok bè Jabis, ne hitu kdaw le mò du fasting.#10:12 Yó kem tau lemwót bè Jabis-gilyad yó, lu se yó kem tau tehe lenwà Sol bè yó kem tau Amunayt. Yóm kehewà Sol kul yó, yó se yóm hol tanay kwit Sol gida bè yóm kogoten benwu. Tonem bè 1 Samwél 11. Bè yóm kholo kwa le du yóm lówó Sol ne yó kem ngaen, tódô hamà le klowil le, botong kadat le ke Sol.
13Duhen yó, matay Sol lanen là mimón ke Dwata. Là kô nimónen du yóm hlau Dwata du, lelen mom mógów ebè yóm libun mton bù, snólóken béléen ke tedu tô nmoen, 14là kóen dog smólók bè Dwata. Yó se gónó Dwata hfatay du, ne bud hogoten ke Dabid ngà Jisi yóm benwu nogoten.
Currently Selected:
1 Tutul Israél 10: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
