2 Bok Kem Tau Hol Geta 24
24
1Bè yóm tolo kogot Jihuyakim yóm benwu Juda, lemwót Nibukadnisar bè Babilun nleden yóm benwu Juda, ne botong tlu halay Jihuyakim mayad du yóm hbayaden kul, ominen matù du, là buden móyô mayad du yóm gel hbayaden kul. 2Yó nmò Dwata, hwiten yó kem sendalù Babilun ne kem sendalù Aramiyan ne kem sendalù Muabayt ne kem sendalù Amunayt mò gembà yóm benwu Juda, hol lómón yóm tehe eles htulón Dwata yó kem tehe tugoden ekni, duhen yó kem tau tóbóng lówóhen. 3Yó gónón gefet bè Juda nim glumfak le ni lemwót bè dók Dwata. Yó kóyô Dwata ke kóhen Juda bè soluhen lemwót bè yóm kdê salà deng tehe nmò Manasi, 4ne yóm tehe khatay Manasi yó kem tau laen dù salà le, botong lenngeben Jirusalim yóm litô le. Là kô gbek Dwata hmifót du yóm nmoen yó.
5Yó kem dumu nmò Jihuyakim bè kogoten benwu ne yó kem dumu gel nmoen, deng gotu snulat bè yóm bok Tutul yó kem Tau Geta bè Juda. 6Tikóng matay Jihuyakim, yó bud tles tau hol geta yóm ngaen logi boluyen Jihuyakin. 7Yóm tau hol geta bè Idyip, là kóen bud mundug ebè Juda, abay se deng gotu gled yóm tau hol geta bè Babilun yó kem benwu snakufen lenwóten bè Él Idyip efet kól etu bè Él Yufratis.
Kogot Jihuyakin yóm benwu Juda
8Yóm kbut Jihuyakin mogot yóm benwu Juda hanà sfolò wolu he halayen, ne tek tlu bulónen mogot benwu, ne bè Jirusalim gónón nô. Yó boluy yéen, Nihusta yóm ngà Ilnatan lemwót bè Jirusalim. 9Yó kem gel nmò Jihuyakin, tey sidek bè kton Dwata du, senged bè yóm tehe nmò maen Jihuyakim.
10Yóm tolo kogoten benwu Jihuyakin, lemwót yó kem sendalù Nibukadnisar bè Babilun, mundug le ebè Jirusalim ne kmamfù le hilolen. 11Bè yóm igò le tolo kmamfù hilolen, gdek bè Jirusalim Nibukadnisar. 12Omin Jihuyakin heglaan bè Nibukadnisar, mung du yó kem tau gónón gel hmungol hlau, ne yó kem sfu tau hol geta, ne yó kem genlalen, ne yéen, gotu le heglaan bè yóm tau hol geta bè Babilun.
Bè yóm gwoluhen halay kkamal Nibukadnisar bè Babilun, negefen Jihuyakin ne bnangguen ditu bè Babilun. 13Gotu nwit Nibukadnisar yóm kdéen kimu legen alì mebtes nô lem Gónô Dwata ne lem gónô bong yóm tau hol geta. Gotu bentuen snéen yóm kdéen kimu tahu blówón tehe sù Selumun yóm tau hol geta bè Israél, lem yóm Gónô Dwata, hol lómón yóm tehe mon Dwata. 14Botong sfolò libu tau negef Nibukadnisar gu bè Jirusalim. Kdê kem ngà tau hol geta, ne yó kem sendalù alì hulung sfatay, kem tau wen kenhulung tdok le bè koyu, ne kem tau msól gotu negefen. Tek són tebel bè Jirusalim, són yó kem tau alì élél.
15Negef Nibukadnisar Jihuyakin ebè Babilun, mung du yéen, ne kem yehenen, ne kem genlalen, ne kdê yó kem tau wen boluy le bè Jirusalim. 16Botong hitu libu kem tau hulung sfatay negefen, ne lemibu kem tau wen kenhulung tdok le nô kihu kay nmò le, ne kem tau msól, gotu negefen lu ebè Babilun, hono kem tau kemgis deng geblà mung bè gida. 17Omin yóm tau hol geta bè Babilun mélék ke Manataya mà dì Jihuyakin, mò tles Jihuyakin tau hol geta bè Juda. Tenlesen boluy Manataya, tlesen du Sidikaya.
Kogot Sidikaya yóm benwu Juda
18Yóm kbut Sidikaya mogot yóm benwu Juda deng lewu folò sotu ne halayen, ne yó kegenen mogot benwu sfolò sotu halay, ne bè Jirusalim gónón nô. Yó boluy yéen, Hamutal ngà Jirimaya lemwót bè Libna. 19Okóm yóm Sidikaya, hono sidek yóm gel nmoen bè kton Dwata du, senged bè nmò Jihuyakim. 20Duhen yó, lemwót bè yóm alì kebut Dwata kul yó kem tau bè Jirusalim dalang se yó kem tau bè Juda, gotu kóhen lu bè soluhen, ne gotu hegefen lu mayuk.
Omin Sidikaya matù yóm tau hol geta bè Babilun, là buden móyô hogot béléen.
Currently Selected:
2 Bok Kem Tau Hol Geta 24: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
