2 Bok Kem Tau Hol Geta 23

Kwit Jusaya kul semfulék ebè Dwata yó kem tauhen

1Omin yóm tau hol geta gotu htaba yóm kdéen tmuha bè Juda ne bè Jirusalim anì gotu le stifun ebéléen. 2Ominen mógów ebè Gónô Dwata, mung du yóm kdéen tau bè Juda ne kdéen tau menwu bè Jirusalim, kem tau blóng ebè Dwata, ne kem tugod Dwata, ne tódô kdéen tau kewóten bè leneken kkólen bè lebangen gotu mung du. Ominen hgel semfala du bélê le yóm bok lomi ton le lem Gónô Dwata, yóm bok gónóhen nô yóm tehe senfasad le Dwata yóm bnoluy le Bok Fasad. 3Lemwót yóm tau hol geta, mdà klohok yóm sotu hehek bè Gónô Dwata. Ne bè yó bè solu Dwata bud hnomihen yóm tehe senfasad le Dwata yó kem tau Israél ekni. Fasaden ke Dwata yóm hol kehewóten du lem but blututen yóm kimónen du yó kem hlauhen kul, dalang se yó kem hloloen kul. Fasaden ke Dwata yóm klolò le du yóm deng snulat lem yóm Bok Fasad. Ominen kdê yó kem tau, gotu le fmasad se kul bè yóm hol kimón le du yóm kdê deng nô lemen yóm bok yó.

4Omin Jusaya mdók kul le Hilkaya yóm geta bè yó kem tau gel blóng ebè Dwata, ne yó kem dumu tau gel blóng ebè Dwata tmodol bè Hilkaya, ne yó kem dumu tau gel blóng ebè Dwata fen gel mentey bè bak tikeb yóm Gónô Dwata. Yó dóken kul, gotu nwit le hwà gu lem yóm Gónô Dwata yóm kdê ngom wen muhen bè yóm gel ktaba le ebè Baal ne ebè Asira, ne bè kdê yó kem gel ton le nô bè longit gel tnaba le. Yóm kdéen yó, gotu htemen lu bè lewà Jirusalim bè Datal Kidron, ne fen nwiten ebè Bétél yó dum kohù le. 5Gotu hdóhen lu snéen yó kem tau gel blóng le ebè yó kem dwata kéng bè yó bè Juda ne bè Jirusalim, kem tau deng tehe nélék yó kem gna tau hol geta bè Juda. Ni se yó kem tau gel mtem insinsu ebè Baal ne ebè kdaw ne ebè bulón ne ebè yó kem blotik, ne ebè kdê yó kem dumu gel ton le bè longit. 6Kóhen bè yó snéen lem Gónô Dwata yóm lennged yóm dwata kéng boluyen Asira, ne ntemen ditu bè lewà Jirusalim bè Datal Kidron. Ne gotu lenusoken efet gotu muna, ne sohulen bè yóm gónó le gel lembeng yó kem tau hkawang. 7Hegbaen snéen yó kem dfél gónó le nô yó kem logi ne kem libun hdóyón lem Gónô Dwata. Bud bè yóm dfél yó snéen gónó le mò du kem libun mewel nes Asira yóm dwata libun le.

8Yó bud nmò Jusaya, gotu bud huléken lu ebè Jirusalim yóm kdéen tau gel blóng le ebè Dwata nô bè yó kem benwu lemnek snakuf Juda. Gholuhen yó kem gónó le gel tmaba dwata kéng ne yóm gónó le gel mtem insinsu ebélê le bè benwu Giba fi bwak efet kól etu bè benwu Birsiba fi leged. Bud hegbaen snéen yó kem gónó le gel tmaba ebè dwata kéng bè bak tikeb Juswa yóm gubérnor bè Jirusalim. Nim tikeb ni, nô bè fi iwóng yóm tikeb Jirusalim gónó le gel husek yó kem tau. 9Yó kem tau gel blóng ebè Dwata gel demsù bè yó kem dwata kéng, là bud hedsù Jusaya kul bè yó bè Gónô Dwata bè Jirusalim, okóm olon hmung kul mken yóm mambang laen dù bulung henoken bè yó kem dumu le gel blóng ebè Dwata.

10Deng gholu Jusaya snéen yóm gónó gel demsù bè Tufét bè Datal Bin-hinum anì laen dù bud tau demsù kem ngà le logi duhen ke ngà le libun bè yó ebè yóm dwata boluyen Molék. 11Gotu kóhen yó kem lennged kudà deng hfun le ebè kdaw yó kem gna tau hol geta bè Juda, yóm deng hdà le moni bè yóm gónó le gel husek elem Gónô Dwata, bud moni bè yóm dfél gónóhen mò nmò Natan-mélék yóm tau bong glalen bè yóm tau hol geta. Dalang se yó kem klitun tók deng hfun le ebè kdaw gotu htemen.

12Bud hegbà Jusaya snéen yó kem gónó gel demsù ebè yó kem dwata kéng deng hdà le te ketef yóm gónô bong yó kem gna tau hol geta bè Juda, ta yóm dfél tehe gónóhen nô Ahas. Bud hegbaen snéen yó kem gónó le gel demsù ebè dwata kéng tehe hdà Manasi bè yóm lewu lósól bè Gónô Dwata. Gotu lenusoken lu, ne sohulen etu bè Datal Kidron. 13Bud gholu Jusaya snéen yóm gónó le gel tmaba ebè dwata kéng fi dmata kdaw Jirusalim ne fi leged yóm bulul boluyen Bulul Hono Sidek. Bè yóm bulul yó, gónó Selumun bè Israél tehe hemdà yóm gónô tmaba ebè yó kem dwata kéng alì kenbê, duhen Astarti yóm dwata libun yó kem tau Sidon ne Kimus yóm dwata kem tau Muab ne Molék yóm dwata yó kem tau Amunayt, hono dwata kéng alì kenbê. 14Gotu lenusoken yó kem hehek botu ilô yó kem dwata le bè yó, ne bud hofoken yó kem hehek yóm dwata libun boluyen Asira. Ominen gholu du yóm benwu yó mlan bè kbuléten bè yó yóm tiol yó kem tau deng matay.#23:14 Bè yóm kbulét Jusaya tiol yó kem tau matay bè yóm gónó gel demsù, yó se gónón e dohò yóm udél yóm tehe tugod Dwata lemwót bè Juda, yóm deng snulat le bè Tanay Bok Yó Kem Tau Hol Geta 13:26-32

15Bud hnugón Jusaya snéen yóm gónó le gel demsù bè Bétél, yóm tehe hdà Jirubuam ngà Nibat, yóm tau tehe mit kul tmaba ebè dwata kéng yó kem tau Israél. Gotu lenusoken yó kem botuhen efet gotu meblibù, ominen mtem du, gomong yóm hehek ilô Asira. 16Yóm igò Jusaya temngel gu hmilol, wen tonen kem lebeng bè bilil. Ominen hwa yó kem tiol yó kem tau deng lebeng bè yó, ne htemen bè yóm gónó gel demsù bè Bétél anì gholu. Nim nmoen ni, deng eles htugod Dwata yóm sotu tauhen ekni bè yóm tehe kwen fista, yóm igò Jirubuam tehe mdà bè kilil yóm gónó demsù bè dwata kéng. 17Omin Jusaya smólók, “Lebeng du tuu?”

Yó balà le du yó kem tau bè yóm syudad yó, mon le, “Lebeng yóm sotu tau tugod Dwata lemwót bè Juda ekni, ne deng tehe eles tulónen nim deng nmoem bè nim gónó demsù bè ni bè Bétél.”

18Yó bud udél Jusaya, monen, “Bayà ye ne, bê ye dog nwa kem tiolen.” Tahu se, tódô bayà le, dalang se yóm tiol yóm tugod Dwata deng tuha lemwót bè Samarya.

19Omin Jusaya gotu gembà yó kem gónó le gel demsù ebè dwata kéng bè yóm kdéen benwu lemnek bè Samarya, lómón yóm deng nmoen bè Bétél. Ni kem genbaen ni, ni se yó kem deng hdà yó kem gna tau hol geta bè Israél gónón alì lembut kul Dwata. 20Yó kem tau gel blóng ebè dwata kéng, gotu hnatay Jusaya lu ta yó kem gónó le gel demsù, ne ntemen ta yó kem gónó gel demsù yó, yó kem tiol le anì gholu. Ominen mulék ebè Jirusalim.

Kehligal Jusaya yóm Kdaw Khius

21Yó hlolò Jusaya yóm kdéen tau, monen, “Hol hnigal ye yóm Kdaw Khius mò gónó ye madat yóm sana kuy Dwata hol gónó mogot. Lolò ye yóm deng snulat bè yóm Bok Fasad.” 22Nbuten bè yóm kdaw kwen kem tau kmukum bè Israél, duhen bè yóm kdaw kwen kem tau hol geta bè Israél ne kwen kem tau hol geta bè Juda, laen dù deng bud hmigal du he yóm Kdaw Khius. 23Okóm bè yóm gesfoloen wolu halay kyón Jusaya, hnigal le yóm Kdaw Khius bè Jirusalim.

24Yó bud nmò Jusaya bè Jirusalim ne bè klamang Juda, gotu kóhen yóm kdéen tau mton bù, kem tau demwata, ne yó kem dwata lennged gel sù le lem gónô le ne yó kem dumu dwata lennged gónó le tmaba, gotu kóhen lu. Yó gónóhen mò du nim ni lanen mimón yóm hlau deng snulat lem yóm bok ton Hilkaya yóm tau blóng ebè Dwata lem Gónô Dwata. 25Laen dù deng tau hol geta he ke mkél ke Jusaya yóm kehewóten du lem but blututen ne lem hendemen ne khotuhen gelen semfulék ebè Dwata. Gotu nimónen yóm kdê hlau Musis. Ne efet yóm kmoen ni, laen dù bud tau hol geta mkél du.

26Balù yó he, sana tolo tey kebut Dwata yóm benwu Juda lemwót bè yóm sidek tehe alì nmò Manasi, ne là kô tenfloken du yóm kebuten yó. 27Yakà deng mon Dwata du, “Angat genbau yóm benwu Juda lómón kegbau yóm benwu Israél. Angat kóhu lu bè soluhu. Angat kenbéu Jirusalim yóm syudad deng néléku, ne bud kenbéu snéen yóm Gónô deng monu mò gónó le madat yóm dou boluy.”

28Duhen yó, yóm dumu tutul bè kogot Jusaya benwu, ne kdê yó kem deng nmoen, deng gotu snulat bè yóm bok Tutul yó kem Tau Geta bè Juda.

29Yóm tolo kegeta Jusaya, lemwót Faro Niku yóm tau hol geta bè Idyip, mógów ebè Él Yufratis nan e tnóbóng yóm tau hol geta bè Asirya. Kewót Jusaya bè yó se kun, mung du yó kem sendaluen, nundugen lu. Okóm hnatay Faro Niku Jusaya bè yóm keston le bè Megidu. 30Lulón yó kem sendaluen bè klitun tók lówó Jusaya, nwit le lemwót gu bè Megidu kól bè Jirusalim, ne lebeng le bè yóm kun gónó lebeng. Omin kem tau temwél hnolo yóm ngà Jusaya logi boluyen Jihuhas mò tau hol geta bélê le tles maen.

Kogot Jihuhas yóm benwu Juda

31Yóm kogot Jihuhas benwu deng lewu folò tlu ne halayen, ne tek tlu bulónen kmamal bè Juda, ne bè Jirusalim gónón nô. Yó boluy yéen, Hamutal ngà yóm Jirimaya lemwót bè Libna. 32Tey sidek kton Dwata du yó kem gel nmoen, senged bè yóm tehe kul nmò yó kem tehe fuen.

33Heblanggù Faro Niku Jihuhas bè Ribla bè tonok Hamat anì là buden mogot benwu bè yóm knóen bè Jirusalim. Yó hbayad Faro Niku yóm benwu Juda, botong tlu libu fat latu kilu blówón bukay, ne tlu folò fat kilu tahu blówón.#23:33 Yó gónó Faro Niku heblanggù ke Jihuhas lemwót bè yóm tehe kesfohon le mà Jihuhas Faro Niku. Yó se buten yóm gónón alì bong hbayad Faro Niku yó kem tau bè Juda.Lemwót Faro Niku, nmoen Ilyakim yóm sotu ngà Jusaya logi mò tau hol geta bè Juda mò tles Jusaya yóm maen. Okóm tenlesen boluy Ilyakim, tlesen du Jihuyakim. Fen hdóhen Jihuhas, hwiten ebè Idyip ne ditu gónón matay. 34Lemwót Faro Niku, nmoen Ilyakim yóm sotu ngà Jusaya logi mò tau hol geta bè Juda mò tles Jusaya yóm maen. Okóm tenlesen boluy Ilyakim, tlesen du Jihuyakim. Fen hdóhen Jihuhas, hwiten ebè Idyip ne ditu gónón matay.

Kogot Jihuyakim yóm benwu Juda

35Yó nmò Jihuyakim, hbayaden lu bwis yó kem tau bè Juda, hlanen bè yóm kbong yóm gel ton le. Yó muhen du yóm hbayaden kul, mò blayen ke Faro Niku.

36Yóm kbut Jihuyakim mogot benwu deng lewu folò limu ne halayen. Ne yó kegenen nô bè Jirusalim bè yóm kogoten benwu, sfolò sotu halay. Yó boluy yéen, Sibida ngà Pidaya lemwót bè Ruma. 37Yó kem gel nmoen, tey sidek bè kton Dwata du, senged bè yóm tehe kul nmò yó kem tehe fuen.

Currently Selected:

2 Bok Kem Tau Hol Geta 23: tbl

Highlight

Copy

Compare