2 Bok Kem Tau Hol Geta 19
19
Kni Hisikaya tóbóng bè Dwata
1Timbow gungol Hisikaya yóm tulón le yó, tódô kenséen nesen botong ksidek kegnómen du, ne lemsek nes sakù ne mógów ebè Gónô Dwata, mni bè Dwata bè yó. 2Ominen hógów kul le Ilyakim yóm tau mogot yóm gónô bongen, ne Sibna yóm fen gel smulat bélê le bè kukum, ne yó kem tmuha gel malak yó kem tau gel blóng ebè Dwata, bede hono le mnes sakù, hógówen lu ebè Isaya yóm tugod Dwata ngà Amus. 3Yó htulónen kul bè Isaya, mon le, “Ni se udél Hisikaya, monen, ‘Ni se yóm kdaw tekuy glayam, kdaw le hemnê tekuy, ne kdaw le hemyak tekuy. Hol tekuy mkél bè yóm ngà móyón sut, okóm là gbek yéen hesut du. 4Yóm tau hol geta bè Asirya, deng wen kmandér dóken mò hemnê yóm Dwata là matayen. Déke deng gungol yóm sana kóm Dwata hol gónó mogot yóm udélen yó, ne angat tnafaken bè yóm udélen. Holi mni kut bè Dwata bè nim kdê tekuy dù tebel.’ ”
5Timbow deng ktulón le du ke Isaya yóm udél hwit Hisikaya kul yó, 6bnalà Isaya, monen, “Tulón ye yóm tau hol geta bélê ye, mon ye, ‘Ni se udél Dwata ebéléem, monen mò kóm, Béi abay hlikò bè yóm udél le hemnê do yó kem genlal yóm tau hol geta bè Asirya. 7Ngem, angat wen nmou béléen. Wen udél hfungolu du mò gónón beklil semfulék ebè yóm kun benwu. Ne bè kun benwu gónów hfatay du mlan bè sudeng.’ ”
8Bong bè yóm kmandér lemwót bè Asirya nô bè Jirusalim yó, bè yóm kungolen du yóm deng ktebel Sinakirib yóm benwu Lakis ne deng mit sgida bè Libna, yó gónón lemwót se kun, tnagaken Jirusalim, kemtes etu bè Libna. 9Là kóen legen bè yó, wen tmulón du ke Sinakirib yóm móyón kegdek Tirhaka yóm tau hol geta bè Ityupya, anì nan e mit sgida béléen. Gu laan Sinakirib là deng lemwót mit sgida bè yóm tau hol geta yó, bud wen kem tau dóken ebè Hisikaya. Wen sulat hwiten kul, monen, 10“Tulón ye ke Hisikaya bè Juda, mon ye, Béem hegtondo knóem bè yóm Dwata tendo snaligem, yóm deng fmasad du kóm yóm là angat knóen lem hólól yóm tau hol geta bè Asirya yóm syudad Jirusalim. 11Deng hol kóm klingu se mungol du yóm deng nmò yóm tau hol geta bè Asirya bè kdê benwu, gotu sulék genbaen lu. Ke yó se gel nmoen, angat ye gewà se kuy kô? Là. 12Bè yóm tehe keglà yó kem tehe fù me yóm benwu Gusan, ne Haran, ne Réséf, ne yó kem tau Édén nô bè Til-asar, là kô gbek kem dwata lennged le lemwà kul. 13Wen gmoen kô yóm tau hol geta bè Hamat, ne yóm tau hol geta bè Arpad? Nô se kun du yóm tau hol geta bè Sifarbim, ne yóm tau hol geta bè Hina, ne yóm tau hol geta bè Iba?” Yó se nô lem yóm sulat hwiten ebè Hisikaya yóm tau hol geta bè Asirya.
14Tikóng deng kól bè Hisikaya yóm sulat nwit le yó koni, ominen semfala du. Tódô mógów ebè Gónô Dwata, ne nbólen bè yó bè solu Dwata yóm sulat yó. 15Mni ebè Dwata Hisikaya, monen, “Ó Dwata yóm Dwata yó kem tau Israél, yóm myón kmamal lem blóng yó kem hógówem boluyen sirubim. Tek són uu se yóm Dwata mogot yó kem kdéen benwu talak tonok. Tek són uu se tehe mò longit ne tonok. 16Hol hnungolem o, Dwata, hol hnungolem nim hnihu. Temngeli gu dyó bè longit, tenngelem nim sulat ni. Hol hnungolem yóm kdê udél Sinakirib hemnê kóm yóm Dwata là matayen.
17Tahu se, Dwata, deng gotu genbà yó kem tau hol geta bè Asirya yó kem benwu tulónen yó koni, 18ne deng gotu tudà le elem ofi yó kem dwata lennged le, ne gotu mlób kem dwata là tahu le, dwata koyu ne dwata botu nmò tdok tau. 19Duhen ni, Dwata yóm sana kum Dwata hol gónó mogot, mnihe béléem, hol lenwaem mi lem hólól yóm tau hol geta bè Asirya anì yó, gotu tngón yó kem kdéen benwu nogot tau talak tonok, tek sónen uu se Dwata yóm hol gónó mogot.”
Eles ktulón Isaya yóm là keglà Juda
20Ominen bud wen sulat hwit Isaya ngà Amus ebè Hisikaya, monen, “Ni se udél hwit Dwata yóm Dwata yó kem tau Israél. Yó monen mò kóm, Deng gungolu yóm knihem béléu gbak bè Sinakirib yóm tau hol geta bè Asirya.
21Ne ni se udélu eta Sinakirib.
‘Tey kehnê le kóm ne kkuli le kóm yó kem tau bè Jirusalim.
Tey kehwó le kóm yóm igoem mlóy.
22Tau du de yóm tendo hennéem ne sendekaem?
Tmau du de yóm gónóm hgel udélem ne gónóm heklabak?
Kaem ou se yóm Dwata alì mólós bè Israél.
23Deng hennéem ou hlanem bè yó kem tau hógówem.
Yó deng monem, “Lemwót bè yóm tey kwen klitun tóku,
botong gutahu ta tfusù yó kem bulul, efete kól bè hol gónón sóól yóm dlag Libanun.
Deng hofoku yó kem koyu sidar alì tahà bè yó, dalang se yóm koyu siprus alì megélék.
Denge mdà ditu hol lemen, ne denge kól bè yóm gónón alì mfól dlagen.
24Deng wen kem kokol hokolu bè yó kem tólóng benwu,
ne ninumu yóm tey él tikaw lemwót bè yó.
Balù yó kem él bong bè Idyip, gbeku hemseng du anì gifal yó kem sendaluu.”
25Ilóem là deng gungolem du kô?’ mon Dwata,
‘kaem ou se Dwata yóm tehe matul du yóm deng nmoem yó.
Tehe yu ne ekni eles katulu du yóm kdéen ni,
ne ni se deng kehdohou du, duhen yóm gotu kehegbau du kóm
yó kem syudad mbegel beng hilolen.
26Yó se gónón laen dù gel le yó kem tau lemen,
ya tey sidek klikò le, laen kô dù gmò le.
Hol le mkél bè hulu, duhen ke bnes lomi tmowok, mahil le menes,
duhen ke kluon tmowok ta ketef, ke deng kinì kdaw tey le mahil menes.
27Okóm tngónu uu.
Tngónu gónóhem gu ne gónóhem e solu ne yóm kdê nmoem.
Tngónu se yóm alì keklitem do.
28Deng gel gungolu yóm alì keklitem do ne yóm alì keheklabakem.
Yó gónóhu gmalung kóm ne kmakang kóm.
Hesfuléku u ebè yóm lan tehe loloem.’ ”
29Omin Isaya mon du mò ke Hisikaya, “Ni mò ilóem du yóm kofin Dwata yóm syudad Jirusalim bè yóm tau hol geta bè Asirya. Bè nim halay ni, són ken ye yóm hulu tódô tmowok. Ominen halay hulin, són ken ye yóm hulu bud huli tmowok bè yó. Okóm bè yóm getluhen halay, angat wen hulu ye, ne angat wen nuta ye. Mulu ye grép, ne angat gken ye bunguhen. 30Yó kem dù tau mowil tebel bè Juda, hol lómón angat kmò le hulu. Tey angat bud kdolil le lem yóm tonok le, ne angat tey bud kbungu le. 31Yakà yó kem dù tau nô bè Jirusalim ne bè Bulul Sayun, angat tey kból le bè klamangen. Yóm kkinì nawa Dwata hol hemdohò mò du nim ni, yóm Dwata alì gembek.
32Yó gónóm mon, ni se bud udél Dwata gbak ebè yóm tau hol geta bè Asirya, Là kóen na a gusek elem Jirusalim, ne là gtien du bè yó, yó kem hanaken. Là se kô le na a gehloni bè bak tikeben yó kem sendaluen mogot klung, duhen ke tô le muntud tonok hilol bengen mò tô lan le e lemen. 33Angat tódô bud beklil semfulék ebè yóm kun benwu, loloen yóm sana lanen. Là kóen na a gusek elem nim syudad ni. Ou se Dwata nim mudél ni. 34Nofinu yóm syudad ni mò gónóhu megdóyón ne mò gónóhu hemdohò yóm tehe fasadu ke Dabid yóm tau tóbóng lówóhu.”
35Bè yóm kifu yó, wen hógów Dwata gu bè longit ebè kamfù yó kem tau Asirya, botong lematu wolu folò limu libuhen tau hnatayen. Bè yóm kebtik le hlafus yó kem sendalù Asirya dù mowil, ton le deng tódô hgasà tau matay bè klamang kamfù le. 36Kewót Sinakirib bè yó, mulék ebè benwuhen bè Asirya, ne bè yó bè syudad Ninibi gónón na nô. 37Sotu kdaw, yóm igò Sinakirib tolo tmaba dwata kéng bè gónô dwatahen boluyen Nisrok, tódô hnatay yó kem lewu ngaen logi Adramélék ne Sarisér, tnibó le sudeng, omin le mlóy etu bè Ararat. Ne yóm sotu ngà Sinakirib logi boluyen Isarhadon bud temles ke maen mò tau hol geta.
Currently Selected:
2 Bok Kem Tau Hol Geta 19: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
