2 Bok Kem Tau Hol Geta 18
18
Kogot Hisikaya yóm benwu Juda
1Bè yóm getluhen halay kmamal bè Israél Husiya ngà Ila, yó bud tles kmamal bè Juda duhen Hisikaya ngà Ahas. 2Deng lewu folò limu ne halay Hisikaya bè yóm kbuten mogot benwu, ne yó kegenen mogot yóm benwu Juda, lewu folò syóm halay, ne bè Jirusalim gónóhen nô. Yó boluy yéen, Abi ngà Sikaraya. 3Són nmoen yóm hyu bè kton Dwata du, lómón yóm tehe nmò fuen Dabid. 4Gotu genbaen yó kem gónó le gel tmaba ebè yó kem dwata kéng, ne gotu lenusoken yó kem hehek ilô yó kem dwata kéng le, ne hofoken yóm lennged yóm dwata kéng le boluyen Asira. Gotu lenusoken snéen yóm ulal tembaga tehe nmò Musis, abay se efet bè yóm kdaw yó mo le mom mtem insinsu ebè yóm ulal yó, yó kem tau Israél, yóm bnoluy le Nihustan.
5Tey ksalig Hisikaya ke Dwata, yóm Dwata yó kem tau Israél. Laen dù tau hol geta bè Juda ke mkél bè Hisikaya yóm kimónen ke Dwata, balù yó kem tau hol geta gegna béléen dalang se yó kem tau hol geta tmodol huli du laen kô dù bélê le mkél du. 6Tey teneb bè Dwata, ne là kóen skó bè yóm kloloen du, ne gotu loloen yó kem kdê hlau tehe blay Dwata ke Musis. 7Tendo nô béléen Dwata, ne ket nmoen sal wen uléken. Natuen yóm tau hol geta bè Asirya, là móyóen mayad du yóm gel hbayaden kul. 8Botong là kô le gemmò béléen yó kem Flistin, gotu gleden yó kem benwu le efet kól etu bè Gasa dalang se yó kem benwu snakufen. Gotu gleden yó kem ngà benwu le efet kól bè yó kem syudad mbegel beng hilolen.
9Bè yóm gfaten halay mogot bè Juda Hisikaya, ne deng ghituhen halay mogot bè Israél se kun ke Husiya, nundug Salmanésér yóm tau hol geta bè Asirya yóm syudad Samarya ne kmamfù le hilolen. 10Bè yóm hol són yóm tlu halay keslibut le du, botong gled le. Yóm kled le du yó, deng nem halay Hisikaya mogot yóm benwu Juda, ne deng syóm halay Husiya mogot yóm benwu Israél. 11Negef yóm tau hol geta bè Asirya yó kem tau Israél etu bè Asirya, suen lu bè yóm syudad boluyen Hala bè kilil Él Habor bè Gusan, ne wen se suen bè yó kem syudad bè Midya. 12Ni se gfà yó kem tau Israél lemwót bè yóm là kimón le du yóm sana kul Dwata hol gónó mogot, deng mom nulé le yóm tehe kesfasad le Dwata, là bud lolò le du yó kem tehe hlolò Musis kul yóm tau tóbóng lówó Dwata. Là kô bud hnungol le du, ne là se kô nimón le du.
Bud kled Asirya yóm benwu Juda
13Bè yóm deng gesfoloen fat halay kmamal Hisikaya bè Juda, nundug Sinakirib yóm tau hol geta bè Asirya kdê yó kem syudad mbegel beng le bè Juda, ne gotu nled le. 14Yó gónó Hisikaya yóm tau hol geta bè benwu Juda tminok ebè yóm geta bè Asirya nô bè Lakis, monen, “Denge gemsalà béléem bè yóm là klolou du yóm udin ye. Kihu hnihem béléu blayu kóm syan ke tebel ye nim benwu me.” Tahu se, yó hni yóm tau hol geta bè Asirya bè Hisikaya yóm tau hol geta bè Juda, mukas lemibu kilu tahu blówón ne mukas sfolò sotu libu blówón bukay. 15Gotu blay Hisikaya du yóm kdê blówón bukay bè Gónô Dwata ne yó kem blówón bukay nô bè yóm gónó le gel hemyu kimu legen bè gónô bongen. 16Ne gotu hwa Hisikaya yó kem tahu blówón lafin le yóm tikeb bè Gónô Dwata, ne tahu blówón lafin yóm hehek tikeb tehe hmoen, gotu blayen yóm tau hol geta bè Asirya.
17Lemwót yóm tau hol geta bè Asirya, wen tlu kmandér hógówen etu bè Jirusalim, mung kul yó kem tey sendalù wen le anì na le e nundug Hisikaya bè Jirusalim. Bè yóm kkól le ditu bè Jirusalim, tódô tenfeng le yóm lan gónó le gel hbukay nes yó kem tau gel mò nes bè kilil yóm kanal él lemwót bè yóm él senbusung le tofi ta. 18Omin le htaba ke Hisikaya, okóm mom hógówen yó kem tlu genlalen mò semlong kul, duhen Ilyakim ngà Hilkaya yóm fen mogot yóm gónô bongen, ominen Sibna yóm tau gel smulat bélê le bè kukum, ne getluhen Juwa ngà Asaf yóm fen gel hemyu yó kem kdê deng gel snulat le.
Yóm udél hlikò hwit Sinakirib ebè yó kem tau nô lem Jirusalim
19Yó udélen ebélê le yóm sotu kmandér bè yó kem sendalù Asirya, monen, “Ni mò tulón ye ke Hisikaya yóm udél hwit yóm tau hol geta bè Asirya ebéléen, monen, Tedu se snaligem mò gónóm là likò do? 20Yó kô hendemem gemmò ye ke wen udél hwitem ebélê me baluen ke là hulung ye mit sgida bélê me? Benwu du se tô snaligem mò tmóbóng kóm? 21Ngem, tô snalig ye yó kem tau Idyip kô? Ke yó tô snalig ye, hol lómón ke tmuged ye seben mufê gotu hnalien ke wen tmuged du. Lómón yó se kmoen yóm tau hol geta bè Idyip ke wen smalig béléen.
22Okóm ke mon ye mò do, ‘Smalig me bè yóm sana kum Dwata hol gónó mogot.’ Igò Hisikaya deng gotu hegbà du yó kem kdê gónó ye tehe tmaba ebéléen ne demsù ebéléen, ne monen mò kuy kem tau bè Juda ne bè Jirusalim, ‘Olon bè Jirusalim gónó ye tmaba ebè Dwata.’
23Yó ne, wen hmóyóu kuy hlanu bè boluy yóm tau hol geta bè Asirya. Angat benlayu yu lewu libu kudà ke wen lewu libu tau bélê ye hulung smakay kul. 24Yó kem sendalù ye là wen yó, là kô le na a gemmò bè yó kem sendalù hol glaan bélê me. Baluen ke wen klitun tók ne kem tau smakay kudà hwiten ebélê ye yóm tau hol geta bè Idyip, senged nóm là kô ye na a gemmò. 25Ne sotuhen, là kô lenbuu du gembà benwu ye ke là dók Dwata do. Yó mon Dwata mò do, ‘Nundugem, ne gotu genbaem.’ ”
26Omin le mudél le Ilyakim ngà Hilkaya ne Sibna ne Juwa ebè yóm kmandér yó, mon le mò du, “Yake udél Aramik dé udélem ebélê me, deng tngón me se kum. Béi mudél udél Hibru, abay se gotu gungol yó kem tau myón bè beng yóó.”
27Okóm yó bud udélen ebélê le yóm kmandér yó, monen, “Ilóem ofo kuy kô ke són ebélê ye ne bè yóm tau hol geta ye gónón e hemwit du yóm tau hol geta me ni kem udél ni, ne fen là bè yó kem tau myón bè beng yóó, kem tau angat són ken le kê le ne ninum le tléél le?”
28Ominen mdà yóm kmandér yó koni, bede hgelen udélen bè udél Hibru, yóm kul udél yó kem tau Juda, monen, “Hol hnungol ye yóm udélen ebélê ye yóm tau hol geta alì mfasang bè Asirya. 29Yó monen, Bê ye hegsukat bè Hisikaya, là kô nan e gbek du lemwà kuy lem hólólu. 30Hol bê ye abay mung ke niten yu smalig bè Dwata, ke monen, ‘Angat lenwà Dwata tekuy. Là kóen gnô lem hólól yóm tau hol geta bè Asirya yóm syudad tekuy ni.’
31Hol bê ye abay hnungol Hisikaya. Yó udélen ebélê ye yóm tau hol geta bè Asirya, monen, Mógów ye ebéléu, géhél ye heglaan, anì bud gken ye bungu grép ye ne bungu koyu fig ye, ne anì bud ginum ye yóm él lemwót bè sana kuy kokol, 32efet nwitu yu mayuk ebè yóm benwu angat gónó ye henek nô, benwu hol skél bè nim kuy benwu ni, benwu alì hmalay ne tmifas, alì wen mambangen ne grépen, benwu wen koyu uliben, ne wen tneben, benwu gónó ye mowil.
Hol bê ye abay hnungol yóm ksukat Hisikaya kuy ke monen, ‘Angat lenwà Dwata tekuy.’ 33Deng wen kô dwata lennged bè dumu benwu gembek lemwà yóm kul benwu lem tdok yóm tau hol geta bè Asirya? 34Nô se lu du yó kem dwata lennged bè Hamat ne bè Arpad? Nô se kul du yó kem dwata lennged bè Sifarbim ne bè Hina ne bè Iba? Deng lenwà le lem hólólu kô yó kem tau bè syudad Samarya? 35Deng wen dwata lennged kô gbeken lemwà benwuhen lem hólólu? Moen se ke hendem ye gbek Dwata lemwà yóm syudad Jirusalim lem hólólu?”
36Tódô le gotu neb yó kem tau, balù sekteb ke mudél le, ulit le bè yóm deng mon Hisikaya mò kul bê le abay malà. 37Omin le lemwót le Ilyakim ngà Hilkaya yóm mogot yóm gónô bong, ne Sibna yóm fen gel smulat bélê le bè kukum, ne Juwa ngà Asaf yóm fen hemyu yóm gel snulat le, mulék le ebè Hisikaya, deng gotu kensê le nes le, ne gotu tulón le du yóm kdê deng monen mò kul yóm kmandér lemwót bè Asirya.
Currently Selected:
2 Bok Kem Tau Hol Geta 18: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
