2 Bok Kem Tau Hol Geta 17

Kogot Husiya yóm benwu Israél

1Deng sfolò lewu halay Ahas ne mogot yóm benwu Juda yóm kbut Husiya ngà Ila mogot yóm benwu Israél. Syóm halay Husiya mogot yóm benwu Israél ne bè Samarya gónóhen nô. 2Bè kton Dwata du, sidek yó kem gel nmoen, okóm là katen mkél bè ksidek yóm kul tehe nmò yó kem gna tau hol geta bè Israél.

3Lemwót Salmanésér yóm tau hol geta bè Asirya nundugen Husiya, ne là gemmò yó kem tau Israél, ne wen hbayaden kul yóm tau hol geta bè Asirya ket halay. 4Okóm kogolen bè yó, deng mom wen tau hógów Husiya ebè So yóm tau hol geta bè Idyip, nan e htóbóng béléen anì là buden mayad bè Salmanésér, lómón yóm deng gel nmò le béléen ket halay. Tikóng gungol yóm tau hol geta bè Asirya yóm nmò Husiya yó, hekfóen ne heblangguen.

5Ominen mundug ebè klamang Israél, ne botong tlu halayen kmamfù hilol yóm syudad Samarya. 6Bè yóm gesyómen halay mogot benwu Husiya, gled yóm tau hol geta bè Asirya yóm syudad Samarya, ne gotu negefen etu bè Asirya yó kem tau Israél. Suen lu bè Hala, moni bè kilil Él Habor bè Gusan. Lemwót yó kem dumu, suen lu lem blóng yó kem tau bè syudad Midya.

Kegbà kem sendalù Asirya yóm syudad Samarya

7Yó gónón lómón ni gfà le yó kem tau Israél, lemwót bè yóm deng kegsalà le bè yóm sana kul Dwata hol gónó mogot, yóm deng lemwà kul lem hólól Faro yóm tau hol geta bè Idyip gónó le ghesek. Deng le mom tmaba ebè yó kem dwata lennged, 8ne deng mom lolò le yóm kul kmò yó kem tau deng tehe hdó Dwata ta yóm tonok deng tehe blayen yó kem tauhen. Bud lolò le snéen yóm tehe tolok le kul yó kem tehe fù le, duhen yó kem gna tau hol geta bè Israél. 9Gel lifut nmò le yóm là hyuhen bè yóm sana kul Dwata hol gónó mogot. Deng mom hdà le bè yó kem benwu le yóm gónó le gel demsù ebè yó kem dwata kéng, balù yó kem benwu lemnek kkólen bè yó kem syudad mbegel beng hilolen wen hdà le bè yó. 10Hdà le ta yó kem bulul lemnek, ne laan yó kem koyu lemimbà hangahen, wen hehek botu yóm kul dwata kéng hdà le bè yó, ne yóm hehek ilô yóm dwata libun boluyen Asira. 11Ne bè yó gónó le mtem insinsu ebélê le, lómón yóm kul gel nmò yó kem tau deng tehe hdó Dwata ta yóm tonok tehe blayen yó kem tau Israél. Tey alì kmò le sidek yó kem tau Israél, yó gónó Dwata alì lembut kul. 12Tmaba le ebè yó kem dwata lennged igò Dwata deng hónô mon du mò kul, “Hol bê le abay tmaba ebè yó kem dwata kéng.” 13Igò Dwata deng tendo semsulit eles hetgama yó kem tau bè Israél ne yó kem tau bè Juda hlanen bè yó kem tugoden ne bè yó kem tau gel wen htonen kul, monen, “Knogol ye ne yó kem sidek gel nmò ye, ne hol lolò ye yó kem hlauhu kuy ne yó kem hlolou kuy, yóm tehe hlolou yó kem tehe fù ye mò hol nimón le, yóm deng htulónu yó kem tugodu ne yó kem tau tóbóng lówóhu bélê ye.”

14Okóm là kô hnungol le du, tey mgel kulu le lómón yóm tehe nmò yó kem tehe fù le, là kô hentahu le du yóm sana kul Dwata hol gónó mogot. 15Mom kenbê le yóm hlolò Dwata kul, dalang se yóm deng tehe senfasad le Dwata yó kem tehe fù le, ne yó kem eles hetgamahen kul. Deng mom lolò le yó kem dwata lennged laen dù mu le, ne baling le tau laen dù mu se kul. Mom lolò le yóm kul gel nmò yó kem benwu hmilol kul igò Dwata deng mon du mò kul hol bê le abay lolò lu. 16Deng gotu kenbê le yóm kdê hlau yóm sana kul Dwata hol gónó mogot, mo le mom mò lewu safì lennged mò dwata le, ne wen hdà le hehek botu ilô yóm dwata libun boluyen Asira. Lel le tmaba ebè Baal ne ebè kdê yó kem blotik ton le bè longit. 17Deng mom dsù le ta ofi yó kem ngà udì le logi duhen libun, ne mógów le ebè yó kem tau hemgawang ne ebè yó kem tau demwata, deng tódô bayà le knô le mò du yóm sidek, yóm gónón alì lembut kul Dwata.

18Yó gónóm mon, yó se gónó Dwata alì lembut kul yó kem tau Israél, ne gónón hdó kul bè soluhen, laen kô dù tebel tek són yóm kun ktol Juda. 19Senged se yó kem ktol Juda, là kô lolò le du yóm hloloen kul yóm sana kul Dwata hol gónó mogot, deng mom lolò le yóm nmò yó kem tau Israél. 20Duhen yó, tey kekbê Dwata kul yóm kdê sfu tehe Israél. Tnafaken lu, botong blayen lu elem hólól yó kem tau gel mundug kul efet gotu hlanahen lu bè soluhen. 21Bè yóm kkó Dwata kul yó kem tau Israél bè yóm kun nogot Dabid, deng mom yó nmò yó kem tau Israél, nélék le Jirubuam ngà Nibat mò tau hol geta bélê le. Du se yóm tau hol geta mit kul hlayuk bè Dwata yó kem tau Israél, deng mom niten lu tmaba ebè dwata kéng. 22Tódô henlós yó kem tau Israél mò salà, lolò le yóm tehe nmò Jirubuam ngà Nibat, là kô knogol le du. 23Efet gotu hdó Dwata lu bè soluhen yó kem tau Israél, lómón yóm deng eles htulónen yó kem tugoden ne yó kem tau tóbóng lówóhen. Yó gónóm mon, efet ni kmoen ni yó kem tau Israél sana tolo knô le bè Asirya yóm benwu tehe megef kul.

Kehsù yóm tau hol geta bè Asirya kem tólóng tau bè benwu Israél

24Yó nmò yóm tau hol geta bè Asirya, nwiten yó kem tau bè Babilun ne kem tau bè Kuta ne kem tau bè Hamat ne bè Sifarbim, suen lu bè Samarya ta yóm tonok yó kem tau Israél. Tódô nfun le yóm benwu Samarya, ne nô le bè yó kem syudad bè yó. 25Bè yóm tanay knô le bè yó, là kô le tmaba ebè Dwata, ne yó gónó Dwata hemwit ebélê le yó kem liyun, ne wen se bélê le nsék yó kem liyun.

26Duhen yó, wen udél hwit le ebè yóm tau hol geta, mon le, “Yó kem tau lomi suem bè yó kem benwu lemnek bè Israél, là kô tngón le du yóm hlolò yóm Dwata bè yóm benwu yó. Deng wen kem liyun hwiten ebélê le, ne gotu nsék le lu, abay se là tngón le du yóm hlolò yóm Dwata bè yóm benwu yó.”

27Ominen yó udél yóm tau hol geta bè Asirya, monen, “Hulék ye ebè Israél yóm sotu tau gel blóng ebè Dwata deng negef ye lemwót bè Samarya mò fen tmolok du bè yó kem tau lomi nô bè yó yóm kun hlolò yóm Dwata bè yóm benwu yó.” 28Tahu se, wen sotu tau gel blóng ebè Dwata lemwót bè Samarya deng negef le bud hulék le, ne bè Bétél gónón nô, gotu toloken kul yóm kmò ktaba le ebè Dwata.

Là gomongen bè nili yóm bérs 29 efet kól bè bérs 41. Yó tulónen bè ni kem bérs ni yóm deng kegbót le tmaba ebè Dwata yó kem tau Israél yó kem tólóng tau lomi menwu bè benwu Israél lan le tmolok kul. Okóm sana tolo ktaba le ebè yó kem kul dwata kéng, yóm tehe nwit le gu bè yó kem tey dê benwu gónó le gu lemwót. Balù ni kmoen ni, yó kem semfu gu bélê le sana tolo klolò le du.

Currently Selected:

2 Bok Kem Tau Hol Geta 17: tbl

Highlight

Copy

Compare