2 Bok Kem Tau Hol Geta 13
13
Là gomongen bè nili yóm bérs 1 kól bè bérs 13. Yó tulónen bè ni kem bérs ni yóm kbut Jihuahas ngà Jihu mogot yóm benwu Israél, deng lewu folò tlu halay Juas ne mogot yóm benwu Juda. Yó kegen Jihuahas mogot yóm benwu Israél, sfolò hitu halay.
Tulónen bè ni snéen yóm alì kebut Dwata kem tau Israél lemwót bè yóm gel ktaba Jihuahas bè dwata kéng. Yó se buten yóm gónó Dwata hemlus ke Hasaél yóm tau hol geta bè Aram mò tendo gmida kul.
Omin Jihuahas mni tóbóng bè Dwata, ne yó gónón wen tau hwit Dwata elem blóng le mò lemwà kul lem hólól yóm tau hol geta bè Aram. Ominen yó he menek kbenwu le lómón yóm gnan.
Okóm senged nóm yó kem tau Israél, là kô kó le du yóm ktaba le ebè dwata kéng, mom hnolì le lemolò yóm sidek gel nmò Jirubuam.
Tikóng matay Jihuahas, yóm ngaen boluyen Jihuas bud tles mogot yóm benwu Israél.
Hol són ktugod Ilaysa
14Bè yóm kegnóm Ilaysa du yóm des gónón matay, nauy Juas yóm tau hol geta bè Israél. Bè yóm ktonen ke Ilaysa botong mkik, monen, “Ó Mà, yóm klitun tók yó kem tau Israél, ne yó kem tau mit kudà demyol kul.”
15Yó mon Ilaysa mò du, “Mahi boho ne wen kem hanaken.” Tahu se, ma yóm tau hol geta.
16Omin Ilaysa bud mon du mò yóm tau hol geta, “Eles bentulem bohohem.” Tahu se, nmoen. Omin Ilaysa mogot tdok yóm tau hol geta. 17Omin Ilaysa bud mon du mò du, “Lenungkaem yóm tembó beng fi dmata kdaw.” Tahu se, lenungkaen. Omin Ilaysa bud mon du mò du, “Gemtii.” Tahu se, gemtì.
Omin Ilaysa bud mon du, “Ni se hanak Dwata fen gemmò bè yó kem sendalù Aram, yakà uu du angat gmida kul yó kem tau Aram bè benwu Afék efet gotu genlaem lu yóm kdê le.” 18Omin Ilaysa bud mon du bè yóm tau hol geta yó, “Yó bud nwahem yó kem dumu hanak yóó, ominem mdung kul bè seel.” Tahu se, nulut yóm tau hol geta lu, ominen mdung du tlu dulék bè seel. 19Botong lenbut Ilaysa yóm tau hol geta, monen, “Yake limu duhen ke nem dulékem dé mdung du anì là gemmò le béléem yó kem tau Aram efet le gotu meglà. Okóm ni, tek tlu dulékem néen gemmò bélê le.”
20Duhen yó, matay Ilaysa ne lebeng le.
Bè yóm kbut kkinì kdaw, yó gel nmò yó kem tau Muab gel le hmékét bè lan, tódô ket halay le gel mógów ebè benwu Israél. 21Sotu kdaw bè yó, yóm igò le lembeng yó kem tau Israél, ton le yóm sotu lumbuk gel hmékét bè lan yó. Uni le mton kul, tódô bot le yóm lówó yóm tau lebeng le elem yóm kilib gónó le tehe lembeng ke Ilaysa. Bè yóm kegdeken bè yó kem tiol Ilaysa yóm lówó tau matay bot le yó, tódô bud mowil ne mdà.
22Bè yóm klawi Jihuhas mogot bè Israél, tey kehegnok Hasaél yóm tau hol geta bè benwu Aram kul yó kem tau Israél. 23Okóm yóm Dwata, tey kkoduhen kul yó kem tau Israél, ne yó gónó le là gotu meglà. Knoduhen lu lemwót bè yóm deng kesfasad le Dwata Abraham ne Isak ne Jakub. Efet ni kmoen ni, là kô sulék genlaen kul yó kem tauhen, ne là se kô tebelen kul.
24Timbow matay Hasaél yóm tau hol geta bè Aram, yó bud temles du tau hol geta, duhen yóm ngaen logi boluyen Bin-hadad. Yó nmò Bin-hadad, gotu nleden yó kem ngà benwu kem tau Israél igò Jihuhas mogot bè Israél. 25Omin Jihuas ngà Jihuhas bè Israél bud gmida ke Bin-hadad ne tlu duléken gemmò béléen. Gotu bud gwahen yó kem benwu tehe nled Bin-hadad bélê le.
Currently Selected:
2 Bok Kem Tau Hol Geta 13: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
