2 Bok Kem Tau Hol Geta 11
11
Kogot Boi Atalaya yóm benwu Juda
1Timbow tngón Atalaya yóm katay ngaen Ahasaya yóm tau hol geta mogot yóm benwu Juda, kewóten bè yó gotu tô hfatayen yóm kdê ngà Ahasaya.#11:1 Yóm Atalaya, du se ngà Jisébél yehen Ahab.Okóm wen libun Ahasaya boluyen Jihusiba ngà yóm tehe Jihuram yóm tau hol geta bè Israél. Yó nmoen, bnosen yóm sotu ngà Ahasaya logi hanà udì boluyen Juas, nwahen lem blóng yó kem dumu ngà yóm tau hol geta móyón hnatay le. 2Okóm wen libun Ahasaya boluyen Jihusiba ngà yóm tehe Jihuram yóm tau hol geta bè Israél. Yó nmoen, bnosen yóm sotu ngà Ahasaya logi hanà udì boluyen Juas, nwahen lem blóng yó kem dumu ngà yóm tau hol geta móyón hnatay le.#11:2 Yóm Jihusiba monen ni, du se yehen Jihuyada yóm tau gel blóng ebè Dwata. Bnosen Juas lewu le yóm libun gel semgyok du ditu bè yóm sotu dfél lem Gónô Dwata anì là ghatay Atalaya du. 3Botong nem halay Juas lewu le yóm libun semgyok du hebnos lem Gónô Dwata yóm igò Atalaya tolo mogot yóm benwu Juda.
Katù le ke Boi Atalaya
4Tikóng bè yóm ghituhen halay mogot benwu Boi Atalaya, lemwót yóm tau gel blóng ebè Dwata boluyen Jihuyada, gotu htabahen yó kem kmandér bè yó kem sendalù gel mentey yóm tau hol geta, ne yó kem sendalù gel mentey bè gónô bong anì gotu le stifun ebè Gónô Dwata. Wen atul senfasad le, ne hsafaen lu bè yó bè Gónô Dwata. Ominen hton du bélê le yóm ngà yóm tau hol geta.
5Yó udélen ebélê le, monen, “Ni mò hol nmò ye. Yóm lumbuk mentey bè Kdaw Kehegnô kemdaw ni, sólól ye bè tlu bung. Yóm sotu bung, fen mentey ditu bè gónô bong. 6Yóm sotu bung, fen mentey ditu bè Bak Tikeb Sur. Ominen yóm sotu bung, fen mentey ditu bè kwang yó kem sendalù mentey bè gónô bong. Yóm tlu bung ni, senbentey le yóm gónô bong. 7Yóm lewu dù lumbuk là menteyen kemdaw ni bè Kdaw Kehegnô, lu fen mentey bè Gónô Dwata mò mentey yóm tau hol geta. 8Hol snibut ye yóm tau hol geta, ket tau eles nogoten yóm kun sudeng. Kihu tau hloni ebélê ye, hnatay ye. Tódô ye hlós nô klohok yóm tau hol geta balù kihu gónón nô.”
9Tahu se, nmò yó kem kmandér yóm kdê hmò Jihuyada kul. Lu fen malak yó kem sendalù le mentey bè yóm Kdaw Kehegnô bè yóm kdaw yó, dalang se yó kem sendalù là mentey le bè yóm kdaw yó. Gotu nwit le lu bè Jihuyada, yóm tau gel blóng ebè Dwata. 10Gotu blay Jihuyada ebè yó kem sendalù yó kem buyus ne kem klung tehe Dabid deng henyu le lem Gónô Dwata. 11Lemwót yó kem sendalù mentey, senibut le yóm tau hol geta, sket kul mogot yó kem ngom le sfatay. Wen se kem sendalù mdà gu hilol yóm Gónô Dwata, gomong senibut le se yóm gónó le gel demsù, botong kbentey le yóm tau hol geta.
12Omin Jihuyada hefewà ke Juas yóm ngà yóm tehe tau hol geta, ne ominen smuub kuruna bè kuluhen. Blayen du yóm snulat tehe senfasad le Dwata yó kem tau Israél mò lolò yóm tau hol geta bè kogoten benwu, ne ominen heglalag du bè kdéen, Juas ne yóm tau hol geta bélê le. Wen hnolo twélen ta kulu Juas mò ilô yóm kbalingen tau hol geta bélê le, ne gotu le semdofì hólól yóm kdéen tau, gotu le mensag, mon le, “Hol tahà he klowil yóm tau hol geta.”
Khatay le ke Boi Atalaya
13Timbow gungol Boi Atalaya yóm tey kehebnes yó kem sendalù mentey dalang se yó kem tau, yó gónón hetlasik mógów ebélê le ditu bè Gónô Dwata. 14Ne tódô tonen ditu yóm lomi tau hol geta mdà bè yóm hehek botu bè bak dól elem yóm Gónô Dwata, yó se yóm sana kul adat. Mdà gu hilolen yó kem kmandér ne yó kem tau myuf féw, ne kdê yó kem tau gotu le hligal lel le mféw. Bè yóm kton Boi Atalaya du yóm kdéen ni, tódô kenséen nesen botong ksidek kegnómen du, ominen hetê, monen, “Kem tau heklabak! Kem tau hton salù!”
15Omin Jihuyada yóm tau gel blóng ebè Dwata, mdók yó kem kmandér bè yó kem sendalù, monen mò kul, “Nit ye hewà Boi Atalaya. Bê ye abay hnatay bè ni lem Gónô Dwata. Ke wen tau tô mofin du hnatay ye.” 16Tahu se, kenfô le, omin le mit du ebè yóm bak tikeb gónón gel husek kudà ebè gónô yóm tau hol geta, ne bè yó gónó le hmatay du.
17Omin Jihuyada hfasad yóm tau hol geta, ne yó kem tau ebè Dwata, duhen yóm kbaling le kem kun tau Dwata. Bud wen se hfasaden yóm tau hol geta ne yó kem tau nogoten. 18Omin le gotu mógów ebè gónô Baal yóm kdéen tau ne gotu genbà le. Bud genbà le snéen yó kem gónó demsù ebéléen, ne yóm lenngeden gotu lenusok le. Ne hnatay le Matan yóm tau gel blóng ebè Baal bè yó bè solu yó kem gónó gel demsù ebè Baal.
Omin Jihuyada hemsù kem tau mentey bè yóm Gónô Dwata. 19Kewót Jihuyada bè yó bè Gónô Dwata, mung du yó kem kmandér, ne yó kem sendalù gel mentey yóm tau hol geta, ne yó kem sendalù gel mentey bè gónô bong, ne yóm kdéen tau, eted le Juas ebè gónô bong. Mlan le etu bè yóm bak tikeb yó kem tau tendo gel mentey bè gónô bong. Bè yóm kkól le ditu, tódô hlós etu Juas ta yóm bangkù gónón gel myón yóm tau hol geta. 20Duhen yó, tódô kdê yó kem tau gotu le hligal. Kogol yóm khatay le ke Boi Atalaya bè gónô bong, tey menek lem yóm syudad.
21Hanà hitu he halay Juas bè yóm kbuten mogot benwu.
Là gomongen bè nili yóm tsaptér 12. Yó tulónen bè nim tsaptér ni yóm kogot Juas yóm benwu Juda, ne botong fat folò halay kegenen mogot du. Yóm klawi Juas mowil, tendo nmoen yóm gónón hligal Dwata, abay se gel hnungolen yóm kehlauhen du yóm tau gel blóng ebè Dwata boluyen Jihuyada. Okóm là kô dog hegbaen du yó kem gónó le gel demsù ebè yó kem dwata kéng yó kem tau Juda.
Nim Juas, fen hestifunen filak yó kem tau gel blóng ebè Dwata mò bayad le yóm bud ketlob le yóm Gónô Dwata, Là bud hetngel Juas du yó kem tau snaligen yóm kmò kgastu le yóm filak gel blay le yó, abay se tey le gsalig yó kem tau mogot du.
Bud monen bè ni yóm tô kegbà Hasaél yóm syudad Jirusalim, okóm là dohoen lemwót bè yóm tey basa Juas du.
Ne bud monen bè ni yóm khatay le ke Juas yó kem tau gónón gel hmungol hlau, ne fen temles du yóm ngaen boluyen Amasaya.
Currently Selected:
2 Bok Kem Tau Hol Geta 11: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
