2 Tutul Israél 6
6
Kni Selumun bè Dwata bè yó kem kun tau
(1 Bok Kem Tau Hol Geta 8:12-21)
1Omin Selumun mni bè Dwata, monen, “Ó Dwata, deng monem nói lem yóm kifu mget se kóm. 2Okóm ni, denge hemdà béléem yóm tey Gónô tilob mò gónóhem nô, ne laen kô dù tul sónen yóm knóem lemen.”
3Omin Selumun beklil ebè yó kem tau Israél mdà bè yó bè soluhen, ne mni bélê le bè Dwata. 4Yó monen, “Hol megdóyón Dwata yóm kum Dwata kem tau Israél. Deng dnohoen yóm tehe fasaden ke Dabid yóm dou mà, bè yóm tehe kmonen du mò du, 5‘Lemwót bè yóm kdaw tehe kehewau kul gu bè Idyip yó kem dou tau, laen kô deng syudad néléku he bè yó kem tbong Israél ke mò gónó le hdà yóm dou gónô, yóm gónô mò mit yóm dou boluy. Ne laen dù deng néléku mò malak yó kem dou tau. 6Okóm ni, deng néléku Jirusalim mò gónóhen nô yóm dou boluy, ne deng néléku Dabid mò kmamal yó kem dou tau Israél.’ Yó se deng fasad Dwata ke mà.”
7Ne yó bud udél Selumun, monen, “Yóm dou mà tehe Dabid, kóyóen se kun ke du hemdà du yóm Gónô Dwata yóm Gónô mò mit yóm kun boluy Dwata yóm Dwata yó kem tau Israél. 8Okóm yó mon Dwata mò du, ‘Tey hyu se yóm tô óyóem hemdà du yóm Gónô mò mit yóm dou boluy, 9okóm là uu du hemdà du. Wen sotu bè yó kem ngaem logi angat fen hemdà du.’
10Ne ni, deng dnohò Dwata yóm tehe fasaden ke mà. Deng ou temles mà mò tau hol geta. Deng hdau nim Gónô Dwata ni, yóm Gónô mò mit yóm kun boluy, yóm Dwata kem tau Israél. 11Bè yó gónóhu hemsù du yóm Slungan Dwata, nô lemen yóm deng tehe senfasad le Dwata yó kem tau Israél.”
Khogot Selumun du ke Dwata yó kem tauhen
(1 Bok Kem Tau Hol Geta 8:22-53)
12Bè yó bè solu yóm kdê tau Israél, mógów ebè yóm gónó gel demsù Selumun, ne mdà bè yó, nbólen hólólen ta yóm gónó gel demsù. 13Wen gónó le gel hegewà sok wen kestifun hmoen bè tembaga deng hdaen bè yó, mukas lewu mitru klamangen ne mukas sotu mitru kegetahen. Suen bè gónón sóól lósól yóm Gónô Dwata. Ominen motun etahen ne mdà bè yó, ne ominen mtud bukolen bè solu yóm kdéen tau Israél, nbólen eta bè longit hólólen. 14Ne mni bè Dwata, monen, “Ó Dwata, yóm kum Dwata yó kem tau Israél, laen kô dù dumu dwata semnged kóm bè longit duhen ke dini talak tonok. Là kô klifótem du yóm tehe senfasad ye yó kem tauhem, ne là kóen monol yóm kbong nawahem kul ke hol lemwót lem but blutut le yóm kimón le kóm. 15Deng dnohoem yóm tehe fasadem yóm sotu tau tóbóng lówóhem Dabid yóm dou mà. Uu se tehe fmasad du, ne ni kemdaw ni yóm deng kdohoem yóm tehe fasadem. 16Duhen yó, Dwata yóm kum Dwata yó kem tau Israél, bude mni béléem anì bud dnohoem yóm tehe dumu fasadem ke mà, yóm tehe kmonem du mò du, ‘Angat tendo wen bè yó kem lugodem baling tau hol geta bè Israél, syan ke hol ten-gama le kmò le, ne hol nimón le yóm hlauhu, lómón yóm kóm kimón du.’ 17Ne ni, Dwata yóm kum Dwata yó kem tau Israél, hol dnohoem yóm tehe fasadem ke mà yó yóm tau tóbóng lówóhem.
18Okóm Dwata, gbekem kô nô dini talak tonok? Hol mou kun ne anì sem longit du, yóm longit hol geta, là kói kóyów du. Sélét mom ni nem Gónô deng hdau béléem ni tô gónóm kóyów. 19Okóm Dwata yóm sana dou Dwata hol gónó mogot, hol kenmónem yóm hnihu béléem ni. Hol hnungolem yóm henkoduhu béléem ni, dalang se yóm hnihu béléem, yóm tau tóbóng lówóhem. 20Hol tendo tnanudem ket kdaw ne ket kifu Gónóem, ni se yóm Gónô tehe monem mò gónóm hemsù yóm kóm boluy. Hol hnungolem ou ke gele mni béléem igou smolu ebè nim Gónóem ni. 21Hol hnungolem yó kem gel henkoduhu béléem, dalang se yó kem tauhem Israél, yóm igò me smolu ebè Gónóem. Hol hnungolem mi dyó bè gónóm nô bè longit ne ke deng gungolem, hol hnifótem yó kem salà me.
22Ke wen tau tnifù le lanen mò sidek bè kem dumun, ne nwit le ebè yóm gónó le gel demsù ebéléem bè Gónóem anì smafà ke tahu laen dù salaen, 23Ó Dwata, hol hnungolem dyó bè longit, ne uu hol kmukum du yó kem tau tóbóng lówóhem yó, yóm tau tmifù ne yóm tau tnifuen. Hol tnafakem yóm tau wen salaen, ne hol hewaem yóm tau laen dù salaen.
24Ke là gemmò le bè yó kem hohon le yó kem kóm tau Israél lemwót bè yóm kegsalà le béléem, ne ke bud le semfulék ebéléem, ne ke mógów le ebè Gónóem ne tmaba le ebéléem, ne ke mni le seflifót béléem, 25hol hnungolem lu dyó bè longit, ne hnifótem yó kem salà le, ne bud nwitem lu semfulék ebè yóm tonok deng tehe blayem yó kem tehe fù le.
26Ke là bud hkulónem du lan le gemsalà béléem yó kem kóm tau, ne ke smolu le ebè Gónóem na le e hegsel béléem, ne ke knogol le yó kem salà le lanem tmafak kul, 27hol hnungolem lu dyó bè longit, ne hnifótem yó kem salà yó kem kóm tau Israél, yó kem tau tóbóng lówóhem. Ne hol tolokem lu mò du yóm tedeng, ne bud hkulónem ta yóm kóm tonok deng tehe blayem yó kem kóm tau mò hol kul nfun.
28Ke mbel bitil bong bè benwu le, duhen ke wen des yó kem hulu le, duhen ke gotu ken yó kem tey tlangas mfól yó kem hulu le, duhen ke gotu nundug kem hohon le yó kem benwu gónó le nô yó kem kóm tau, balù kihu gfà le ne balù kihu des gefet bélê le, 29ke mni le béléem yó kem kóm tau lemwót bè yó kem gfà le ne bè yó kem lenangag le, ne ke nból le hólól le mni ebè yóm gónóem, 30hol hnungolem lu dyó bè yóm gónóem nô bè longit, ne hnifótem lu. Hol nmoem bè ket kóm tau yóm hyu béléen, abay se tek són uu temngón du yóm nô lem hendem tau. 31Ke yó nmoem, angat wen klikò le kóm yó kem kóm tau ne lolò le yóm kóm klan bè yóm igò le mowil ta yóm tonok deng tehe blayem yó kem tehe fù me.
32Ke wen yó kem tólóng tau nô bè benwu mayuk mungol du yóm tey któtólem ne yó kem hentaw ton deng nmoem bè yó kem kóm tau, ne ke mógów le edini na le e tmaba ebè yóm kóm boluy alì mfasang, ne mni le ebéléem igò le smolu ebè Gónóem, 33hol hnungolem yóm hni le bè yóm gónóhem nô dyó bè longit, ne blayem kul yóm deng hni le béléem yó. Ke yó nmoem, tódô kdéen tau bè klamangen benwu angat temngón kóm, ne wen klikò le kóm, lómón yóm kul gel nmò yó kem kóm tau Israél. Ne tngón le se kul yóm Gónô Dwata hdau mò mit du yóm kóm boluy.
34Ke dókem lu ebè gida yó kem kóm tau anì na le e senfatay yó kem hohon le, ne ke mni le ebéléem igò le smolu ebè yóm syudad deng nélékem ne ebè yóm Gónô deng hdau béléem, 35hol hnungolem lu gu bè longit, ne hol hegmoem lu.
36Ke gemsalà le béléem yó kem kóm tau, abay se laen dù tau ke là gemsalaen, ne lemwót bè kebutem kul là kô hegmoem kul bè yó kem hohon le, ne gotu negef le lu etu ebè tólóng benwu mayuk duhen ke benwu moni, 37okóm ke hegsel le bè yóm knô le bè yóm benwu gónó le deng e megef kul, ne ke gotu benkas le béléem yó kem tey salà le, ne ke mni le ebéléem, mon le, ‘Tey me deng gemsalà, tey sidek yóm deng nmò me.’ 38Ke hol le tahu hegsel bè yóm knô le bè yóm benwu gónó le e megef kul yó, ne ke mni le ebéléem smolu le ebè yóm benwu deng blayem yó kem tehe fù le ne ebè yóm syudad deng nélékem, ne ebè yóm Gónô deng hdau béléem mò mit yóm kóm boluy, 39hol hnungolem yóm hni le bè yóm gónóhem nô dyó bè longit, ne hol knoduhem lu. Hnifótem yó kem kóm tau bè kdê yó kem salà deng nmò le béléem.
40Duhen yó, Dwata, hol kenmónem yó kem hni le béléem lemwót bè Gónóem. 41Ne ni, Dwata yóm sana Dwata hol dou gónó mogot, huseki elem yóm Gónô mò gónóm henek nô, ne ebè yóm gónón nô yóm Slungan Fasadem ilô yóm alì kfasangem. Yó kem tau gel blóng ebéléem, Dwata, hol lu he mit kegewà bè yó kem kóm tau, ne yó kem kóm tau, hol le hligal he bè yóm tey kehyuhem ebélê le. 42Ó Dwata yóm sana Dwata hol gónó mogot, hol béem abay knogol yóm tau hol geta deng nélékem. Hentulónem nawa yóm là konol yóm kbong nawam ke Dabid yóm tau tóbóng lówóhem.”
Currently Selected:
2 Tutul Israél 6: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
