2 Tutul Israél 22
22
Kogot Ahasaya yóm benwu Juda
(2 Bok Kem Tau Hol Geta 8:25-29; 9:21-28)
1Yó nmò yó kem tau bè Jirusalim, henbaling le Ahasaya yóm ngà Jihuram són twoli, mò tles tau hol geta bélê le. Abay se yó kem ngà Jihuram twogu, deng gotu hnatay yó kem tau Arab. Duhen yó, yó tles kmamal bè Juda, duhen Ahasaya, yóm ngà Jihuram. 2Bè yóm kbut Ahasaya tau hol geta, deng lewu folò lewu ne halayen. Tek sfalayen kmamal nô bè Jirusalim. Yó boluy yéen, Atalaya témê Umri yóm tau hol geta mogot yóm benwu Israél. 3Bud senged se kun nmò Ahasaya, loloen yóm sidek nmò yó kem fes lówó Ahab, abay se yóm yéen gemduf du mò sidek. 4Nmò Ahasaya yóm sidek bè kton Dwata du, lómón yóm tehe nmò Ahab. Kogol yóm katay maen, lemwót bè fes lówó Ahab yó kem tau gónón gel hmungol hlau, ne deng mom nwit le ebè yóm gónón meglà.
5Lolò Ahasaya yóm sidek hlau le du, yó gónón mfi bè Juram ngà Ahab yóm tau hol geta bè Israél, anì nit le sgida Hasaél yóm tau hol geta bè Aram, ditu bè Ramut-gilyad. Bè yóm kesgida le, hnalì Juram yóm tau hol geta. 6Yó gónón mulék bè Jisriil nahen hkó bè yó yóm halien. Omin Ahasaya yóm tau hol geta bè Juda mauy du bè Jisriil. 7Okóm yóm kauyen du yó, deng kun kmò du Dwata mò gónón gemlà ke Ahasaya. Abay se yóm kkólen bè yó, mung ke Juram na le e senlong Jihu ngà Nimsi, igoen Jihu yóm deng nélék Dwata mò gemlà yó kem ktol Ahab.
8Yóm igò Jihu gemlà yó kem fes lówó Ahab, wen bè yó kem genlal bè Juda tonen, mung kul yó kem ngaen logi yóm dumun setwoli Ahasaya, gotu le mung bè Ahasaya. Duhen yó, gotu hnatay Jihu lu. 9Omin le mebel ke Ahasaya yó kem tau mung ke Jihu, ne ton le hebnos bè syudad Samarya. Nwit le ebè Jihu, ne hnatayen. Okóm lebeng le Ahasaya, abay se yó mon yó kem tau, “Du se tehe témê Jihusafat, yóm tau lemwót lem but blututen yóm kebelen du yóm kun kóyô Dwata.” Ne laen kô dù bè yó kem fes lówó Ahasaya dù mowil ke gembek mogot benwu.
Kogot Boi Atalaya yóm benwu Juda
10Timbow tngón Atalaya yóm yê Ahasaya, yóm deng katay yóm ngaen Ahasaya, yó nmoen gotu hfatayen yóm kdê ktol Ahasaya yóm tau hol geta bè Juda. 11Okóm wen libun Ahasaya boluyen Jihusiba ngà yóm tehe Jihuram, yó nmoen nwahen yóm sotu ngà Ahasaya logi hanà udì boluyen Juas bè yó kem dumu ngà yóm tau hol geta móyón hnatay le, bnosen Juas lewu le yóm libun gel semgyok du ditu bè yóm sotu dfél lem Gónô Dwata anì là ghatay Atalaya du. Yóm Jihusiba yehen yóm tau gel blóng ebè Dwata boluyen Jihuyada. 12Botong nem halay Juas lewu le yóm libun semgyok du hebnos lem Gónô Dwata yóm igò Atalaya tolo kmamal bè Juda.
Currently Selected:
2 Tutul Israél 22: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
