2 Tutul Israél 21
21
Kogot Jihuram yóm benwu Juda
1Timbow matay Jihusafat, lebeng le bè gónó le lembeng yó kem fuen bè syudad Dabid, ne yóm ngaen Jihuram bud tles tau hol geta. 2Wen kem dumu ngà Jihusafat logi, dumun setwoli Jihuram, yó boluy le Asaraya, Jihiyél, Sikaraya, Asariyahu, Maykél ne Sifataya. Ni se kdê kem ngà Jihusafat logi yóm tau hol geta bè Juda. 3Tey wen blay mà le kul mò nfun le, kem tahu blówón ne blówón bukay, ne kem kimu mebtes ne wen bè yó kem syudad mbegel beng hilolen bè Juda. Okóm fen blayen ke Jihuram yó dum kogoten benwu, abay se du yóm ngaen logi twogu. 4Timbow deng mbegel kogot Jihuram benwu, tódô gotu hfatayen yó kem dumun setwoli, ne wen bè yó kem dumu tau malak bè Israél snéen hfatayen.
5Bè yóm kbut Jihuram mogot benwu, deng tlu folò lewu ne halayen. Yó kegenen mogot benwu, wolu halayen, ne bè Jirusalim gónón hlós nô. 6Okóm tódô loloen yóm kul kmò yó kem gna tau hol geta bè Israél fi bwak. Yóm ksidek nmò Jihuram, lómón ksidek yóm tehe nmò Ahab, abay se yehenen yóm sotu ngà Ahab libun. Tey sidek kton Dwata du yó kem gel nmò Jihuram. 7Okóm là kô gbek Dwata gemlà du yóm ktol Dabid mogot benwu, yakà deng wen yóm senfasad le Dwata, ne deng fasaden du yóm klaen tul sónen yóm keseflós le mogot benwu yó kem semfu gu béléen.
8Bè yóm igò Jihuram mogot benwu, lemwót yó kem tau bè Idom, natù le yóm benwu Juda, ne mélék le tau hol geta mò mogot kul. 9Duhen yó, yó nmò Jihuram mundug ebè Idom, mung du yóm kdê sendaluen ne yóm kdê klitun tóken. Tódô snibut kem tau Idom lu. Okóm bè yóm deng kkifuhen, botong mlóy Jihuram. 10Efet nim kmoen ni, là bud le mogot bè benwu Juda ne yó kem tau Idom. Senged se yóm benwu Libna bè yóm kdaw yó, natuen se kun yóm benwu Juda, abay se deng kenbê Jihuram Dwata yóm Dwata yó kem tehe fuen. 11Lelen yó he wen gónô tmaba ebè dwata kéng hdaen ta yó kem bulul bè Juda, nalaken yó kem tau bè Jirusalim ne yó kem tau bè Juda tmaba ebè yó kem dwata kéng.
12Omin Ilaydya yóm tugod Dwata, smulat ebè Jihuram, monen,
“Ni se udél Dwata ebéléem, yóm Dwata fuem Dabid. Là kô dog loloem du yóm hyu tehe gel nmò maem Jihusafat, dalang se yóm kun nmò yóm téméem Asa tehe tau hol geta bè Juda. 13Mom loloem yóm ksidek nmò yó kem tau hol geta bè Israél. Deng nwitem lu tmaba ebè dwata kéng yó kem tau bè Jirusalim ne yó kem tau bè Juda, lómón yóm tehe nmò Ahab yóm tau hol geta bè Israél. Balù yó kem hol dumum sulil lem, deng mom hnatayem lu, kem tau hyu kmò le sentahem. 14Duhen yó, wen hlayam hwit Dwata ebéléem ne ebè yó kem tauhem ne ebè yó kem ngaem ne ebè yó kem yehenem ne bè kdê yó kem nfunem. 15Angat wen des bè tnahi gnómem, ne tey leed efet muluk tnahihem.”
16Omin Dwata hebut yó kem Flistin ne yó kem Arab menwu moni bè yó kem tau Ityupya anì nundug le Jihuram. 17Nundug le Juda, gotu genbà le yó kem beng hilolen, ne gotu negef le yó kem kimu mebtes nô bè gónô bong yóm tau hol geta, gomong negef le yó kem ngaen logi ne yó kem yehenen. Tek són Ahasaya yóm ngaen són twoli yóm dù tebel.
18Kogolen bè yó, wen des bè tnahi hwit Dwata ebè Jihuram, ne tey leed. 19Timbow deng yóm lewu halayen bè yó, tódô muluk tnahi Jihuram, ne matay bè yóm alì ksidek kegnómen du. Là kô wen ofi hbong yó kem tau mò ilô yóm kadat le du, lómón yóm tehe gel nmò le bè yó kem fuen. 20Bè yóm kbut Jihuram baling tau hol geta, deng tlu folò lewu ne halayen, ne wolu halayen kmamal nô bè Jirusalim. Bè yóm katayen, balù sotu ke wen lemangag du. Lebeng le bè Syudad Dabid, okóm là kô lebeng le du bè yóm kul gónó lembeng yó kem tau hol geta.
Currently Selected:
2 Tutul Israél 21: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
