2 Tutul Israél 23
23
Katù le ke Boi Atalaya
(2 Bok Kem Tau Hol Geta 11:1-21)
1Tikóng bè yóm ghituhen halay kogot Atalaya, wen atul nmò Jihuyada yóm tau gel blóng ebè Dwata. Gotu htabahen yóm limu kem kmandér bè yó kem sendalù le Asaraya ngà Jihuram, ne Ismaél ngà Jihuhanan, ne Asaraya ngà Ubid, ne Maasiya ngà Adaya, ne Ilisafat ngà Sikri. 2Hógówen lu ebè klamang Juda ebè yó kem sfu Libay ne ebè yó kem malak bè ket tbong Israél anì gotu le stifun ebè Jirusalim. 3Gotu le stifun bè Gónô Dwata, wen senfasad le bè yó bè Juas yóm tau hol geta hanà tolo ngà.
Yó mon Jihuyada mò kul, “Ni se ngà yóm tehe tau hol geta. Deng duhen ni se yóm kdaw kbuten kmamal benwu, lómón yóm deng tehe fasad Dwata ke Dabid, lemwót bè kun ktol mò fen gel kmamal yóm benwu tekuy. 4Ni mò hol nmò ye. Ke deng le kól bè ni yó kem tau gel blóng ebè Dwata ne yó kem tau sfu Libay bè yóm kmò le nmò bè kdaw kehegnô, sólól ye bè tlu bung. Yóm tanay bung mò fen mentey ditu bè yó kem bak tikeb yóm Gónô Dwata, 5ne yóm gewuhen bung mò fen mentey bè gónô bong yóm tau hol geta, ominen yóm getluhen bung mò fen mentey ditu bè yóm bak tikeb bnoluy le bak tikeb hembegel. Ne kdê yó kem dumu tau, gotu le stifun bè lósól yóm Gónô Dwata. 6Hol béen abay wen husek elem yóm Gónô Dwata, olon yó kem tau gel blóng ebè Dwata ne yó kem sfu Libay, yakà mólós le se kul. Okóm yó kem dumu tau, hol lolò le yóm hlolò Dwata kul, tódô le nô bè lewà. 7Yu kem sfu Libay, hol snibut ye yóm tau hol geta, ket tau eles nogoten yóm kun ngom sfatay. Ke wen tau husek elem Gónô Dwata, hnatay ye. Eles ye tendo nô klohok yóm tau hol geta.”
8Tahu se, nmò yó kem sfu Libay ne yóm kdéen tau bè Juda yóm kdê hmò Jihuyada kul. Yó kem kmandér gotu sentifun le yó kem tau sut na e mò nmò bè yóm Kdaw Kehegnô, dalang se yó kem tau deng deng yóm kul nmò, bud sentifunen lu snéen. Baluen ke deng deng yóm kul gel nmò, là kô tagad hulék Jihuyada kul. 9Gotu blay Jihuyada ebè yó kem kmandér yó kem buyus ne yó kem klung tehe nfun Dabid yóm tau hol geta deng henyu le lem Gónô Dwata. 10Yó hmoen kul, gotu suen lu hmilol yóm tau hol geta, sket kul mogot yó kem ngom le sfatay. Mdà le gu hilol yóm Gónô Dwata ne yóm gónó gel demsù, botong kbentey le yóm tau hol geta.
11Omin Jihuyada ne yó kem ngaen logi hefewà ke Juas yóm ngaen logi yóm tehe tau hol geta, ne ominen smuub kuruna bè kuluhen. Blayen du yóm snulat hlolò Dwata mò lolò yóm tau hol geta bè kogoten benwu, ne ominen heglalag du Juas yóm tau hol geta bélê le. Wen hnolo twélen ta kuluhen mò ilô yóm deng kegetahen, ne gotu le mensag yóm kdéen tau, mon le, “Hol tahà he klowil yóm tau hol geta.”
Katay Boi Atalaya
12Timbow gungol Atalaya yóm tey kehebnes yó kem tau ne yóm tey kdóyón le yóm tau hol geta, yó gónón mógów ebélê le ditu bè Gónô Dwata. 13Ne tódô tonen yóm lomi tau hol geta mdà bè yóm hehek botu bè gónó husek, yó se yóm sana kul adat, mdà gu hilolen yó kem kmandér ne yó kem tau myuf féw, ne kdê yó kem tau lemwót bè klamangen benwu le, gotu le hligal lel le mféw. Lel yó kem tau semngal hmung le bè yóm gel nuni le, lu se malak yó kem tau bè yóm tey kehligal le yó. Bè yóm kton Atalaya du nim kdéen ni, tódô kenséen nesen, botong ksidek kegnómen du ominen htê, monen, “Kem tau heklabak! Kem tau hton dóyón!”
14Omin Jihuyada yóm tau gel blóng ebè Dwata, mdók yó kem kmandér bè yó kem sendalù fen mentey, monen mò kul, “Nit ye hewà, bê ye abay hnatay bè ni lem Gónô Dwata. Ne ke wen tau tô mofin du, hnatay ye.” 15Tahu se, kenfô le, omin le mit du hewà bè yóm bak tikeb gónón gel husek kudà ebè gónô tau hol geta, ne bè yó gónó le hmatay du.
16Ominen yó nmò Jihuyada, hefasaden yóm tau hol geta ne yóm kdéen tau anì gotu le baling kem kun tau Dwata, ne bud gomong fmasad snéen kun. 17Omin le gotu mógów ebè gónô Baal yóm kdéen tau, gotu genbà le yóm gónóen. Ne yó kem gónó le gel demsù ebéléen, ne yóm lenngeden, gotu lenusok le. Ne hnatay le Matan, yóm tau gel blóng ebè Baal, bè solu yó kem gónó le gel demsù ebè Baal.
18Omin Jihuyada hogot du yó kem sfu Libay gel blóng ebè Dwata yóm Gónô Dwata, lómón yóm deng kun kmò du Dabid. Lu se demsù du ebè Dwata yó kem dsù gel hkekeb le ebéléen yó kem tau, lómón yóm deng snulat bè hlau Musis. Bud lu fen mogot du yó kem tau gel hligal semngal ebè Dwata, olò le bè yóm deng hlolò Dabid kul. 19Bud wen kem tau hbentey Jihuyada bè yó kem bak tikeb yóm Gónô Dwata anì laen dù tau là dengen hólós husek.
20Kewót Jihuyada bè yó gu bè Gónô Dwata, nwiten yó kem kmandér, ne yó kem genlal, ne yó kem tmuha gónó le gel galak, ne kdê yó kem tau na le e eted Juas yóm tau hol geta ebè gónô bong. Mlan le etu bè yóm bak tikeb fi leged ne hlós le ebè gónô bong. Bè yóm kkól le lemen, hyón le Juas yóm tau hol geta eta yóm bangkù gónón gel myón kmamal yóm tau hol geta. 21Duhen yó, tódô kdê yó kem tau bè klamangen benwu le, gotu le hligal, ne tey menek lem yóm syudad kogol yóm khatay le ke Atalaya.
Currently Selected:
2 Tutul Israél 23: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
