2 Tutul Israél 20
20
Kwit le sgida bè Israél yó kem tau Muab ne yó kem tau Amun ne kem tau Idom
1Kogolen bè yó, lemwót yó kem tau Muab ne kem tau Amun, ne wen kem tau Munayt mung kul na le e gnida Jihusafat. 2Wen kem tau mit tulón ebè Jihusafat, tulón le du, mon le, “Tey sendalù wen lemwót bè Idom mundug kóm hesut le gu sentu Mohin Héét. Deng le kól bè Hasason-tamar ne.” (Yó se sotu boluy le yóm benwu In-gidi) 3Botong likò Jihusafat, tódô kendel mni bè Dwata ke tedu nmoen. Kendel heglalagen bè klamang Juda ke hol le fasting yóm kdéen tau. 4Tahu se, tódô kdéen tau nô bè yó kem benwu glem lem Juda, gotu le stifun ebè Jirusalim mni le bè Dwata bè yó.
5Yó nmò Jihusafat, mdà bè solu yóm kdéen tau Juda ne kem tau bè Jirusalim deng stifun bè yó bè yóm lomi lósól bè Gónô Dwata. 6Mni bè Dwata, monen, “Ó Dwata yóm Dwata yó kem tehe fù me, tek són uu se yóm Dwata nô bè longit. Uu se mogot kul yóm kdéen benwu tau talak tonok. Teyi mfasang, ne gotu gbekem kdéen. Laen kô dù gembek kóm. 7Ó Dwata yóm hol kum Dwata, deng tehe gotu lohem lu yó kem tau tehe fun nim tonok ni bè yóm tehe kegdek yó kem kóm tau. Ne deng blayem bè yó kem sfu Abraham yóm weem, nim tonok ni ne laen kô dù tul sónen yóm keblayem du kul. 8Deng le menwu bè ni yó kem kóm tau, ne deng le se hemdà béléem yóm gónô mò mit yóm kóm boluy. Yó mon le, 9‘Ke wen glumfak tekuy lómón gida, duhen ke des mit hatay, ne duhen ke bitil bong, mógów me ebéléem ne mdà me bè soluhem bè yóm kóm gónô, yakà nóen bè yó yóm kóm boluy. Bè yó se hol gónó me htóbóng béléem anì lenwaem mi, ne tahu se, gel hnungolem mi ne lenwaem mi.’
10Ne ni, hnénégem dé yóm nmò yó kem tau Amun, ne tau Muab, ne kem tau lemwót bè bulul Sér. Bè yóm tehe kehewà le gu bè Idyip yó kem tehe fù me ekni, là kô hundugem du kul yó kem benwu ni kem tau ni. Tódô nius le, là kô genlà le kul. 11Tenngelem dé yóm balà le kum. Deng mom nundug le mi anì hdó le mi ta yóm kóm tonok deng blayem kum mò nfun me. 12Ó Dwata yóm hol kum Dwata, là genlaem kul kô bè nim nmò le ni? Là kô gbek me gemmò bélê le ni kem tey genged sendalù alì mbegel tô mundug kum ni. Là tngón me du ke tedu nmò me, okóm són uu gónó me e temngel mò tmóbóng kum.”
13Yóm igò le mdà bè solu Dwata yó kem logi bè Juda mung kul yó kem yehen le ne kem ngà le ne kem ngà hanà udì le, 14tódô sut yóm Tulus Dwata bè yóm sotu tau mdà bè yó. Yó boluyen Jahasayél ngà Sikaraya, yóm Sikaraya ngà Binaya, yóm Binaya ngà Jiyél, yóm Jiyél ngà Manataya, tau Libay semfu gu bè Asaf. 15Yó udélen bè yóm tau hol geta, monen, “Hmungoli, Jihusafat. Ne yu kem tau bè Juda ne kem tau bè Jirusalim, hol ye hmungol se kuy yóm kdê ye. Ni se udél Dwata ebélê ye, monen, ‘Hol bê ye abay hlikò. Hol bê ye abay hunu nawa ye bè yó kem tey genged sendalù yó, abay se Dwata mit kul sgida, là kô yu du.’ 16Haya, nundug ye lu. Angat ton ye lu mneged bè yóm lan bè tonok Sis bè hol són yóm datal hlós ebè yóm benwu laen hol wen tauhen bè Jiruwél. 17Okóm là kô yu du mit kul sgida. Olo ye tódô htuhod mdà, tenngel ye yóm kegmò Dwata bélê le yó kem hohon ye. Ó kem tau bè Juda ne kem tau bè Jirusalim, Dwata se nô bélê ye. Hol bê ye abay hlikò, ne bê ye abay hunu nawa ye. Haya mógów ye etu, abay se nô bélê ye Dwata.”
18Omin Jihusafat mtud uyóhen bè tonok, ne dalang se yóm kdéen tau Juda ne tau bè Jirusalim, bud yó snéen kul nmò, ne dóyón le Dwata. 19Omin le mdà yó kem sfu Libay tbong Kuhat ne Kura, dóyón le Dwata yóm Dwata yó kem tau Israél, mung du yóm tey hensag le.
20Hol hlafus hayahen bè yó, gotu le btik yó kem sendalù Juda, mógów le ebè yóm benwu laen hol wen tauhen bè Tikuwa. Bè yóm hanà knô le bè lan, htengen mdà Jihusafat, ne yó udélen ebè yó kem tau, monen, “Ó kem tau Juda ne kem tau bè Jirusalim, hnungol ye ou yóm kdê ye. Hentahu ye Dwata yóm Dwata hol kuy gónó mogot, anì mbegel ye. Hentahu ye yó kem tugoden anì wen gónón e kól yó kem nmò ye.” 21Tikóng deng kestulón Jihusafat bè yó kem tau gel malak, ominen wen kem tau hulung semngal néléken mò semngal dmóyón ke Dwata tukô gna yó kem sendalù, bede heseken kul yóm nes gel lesek le ke wen bantang hnigal le. Ni se sngal le,
“Hol tekuy slamat ebè Dwata,
Yóm kbong nawan tekuy là kóen na a monol ne laen kô dù nan e són.”
22Yóm igò le tolo mbut du yóm kesngal le dmóyón ke Dwata yó, sen-geng Dwata se semfatay kul honon lu yó kem tau Amun ne kem tau Muab ne kem tau lemwót bè Sér. 23Yó kem sendalù Muab ne kem sendalù Amun, deng mom beklil nit le sfatay yó kem kul dumu slomong lemwót bè bulul Sér, ne gotu hnatay le lu yóm kdê le. Tikóng deng gotu khatay le kul, omin le sfatay honon lu yó kem sendalù Amun ne sendalù Muab.
24Duhen yó, bè yóm kkól yó kem sendalù Juda ditu ta bulul bè yóm benwu laen hol wen tauhen, kihu gónó le e temngel tódô hgasà tau matay. Balù sotu ke wen mowil bè yó kem hohon le. 25Tódô mógów ebélê le etu Jihusafat mung du yó kem sendaluen anì na le e nwa yó kem safì le. Tey ngom sfatay yóm ton le, lel yó kem tey nes, ne yó kem dumu kimu wen btesen, botong là gbek le mit du. Tey kimu wen nwa le bélê le, botong tlu kdaw le semtifun kul. 26Tikóng bè gfaten kdaw, gotu le stifun bè Datal Tóbóng. Ne efet nim kmoen ni sana kboluy le du Datal Tóbóng yóm datal yó, abay se bè yó gónó le dmóyón ke Dwata yó kem tau lel le slamat béléen.
27Omin le semfulék ebè Jirusalim yó kem sendalù Juda, tukô gna kul Jihusafat, mung du yóm tey kehligal le bè yóm kehegmò Dwata kul bè yó kem hohon le. 28Bè yóm kkól le bè Jirusalim, tódô le hlós ebè Gónô Dwata igò le huni yó kem gel kenbit le lel le mféw. 29Tikóng gungol yó kem benwu hmilol yóm kwit Dwata sfatay bè yó kem hohon yó kem tau Israél, ya tey klikò le ke Dwata se kul. 30Duhen yó, tey menek yóm benwu nogot Jihusafat, abay se yóm kun Dwata fen henek yó kem benwu hmilol du.
Yóm hol són kogot Jihusafat benwu
31Duhen yó, deng nogot Jihusafat yóm benwu Juda. Bè yóm kbuten mogot benwu, deng tlu folò limu ne halayen. Yó kegenen mogot benwu, lewu folò limu halay ne bè Jirusalim hlós gónón nô. Yó boluy yéen Asuba ngà Silhi libun. 32Nim Jihusafat ni, tilob kogoten benwu, loloen yóm kun gel nmò yóm tehe maen Asa. Sal hyu yóm gel nmoen bè kton Dwata du. 33Okóm bè yóm kegenen mogot benwu, là sulék kóhen du yó kem gónó le gel demsù bè yó kem dwata kéng. Yó gónóm mon, là sù le du lem but blutut le yó kem tau nogoten yóm klolò le du yóm Dwata yó kem tehe fù le. 34Kdê yó kem nmò Jihusafat bè yóm klawihen kmamal benwu, lemwót bè kbuten efet kól bè sónen, deng gotu snulat Jihu ngà Hanani bè yóm Bok Kul Tutul Yó Kem Tau Geta Bè Israél.
35Okóm bè yóm móyón hol són kogot Jihusafat yóm benwu Juda, nan na gfi bè Ahasaya yóm tau hol geta bè Israél, yóm tau hol geta alì mò sidek. 36Slomong le hmò kem kafal mò udél swa bè yóm sotu syudad nô bè kilil mohin boluyen Isyun-gébél. 37Okóm wen udél htugod Dwata ke Ilisér ngà Dudabahu bè Marisa eta Jihusafat, monen mò du, “Lemwót bè yóm deng kegfihem bè Ahasaya, genbà Dwata yó kem hmò ye.” Tahu se, gbà yó kem kafal le bè yóm gónó le mò du, là kô le gógów, bà sulék ke mówóng le ta mohin.
Currently Selected:
2 Tutul Israél 20: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
