2 Tutul Israél 15
15
Kwit Asa kul semfulék ebè Dwata
1Wen Tulus Dwata sut bè yóm sotu tau boluyen Asaraya ngà Udid. 2Yó nmoen, senlongen Asa yóm tau hol geta, bè yóm kkólen gu bè gida, hgelen udélen monen mò du, “Hnungolem ou, ne yu kem sendalù Juda ne Bindyamin. Tendo nô bélê ye Dwata ke henek ye béléen. Ke hnebel ye, angat henmóyóen yu. Okóm ke tebel ye, angat tebelen yu se kun. 3Deng legen ne, laen dù tahu Dwata le yó kem tau Israél, laen kô dù tau blóng le ebè Dwata mò tmolok kul, ne laen se dù hlau lolò le. 4Okóm ke wen hlayam le, hnebel le Dwata yóm Dwata yó kem tau Israél, ne henmóyóen lu. 5Bè yó kem kdaw yó, là hyuhen bè kem tau ke mógów le, abay se tey sbeweg lem benwu le. 6Sfatay kem benwu, ne sfatay kem syudad, abay se monem, Dwata mò du bélê ye. 7Okóm ni, kem logi bè benwu Juda hol ye hbegel, ne hfól ye nawa ye, abay se wen ofol ye du yó kem nmò ye.”
8Bè yóm kungol Asa du yóm tulón Asaraya ngà Udid yó yóm tau tugod Dwata, botong mfól nawahen. Gotu kóhen yó kem dwata kéng hentahu le bè klamang Juda ne Bindyamin ne bè yó kem benwu deng gleden gu lem yó kem bulul bè tonok Ifraim. Bud tenloben yóm gónó gel demsù ebè Dwata moni bè yóm gónó le gel husek elem yóm Gónô Dwata.
9Omin Asa gotu semtifun kul yóm kdê tau bè Juda ne Bindyamin, gomong yóm kdê tau bè Ifraim ne bè Manasi ne bè Simyun deng menwu lem blóng le. Tey dê tau lemwót bè Israél fi bwak mili ebè Juda bè yóm kton le du yóm knô Dwata bè Asa yóm kun Dwata hol gónó mogot. 10Gotu le stifun ebè Jirusalim bè yóm getluhen bulón bè yóm gesfoloen limu halay kyón Asa yóm tau hol geta. 11Bè yóm kdaw yó, wen bè yó kem ógóf deng negef le bè gida dsù le ebè Dwata, hitu latu safì ne hitu libu ubiha. 12Ominen wen senfasad le Dwata, duhen yóm hol kehewót le du lem but blutut le yóm klolò le ke Dwata yóm Dwata yó kem tehe fù le. 13Ke wen tau là lemolò ke Dwata yóm Dwata yó kem tau Israél, hnatay le kmò le du baluen ke lomi lemnok duhen ke deng tuha, baluen ke libun duhen ke logi gotu hnatay le. 14Smafà le ebè Dwata, hgel le udél le, mung du hensag le, ne tey wen yó kem féw huni le. 15Tódô kdê yó kem tau Juda, gotu le hligal bè yóm ksafà le yó, abay se hol lemwót lem but blutut le yóm ksafà le, ne hol lemwót bè nawa le yóm kebel le ke Dwata, ne henmóyóen lu. Ne benlay Dwata lu kenek kbenwu.
16Balù yóm bé Asa boluyen Maaka, botong hdó Asa yóm tau hol geta, bè kboihen lanen hmò yóm dwata libun alì kenbê boluyen Asira. Gotu hofok Asa yóm dwata lennged yó, ne lenusoken, ne ntemen ditu bè Datal Kidron. 17Balù yóm là dog sulék kegbà Asa kul yó kem dê gónó le gel hemsù kul yó kem dwata kéng yó bè klamangen Israél, sana yó ne kehteneben lemolò ke Dwata bè yóm klawihen mowil. 18Gotu nwiten ebè Gónô Dwata yó kem blówón bukay ne yó kem tahu blówón ne yó kem dumu ngom deng tehe hfun le ke Dwata lewu le maen. 19Duhen yó, laen kô dù bud gida bè benwu le efet kól bè getluhen folò limu halay Asa mogot benwu.
Currently Selected:
2 Tutul Israél 15: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
