2 Tutul Israél 14
14
Kbut kogot Asa benwu
1Bè yóm katay Abidya, lebeng le bè syudad Dabid. Yóm ngaen boluyen Asa bud tles tau hol geta. Bè yóm kun kdaw Asa, botong sfolò halayen na menek yóm benwu le. 2Sal gel hyu yóm nmò Asa, ne tedeng bè kton Dwata du yóm Dwata hol kun gónó mogot. 3Gotu kóhen yó kem gónó demsù ebè yó kem dwata kéng, ne yó kem gónó le tmaba kul. Gotu hlusoken snéen yó kem hehek botu le, ne hofoken hehek yóm dwata libun boluyen Asira. 4Yó hloloen yó kem tau bè Juda, hol hnebel le Dwata yóm Dwata yó kem tehe fù le, ne hol nimón le yó kem hlolò Dwata kul dalang se yó kem kun hlau. 5Gotu kó Asa bè klamang yó kem syudad bè Juda yó kem gónó le tmaba dwata kéng, ne yó kem gónó le gel mtem insinsu ebélê le. Bè yóm klawi Asa mogot yóm benwu Juda, wen se halayen menek kbenwu le. 6Yóm igoen menek benwu le, wen kem syudad hefbegel hefdaen. Laen kô dù dumuhen sgida bè yóm halay yó, abay se benlay Dwata lu kenek kbenwu. 7Yó udél Asa ebè yó kem tau bè Juda, monen, “Hol hebegel tekuy yó kem syudad, ne hol hbegel tekuy yó kem beng hilolen, ne yó kem gónô geta gónó le gel mentey, ne yó kem bak tikeben ne yó kem hgeten. Tekuy se funen yóm benwu ni, abay se són Dwata yóm deng nimón tekuy yóm kut Dwata hol gónó mogot. Deng heneken klamangen benwu tekuy.” Tahu se, tey kehbegel le du yó kem syudad le, ne tey kehyu klowil le.
8Yó kwen sendalù Asa lemwót bè ból Juda, botong tlu latu libu, hono eles mit klung lembang ne buyus, ne lewu latu wolu folò libu lemwót bè ból Bindyamin, hono le mit klung ne boho. Yóm kdê le ni, hono le kem tau alì layam bè sgida.
9Lemwót Sira yóm tau hol geta bè yóm benwu Ityupya gdek bè syudad Marisa. Botong skati sendalù mung du, ne tlu latu kem sendalù mit klitun tók. 10Kewót Asa bè yó se kun nan e semlong mundug, ne bè yó gónó le sgida bè datal Sifata moni bè Marisa. 11Yó udél Asa hkodu bè Dwata yóm kun Dwata hol gónó mogot, monen, “Ó Dwata, tek són uu gembek tmóbóng kul yó kem sendalù laen hol gmò le bè yó kem sendalù alì layam. Hol tnóbóngem mi, Dwata yóm kum Dwata hol gónó mogot, yakà uu du yóm kum snalig. Ne mlan bè boluyem gónó me mógów ebè ni smolu ni kem tey sendalù wen ni. Ó Dwata uu se yóm kum Dwata, hol béem hlus ke gemmò béléem yó kem tau tonok.”
12Duhen yó, gemmò Dwata bè yó kem sendalù Ityupya yóm igò Asa ne kem sendaluen gmida kul, ne gotu le mlóy yó kem hohon le. 13Ngang Asa ne yó kem sendaluen kemtes kul efet kól etu bè Girar, ne ya tey kwen yó kem sendalù Ityupya matay. Duhen yó, là kô bud gbek le semtifun kul yó kem dumu sendalù Ityupya ke mò tô mundug ke Asa. Genlà Dwata lu ne yó kem sendaluen, ne ya tey kwen negef yó kem sendalù Juda. 14Gotu genlà yó kem sendalù Juda yó kem syudad hmilol Girar, abay se glumfak yó kem tau bè yó yóm alì klikò le ke Dwata. Hol kimu wen yóm negef le lem yó kem syudad bè yó. 15Gu laan le là deng mulék ebè Jirusalim, na le bud nundug kamfù yó kem tau semgyok ógóf, ne tey ubiha ne kambing ne kamél wen negef le.
Currently Selected:
2 Tutul Israél 14: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
