2 Tutul Israél 10
10
Katù le ke Rihubuam yó kem tau Israél fi bwak
(1 Bok Kem Tau Hol Geta 12:1-20)
1Lemwót Rihubuam, mógów ebè Sékém bè yóm gónó le deng gotu stifun yóm kdéen tau Israél mò hembaling du tau hol geta. 2Timbow gungol Jirubuam ngà Nibat, yóm deng katay Selumun, ominen bud mulék gu bè Idyip, yóm benwu tehe hlun gónón nô bè yóm kehlóyen ke Selumun yóm tau hol geta. 3Lemwót yó kem tmuha gel malak bè Israél, htaba le Jirubuam, ne omin le gotu mógów ebè Rihubuam ne mon le mò du, 4“Yóm maem Selumun, tey blat yóm hbóen kum. Ke kóhem ta me dumu yóm blat hbóen kum yó, ne ke kóhem dumu yóm bwis hbayaden kum yó, lolò me uu.”
5Yó balà Rihubuam kul, monen, “Na ye na hefedem ou tlu kdaw. Omin ye bud semfulék edini, ne tulónu kuy balà yóm nóyô ye.” Tahu se, omin le yó lemwót.
6Yó nmò Rihubuam yóm tau hol geta, smólók bè yó kem tmuha tehe gónó maen Selumun, gel hmungol hlau. Yó snólóken bélê le, “Tedu se hlau ye do du mò balau kul yó kem tau sut béléu yó?”
7Mon le se, “Ke hol nô bè nawahem tmóbóng kul yó kem tau yó, ne ke hol hendemem yóm deng hni le béléem anì hyu kbalaem kul, hlós lolò le uu.”
8Okóm là kô dog hnungol Rihubuam du yóm hlau le du yó kem tmuha yó, deng mom bud smólók bè yó kem lomi tau dumun senok, ne deng mom lu nmoen mò gel hmau du. 9Yó snólóken bélê le, “Tedu se hlau ye dou du? Tedu se hlau ye dou du mò balau kul yó kem tau móyô du ke kóhu ta le dumu yóm blat hbô mà kul?”
10Yó mon le mò du yó kem lomi tau, “Ni mò hol tulónem kul, monem, ‘Yóm dou tnii, bong senta ówók mà he. 11Tahu se, blat yóm hmò mà kuy. Okóm mkay senta yó he keblaten yóm dou hmò kuy. Gel nfes ma yu tébéd, okóm dou, syufón fesu kuy.’ ”
12Timbow deng tlu kdawen bè yó, bud le semfulék ebè Rihubuam le Jirubuam ne kdê yó kem tau, lómón yóm deng monen mò kul. 13Okóm tey sidek udél Rihubuam ebélê le, là kô dog hnungolen du yóm hlau le du yó kem tuha. 14Tódô loloen yóm hlau le du yó kem lomi lemnok. Yó monen mò yó kem tau, “Tey keheblat mà du yóm hbóen kuy, okóm mkay senta yó he keblat yóm dou hmò kuy. Gel nfesen yu tébéd mà, okóm yóm dou, syufón fesu kuy.” 15Duhen yó là kô dog hnungol Rihubuam kul yó kem tau. Yóm nmoen yó, deng kun kmò du Dwata, gónón dohò yóm deng htugod Dwata ke Ahidya yóm tugod Dwata lemwót bè Silu, gbak ebè Rihubuam ngà Nibat.
16Timbow tngón yóm kdéen tau Israél nô fi bwak yóm kekbê yóm tau hol geta du yóm hni le, gotu le hetê, mon le, “Laen kô dù kut du yóm Dabid ne yóm kun ktol. Laen dù kut du yóm ngà Jisi yó. Ó kem tau Israél, mulék tekuy ne. Tódô uu ne, Rihubuam, mebel du yóm dê hnihem.” Tahu se, gotu le mulék yó kem tau Israél. 17Okóm ke Rihubuam, són olo knamalen, tek són yó kem tau Israél menwu fi leged bè benwu Juda.
18Omin Rihubuam yóm tau hol geta hógów ke Adoniram yóm tau malak yó kem tau alì danda dók le mò nmò, hógówen ebè yó kem tau Israél fi bwak mò stulón kul. Okóm deng mom hnatay le, sentudà le botu. Timbow gefet bè Rihubuam yóm tau hol geta nim nmò le ni, yó gónón hetlasik smakay klitun tók mlóy ebè Jirusalim. 19Lemwót bè tum kdaw tu efet nim kmoen ni, baling hohon kem tau Israél fi bwak yó kem ktol Dabid fi leged. Baling hohon kem tau Israél fi bwak yó kem fes lówó Dabid fi leged.
Currently Selected:
2 Tutul Israél 10: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
