1 Tutul Israél 29
29
Yó kem blay yó kem tau bè kehdà le yóm Gónô Dwata
1Omin Dabid mudél ebè yóm kdéen tau deng stifun bè yó, monen mò kul “Deng nélék Dwata yóm ngau Selumun mò tles tau hol geta bè Israél, bede hanà tolo ngà he, ne laen deng hol glanen. Tey bong yóm angat nmoen, abay se yóm Gónô hdaen, là kô gónô tau du, kaem gónô yóm Dwata hol gónó mogot. 2Deng hotuhu gelu semtifun du yóm kdê wen muhen du bè kehdaen yóm Gónô yóm dou Dwata. Deng wen sentifunu kem tahu blówón, ne blówón bukay, ne tembaga, ne bala tók, ne kem koyu ne kem botu mebtes boluyen unik, ne yó kem dumu botu mebtes sminang segkay beteken, ne tey wen kem botu marmol deng gotu sentifunu. 3Ne ni, lemwót bè yóm dou kegduf bè yóm Gónô yóm dou Dwata, tódô blayu bè Gónô Dwata yóm dou tahu blówón ne blówón bukay deng henyuhu mò tnù yó kem ngom yóm Gónô Dwata deng sentifunu. 4Yó kwen dou tahu blówón blay lemwót bè Ufir, lematu sfolò lewu libu kilu, ne lewu latu nem folò lewu libu kilu blówón bukay deng hló mò lafin yóm beng bè Gónô Dwata, 5ne mò nmò le yó kem dumu wen mu le du yó kem tau wen kenhulung tdok le. Duhen ni, tau du de bud móyô bemlay ebè Dwata kemdaw ni?”
6Duhen yó, gotu le bemlay yó kem malak bè ket fes lówó yó kem tbong Israél, yó kem kmandér malak bè libuhen ne yó kem kfitan malak bè latuhen, ne yó kem genlal bè yóm tau hol geta, tódô lemwót lem but blutut le yóm keblay le. 7Yóm kwen yó kem tahu blówón blay le ebè yóm Gónô Dwata hdà le, botong lematu wolu folò wolu libu kilu tahu blówón, ne sfolò libu botù filak blówónen, ne wen dô tlu latu hitu folò limu kilu blówón bukayen, ne wen dô nem latu hitu folò limu libu kilu tembagahen, ne wen dô tlu libu bud hitu latu limu folò kiluhen bala tók, gotu blay le ebè yóm Gónô Dwata hdà le. 8Yó kem tau wen botu sminang mebtes le, gotu bud blay le se kul yó kem botu sminang le yó, ne henyu le bè yóm gónó hemyu kimu mebtes bè Gónô Dwata, ne Jihiyél fen gónó le smigang du, yóm tau semfu gu bè Gérsum. 9Ya tey kehligal yó kem tau lemwót bè yóm hol kewóten lem but blutut le yó kem blay le ebè Dwata yó, dalang se ke Dabid, tey kehligalen se kun.
Kdóyón Dabid ke Dwata
10Omin Dabid dmóyón ke Dwata lem blóng yó kem tau deng stifun ebè yó, yó monen, “Ó Dwata yóm Dwata yóm fù me Israél, hol laen dù tul sónen he yóm tendo kdóyón me kóm. 11Uu se, Dwata, yóm hol geta, laen dù là gbekem du. Bud uu se yóm alì knóón, yóm gel gemmò bè kem hmohon kóm. Uu se yóm hol dandónen geta. Yóm kdê nô bè longit ne te tonok hono kóm funen, Dwata. Uu se kmamal yóm klamangen. Bud uu se yóm hol dandónen geta senta yóm kdéen. 12Lemwót béléem yóm kendengen tau ne yóm kadat le kul, yakà uu du mogot yóm klamangen. Lemwót lem hólólem yóm tey kfasang ne yóm tey kegbek. Bud lemwót béléem yóm kegeta tau ne yóm kgis le.
13Duhen ni, uu se Dwata me, slamat me béléem, ne dóyón me yóm tey klinggel boluyem. 14Okóm tmau dou de ne tmau kul de yó kem dou tau ke mi bemlay kóm? Igoen uu se gónón lemwót yóm kdê nô bélê me. Yóm blay me kóm ni, hono tehe lemwót béléem. 15Yóm knô me bè ni, tek likóten lómón ke tau me milo ne tau me lawa, mkél me bè yó kem tehe fù me ekni. Yóm klowil me dini talak tonok, lómón olung là kóen legen.
16Ó Dwata yóm hol kum gónó mogot, yóm kdê ni kem tey genged deng sentifun me ni bè kehdà me yóm Gónô mò gónón megdóyón yóm kóm boluy, hono lemwót béléem, kóm se funen. 17Tngónu se, Dwata, gel henklolem yóm nô lem but blutut me, ne teyi hligal ke tonem yóm kgulit me. Nim kdê blayu ni, hol lemwót lem but blututu, ne deng hol tonu bè yó kem tauhem nô bè ni yóm hol kewóten lem but blutut le se kul yó kem blay le kóm, mung du yóm tey kehligal le.
18Ó Dwata yóm Dwata fù me Abraham, Isak ne Israél, hol tendo suem lem hendem yó kem kóm tau yóm klaen kô dù tul sónen yóm óyô le mimón kóm. Hol tnóbóngem lu anì là megetlesen yóm kbong nawa le kóm. 19Blayem ke Selumun yóm ngau yóm óyô mimón du kdê yó kem hlauhem dalang se yó kem dumu hloloem kum. Hol blayem du yóm óyô hemdà yóm kóm Gónô, yakà deng gotu sentifunu du yóm kdéen.”
20Omin Dabid mudél ebè kdê yó kem tau deng stifun, monen, “Hol dóyón ye yóm sana kuy Dwata hol gónó mogot.” Tahu se, ya tey kdóyón le ke Dwata yóm kdê le deng stifun bè yó, dóyón le yóm Dwata yó kem tehe fù le. Gotu le kudung, tud le bukol le bè solu Dwata ne bè solu yóm tau hol geta bélê le.
Kbaling Selumun tau hol geta
21Hayahen bè yó, demsù le ebè Dwata yó kem tau Israél, ne wen yóm dsù hkekeb le ebéléen. Botong lemibu safì tudu dsù le, ne lemibu kambing logi, ne bud lemibu se kem ngà ubiha logi. Wen se yóm gel ninum dsù le, ne yó kem tey dumu dsù nmò le bè yóm kdê tau Israél. 22Tey kehligal le mken ne minum bè yó bè solu Dwata bè yóm kdaw yó.
Ne bud suub le bè kulu Selumun yóm ngà Dabid yóm kuruna ilô yóm kbalingen tau hol geta bélê le, tenwél le hnolo ta kuluhen bè yó bè solu Dwata mò malak kul. Dalang se ke Sadok, tenwél le hnolo ta kuluhen mò blóng le ebè Dwata. 23Duhen yó, Selumun tles myón bè yóm bangkù gónón myón kmamal maen. Tey kehyu klowilen, ne tey kimón le du yóm kdê tau Israél. 24Tódô kdê yó kem genlal ne yó kem kmandér, ne yó kem ngà Dabid logi, gotu le hogot bè Selumun. 25Ya tey kehegeta Dwata ke Selumun, ne tey wen klikò le du yóm kdéen tau Israél. Tey wen kendengen blay Dwata ke Selumun, mung du yóm tey kadat le du yó kem tau. Yóm kendengen blayen ke Selumun yó, mkay senta yóm kendengen tehe blayen ke Dabid yóm maen.
Katay Dabid
26Duhen yó, deng nogot Dabid ngà Jisi yóm klamang Israél. 27Yó kegenen mogot du, fat folò halay. Hitu halayen kegenen mogot yóm knóen bè syudad Hibron, ne tlu folò tlu halayen kegenen mogot yóm knóen bè syudad Jirusalim. 28Slong matay deng tey tuha, tey wen kendengenen, lelen tey wen tau madat du. Yóm ngaen Selumun bud tles mogot benwu. 29Yóm kdê gendeng Dabid bè yóm kogoten benwu nbuten bè kbuten efet kól bè sónen, deng gotu snulat bè Bok Samwél, yóm Tau Gel Wen Hton Dwata Du, ne bè yóm kun Snulat Natan, yóm Tau Tugod Dwata, ne bè yóm kun Snulat Gad, yóm sotu Tau Wen gel Hton Dwata Du. 30Deng gotu snulat le yóm kdê gendeng Dabid bè yóm klawihen mogot benwu, ne yóm kdê glanen, mung lemen yó kem tau Israél nogoten ne yó kem tólóng benwu hmilol.
Currently Selected:
1 Tutul Israél 29: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
