1 Tutul Israél 28
28
Yóm hlolò Dabid ke Selumun bè kehdà yóm Gónô Dwata
1Gotu sentifun Dabid lu ebè Jirusalim yóm kdéen tau genlalen bè Israél, yó kem malak bè ket tbong Israél, ne yó kem kmandér bè yó kem bung sendalù, ne yó kem kmandér malak bè libuhen, ne yó kem kfitan malak bè latuhen, ne yó kem genlal mogot yóm kdê nfun yóm tau hol geta, ne nfun yó kem ngaen, ne mogot yó kem ógóf le, kem genlal bè gónô bongen, ne yó kem sendalù deng alì layam bè gida, ne yó kem dumu sendalù, gotu sentifunen lu ebè Jirusalim. 2Omin Dabid hebkó mdà bè solu le, ne yó udélen ebélê le, monen, “Kem dumuhu setwoli ne kem dou tau. Hol hnungol ye ou. Deng hol nô bè nawahu hdà du yóm Gónô Dwata mò gónóhen tódô menek nô yóm Slungan Fasad Dwata, yóm gónóhen hmótól ti. Deng eles sentifunu yó kem ngomen, 3okóm wen udél Dwata ebéléu, monen, ‘Là kô uu du hefdà du yóm Gónô mò mit yóm dou boluy, yakà sendalui se kóm, ne deng tey wen litô namaem.’
4Igoen yó he, bè fes lówó mà laen kô dù tul sónen yóm deng kélék Dwata dou, yóm Dwata hol gónó le mogot yó kem tau Israél mò tau hol geta bélê le. Yakà deng tehe néléken yóm tbong Juda mò mogot benwu. Ne lemwót bè nim tbong Juda ni, néléken kun fes lówó mà. Ne lemwót bè kun fes lówó mà, néléken ou mò tau hol geta bè klamang Israél, ne tey kehyu nawahen bè yóm kéléken dou yó. 5Ne bè kdê yó kem tey ngà logi deng blay Dwata dou, nélék Dwata Selumun mò tles myón kmamal bè yó kem kun tau Israél. 6Yó deng udél Dwata ebéléu, monen, ‘Yó hem ngaem Selumun fen hemdà du yóm dou Gónô ne yó kem sù le bè lósólen, yakà deng néléku du mò ngau, ne ou se mò maen. 7Ke henlósen mimón du yó kem hlauhu ne yó kem dumu hlolou du lómón yóm nmoen ni, laen kô dù tul sónen yóm tendo kogot le benwu yó kem sfuhen.’ 8Duhen yó, hnungol Dwata nim ni, wen hlolou yóm kdéen tau Israél, yó kem kun tau Dwata. Hol ye temgama anì glolò ye yóm hlau yóm sana kuy Dwata hol gónó mogot. Ke ni se nmò ye, laen kô dù tul sónen yóm kfun ye du nim tey tonok hyu ni mò nfun yó kem ngà ye.
9Ne uu, ngau Selumun, yake holi setngón ke Dwata yóm Dwata yó kem fuem. Hol nmoem yóm hmoen kóm Dwata, ne hol hewótem lem but blututem yóm óyóem hol mimón du. Yakà yóm Dwata yó, gotu tonen yóm nô lem hendem yóm ket tau, ne gotu tngónen yóm kdê atulen ne kdê hendemen. Ke hnebelem Dwata, dohò se ktonem du. Okóm ke tebelem, bud laen kô dù tul sónen yóm kdohò yóm kekbéen kóm. 10Yó gónóm mon, hol hendemem nim ni, yakà deng nélék Dwata uu mò hemdà yóm kun Gónô mò gónóhen nô. Holi hbegel, ne nmoem yóm hmò Dwata kóm.”
11Omin Dabid bemlay du ke Selumun yóm kdê atul mò loloen bè kehdà yóm Gónô Dwata, dalang se yóm mò kmò le yóm gu hmilolen, gomong yóm gónó le gel hemyu yó kem kimu mebtes, ne yó kem dfél ta bè yóm Gónô Dwata, kem dfél lemen, ne yóm dfél hol nô lemen gónón nô yóm Slungan Fasad, yóm gónó Dwata hmifót salà yó kem tau. 12Gotu blay Dabid ke Selumun yóm kdê atul mò loloen bè kmoen lósól yóm Gónô Dwata, ne yóm kdê dfél hmilol du, ne yó kem dfél gónó le hemyu yó kem kimu mebtes deng hetfing le ebè Dwata, ne yóm dfél gónó le hemyu yó kem basa le ke Dwata yó kem tau, gotu ogu Dabid ke Selumun. 13Bud eles tulónen ke Selumun snéen yóm mò angat nmò le lem Gónô Dwata yó kem tau gel blóng ebè Dwata ne yó kem sfu Libay deng eles nólólen lu bè bung le. Bud eles tulónen du snéen yó kem ngom mò nô lem Gónô Dwata, yóm wen mu le du bè yóm ktaba le ebè Dwata ne bè yóm kedsù le ebéléen.
14Gotu hlolò Dabid du ke hilu kbong yóm tahu blówón ne yóm blówón bukay mò nmò le yó kem ket ngom wen mu le du lem Gónô Dwata. 15Tulónen ke Selumun snéen kbong yóm tahu blówón mò hmoen gónón myón solok mung du kem soloken hono tahu blówón, ne kbong yóm blówón bukay hmoen gónón myón solok bud mung du kem soloken hono tahu blówón. Ni kem solok ni, sal stólóng mu le du lem Gónô Dwata. 16Tulónen du snéen kbong yóm tahu blówón mò lafin le yóm lemisa gónó le hmasà yóm mambang dsù le ebè Dwata, ne kbong yó kem blówón bukay lafin le yó kem dumu lemisa bè yó bè Gónô Dwata.
17Tulónen du snéen yóm kbong yóm tahu blówón hmoen yó kem tbek utón hono tahu blówón, mò tbek le yóm utón dsù le, ne yóm kbong yóm tahu blówón hmoen flanggana ne kem pitsil ne kem huyów, gotu tulónen du. Bud tulónen du snéen yóm kbong yóm blówón bukay hmoen yó kem dumu huyów. 18Hol sónen, tulónen ke Selumun kbong yóm blówón deng hló le hmoen yóm gónó le gel mtem insinsu, ne yóm lennged yó kem hógów Dwata boluyen sirubim yó kem hmafak mból ta yóm Slungan Fasad Dwata. 19Yó tulón Dabid ke Selumun, monen, “Nim kdê ni kem ni, deng gotu hsulat Dwata do, ne tey htukulen béléu yóm nóyô hmoen.”
20Yó bud udél Dabid ebè yóm ngaen Selumun, monen, “Hol hotuhem gelem, ne hfólem nawam, hol nmoem yóm hmò Dwata kóm. Béi abay hlikò, ne béi se abay htakas balù yóm tey kbong yóm hmò Dwata kóm. Abay se yóm Dwata yóm sana Dwata hol dou gónó mogot, tendo nô béléem. Là kô bayaen kóm, ne là se kô tnagaken kóm efet gotu gdengem yóm kdê wen muhen bè yóm ktaba ye ebè Dwata lem yóm Gónô Dwata hefdaem. 21Wen yó kem bung kem tau blóng ebè Dwata ne kem sfu Libay angat mò du yóm kdê nmò bè Gónô Dwata. Ne wen se kem dumu tau tey dê kay kenhulung le móyô le mò du nô kihu hmoem kul. Yó kem tau wen glalen ne yó kem dumu tau bè klamang nim benwu ni, eles nangat le yóm hmoem kul.”
Currently Selected:
1 Tutul Israél 28: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
