1 Tutul Israél 21
21
Kehsó Dabid yó kem tau Israél
1Wen sidek atul Seitan ne hsóhen lu ke Dabid yó kem tau Israél. 2Tahu se, dók Dabid Juab ne yó kem kmandér bè yó kem sendaluen, monen mò kul, “Mógów ye ebè klamang benwu Israél lenwóten bè Birsiba fi leged efet kól etu senbwak Dan, gotu lista ye yóm kdéen tau anì tngónu ke hilu kwen le.”
3Okóm yó balà Juab du, monen, “Dwata he hol bud temnù du yó kem kun tau efet lematu dulék bud kwen le senta yóm kwen le ni. Okóm moen de, ke nmoem nim ni? Hono kóm tau se yóm kdê le. Moen de ke nmoem gónó le gemsalà yó kem tau Israél?”
4Okóm alì hlan Dabid yóm kun kóyô bè Juab. Yó gónó Juab lemwót, ne mógów ebè klamang Israél nan e nsó yó kem tau Israél. Ominen mulék ebè Jirusalim. 5Gotu tulón Juab ke Dabid yóm kdê tau lista le. Bè klamangen benwu Israél, yó kwen kem logi deng gembek mogot sudeng, botong skati bud lematu libuhen, ne bè Juda, botong fat latu hitu folò libu. 6Okóm là homong lista Juab kul yó du kem sfu Libay, ne yó kem sfu Bindyamin lemwót bè yóm alì ksidek kegnómen du bè yóm hmoen du yóm tau hol geta.
Ktafak Dwata ke Dabid
7Okóm ke Dwata kun, tey sidek kekbéen du yóm nmò le yó, yó gónón tmafak yó kem tau Israél. 8Omin Dabid mon du mò ke Dwata, “Ó Dwata, denge tey gemsalà béléem bè yóm deng nmou ni. Là hyuhen yóm kehlistahu yó kem tau. Hol hnifótem ou bè nim tey ungel nmou ni.”#21:8 Yó gónó Dabid hlista yóm kdê tau Israél anì tngónen ke hilu bélê le deng gembek mung bè gida. Yó salà Dabid bè nim nmoen ni, là dog snaligen ke Dwata, deng mom smalig bè alì kwen yó kem sendaluen.
9Ominen yó, wen udél Dwata ebè Gad yóm sotu tugod Dabid, wen gel hton Dwata du, yó monen mò du, 10“Mógówi ebè Dabid, tulónem du, ‘Ni se udél Dwata ebéléem. Wen tlu héléku kóm, méléki sotu mò tafaku kuy, ne nmou bélê ye.’ ”
11Tahu se, mógów ebè Dabid Gad, ne monen mò du, “Ni se hélék Dwata kóm. Mahi du de nélékem bè ni kem tafak ni? 12Yóm tlu halay kbel bitil bong bè benwuhem kô, duhen ke tlu bulón le tendo gemlà kuy yó kem hohon ye, duhen ke tlu kdawen msut bè benwuhem yóm tey des mit hatay bè klamang benwu Israél, yóm des nwit yóm sotu hógów Dwata? Hol hendemem ne yóm kmò kbalaem dou anì bud tulónu ke Dwata.”
13Omin Dabid mon du mò ke Gad, “Tey sidek kgelen béléu se nim ni. Mom hyu he ke Dwata tmafak dou, abay se hulung kmodu. Bée dou ke tau tmafak dou.”
14Duhen yó, wen tey des mit hatay hwit Dwata ebè yó kem tau Israél. Botong hitu folò libu tau matay bè yóm des yó. 15Ne hógów Dwata yóm sotu hógówen gu bè longit anì genbaen Jirusalim. Okóm timbow tô genlà yóm hógów Dwata yóm syudad Jirusalim, mom bud mayuk se nawa Dwata bè yóm alì kehsideken yó kem tau. Yó monen mò yóm hógówen, “Geblaen yó ne, béem bud henlós.” Bè yóm kudél Dwata ebè yóm hógówen yó, lemwót yóm hógów Dwata yó tódô nô bè yóm gónón gel kmusu Arauna, yóm tau Jibusayt.
16Temngel eta Dabid, ne tonen yóm hógów Dwata gu bè longit tódô mdà bè gónón sóól tonok ne longit. Wen sudeng ayayen eta Jirusalim. Yó nmò Dabid ne yó kem dumu tau gel malak yó kem tau Israél, lemsek le nes sakù mò gónó le hegfan yóm deng kebà nawa le, omin le lemfen bè tonok. 17Ne yó mon Dabid mò ke Dwata, “Ou se hsó yó kem tau. Ou se yóm deng gemsalà béléem ne mò du yóm alì sidek. Okóm kul ni kem tau ni, laen dù hol sidek nmò le. Ó Dwata yóm dou hol gónó mogot, ou ne tnafakem, homongem yó kem fes lówóhu, okóm hol béem abay genlà yó kem tauhem.”
18Yó nmò yóm hógów Dwata gu bè longit yó, hógówen Gad anì wen tulónen ke Dabid, yó monen mò du, “Lemwóti ne, hemdai gónó demsù ebè Dwata bè yóm gónón gel kmusu Arauna, yóm tau Jibusayt.” 19Tahu se, lemwót Dabid loloen yóm hlolò Dwata du hlanen bè Gad. 20Tikóng beklil Arauna igoen tolo kmusu, tódô tonen yóm hógów Dwata gu bè longit. Botong le mlóy yóm fat kem ngaen logi tmóbóng du kmusu, hebnos le. 21Tikóng ton Arauna yóm tau hol geta gu ditu, tódô tebelen yóm gónón kmusu, ominen semlong du, ne tódô tuden uyóhen bè tonok bè solu Dabid.
22Yó udél Dabid ebè Arauna, monen, “Ke hyu béléem, heblihem dou nim gónóm kmusu ni, benlihu bè yóm hol btesen. Yó muhu du mò gónów hemdà gónó demsù ebè Dwata anì tenflok Dwata yóm des mit hatay.”
23Yó mon Arauna mò ke Dabid, “Nwahem sen, ne tódô nmoem yóm hyu béléem. Ni kem safì ni mò dsù hkekebem ebè Dwata, ne nwahem se yó kem koyu kusu halay mò snukem yóm dsuem. Ne nim halay ni, nwahem mò blayem ke Dwata. Gotu blayu kóm ni kem ni.”
24Okóm yó udél Dabid ebè Arauna, monen, “Bê, benlihu lu béléem bè yóm tahu btesen. Là kô gbeku tódô ma du yóm kóm ke mò dsuu ebè Dwata. Là kô gbeku demsù du yóm dsù hkekeb là benlihu du.” 25Tahu se, benli Dabid yóm gónó kmusu bè nem latu botù tahu blówón. 26Hdà Dabid bè yó yóm gónó demsù ebè Dwata, ominen demsù yóm dsù hkekeb ne yóm dsù mit sefyu ebè Dwata. Ominen mni bè Dwata, ne bnalà Dwata yóm hnihen hlanen bè yóm tey ofi hwiten gu bè longit mò hmekeb yóm dsù eles nô ta yóm gónó demsù. 27Omin Dwata mudél ebè yóm hógówen, ne bud tenes yóm hógówen yóm sudengen.
28Bè yóm kton Dabid du yóm kbalà Dwata du yóm hnihen, bud wen dsuen bè yó bè yóm gónó Arauna kmusu. 29Bè yóm kdaw yó, yóm gónô tmaba ebè Dwata gel nit le mógów, ne yóm gónó demsù tehe nmò Musis bè yóm benwu laen hol wen tauhen, tolo nô ta bulul Gibyun. 30Okóm là gógówen edu Dabid ke tô smólók bè Dwata, abay se tey sidek klikoen bè yóm sudeng nogot yóm hógów Dwata.
Currently Selected:
1 Tutul Israél 21: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
