1 Tutul Israél 22
22
Eles katul kehdà Dabid yóm Gónô Dwata
1Omin Dabid mon du, “Bè nim benwu ni gónó tekuy hemdà du Gónô yóm sana Dwata hol gónó mogot, ne gónó hemsù yóm gónó demsù yóm dsù gel hkekeb le ebéléen yó kem tau Israél.”
2Duhen yó, gotu htaba Dabid yóm kdéen tólóng tau menwu bè Israél. Wen bélê le néléken hulung kemleng yó kem botu mò ngom yóm Gónô Dwata hdà le. 3Wen tey kem bala tók blay Dabid mò nmò le tutuk yó kem tikeb beng hmilol, ne mò nmò le gónón sékét yó kem tikeb beng yó. Bud wen he kem tey tembaga blayen, là kô gbek tmimbang du. 4Bud wen tey kem koyu sidar blayen snéen, kem koyu nwit le ebéléen yó kem tau lemwót bè Tayal ne tau lemwót bè Sidon. 5Yó udél Dabid, monen, “Hanà tolo ngà he yóm ngau Selumun, ne laen dù deng glanen. Bè yóm kehdà tekuy yóm Gónô Dwata, hyu ke hol tilob, ne hol tótól bè yó kem benwu hmilol tekuy. Yó gónóhu hol eles semtifun yó kem ngomen.” Yó gónóm mon, gu laan Dabid là deng matay, deng eles sentifunen yóm kdê ngom bè kehdà le yóm Gónô Dwata, ne ya tey kwenen.
6Omin Dabid htaba yóm ngaen Selumun wen hloloen du bè kehefdaen yóm Gónô Dwata yóm sana Dwata yó kem tau Israél. 7Yó udél Dabid ebè Selumun, monen, “Deng eles natulu yóm tô kehefdau yóm Gónô mò mit yóm boluy yóm sana Dwata hol dou gónó mogot. 8Okóm deng tehe wen udél Dwata ebéléu. Monen, ‘Deng tey dê tau hnatayem bè yó kem gida glanem. Yó gónóm mon, lemwót bè yóm tey litô deng hedlanagem bè tonok bè soluhu, là kô uu du hemdà du yóm Gónô mit yóm dou boluy. 9Okóm angat wen ngaem logi, ne tey menek klowilen. Benlayu kenek kebenwu, laen dù hohonen hmilol mundug du. Yó boluyem du Selumun, ne bè yóm igoen mogot yóm benwu Israél, tey menek kebenwu le yó kem tau. 10Du se angat hemdà du yóm dou Gónô mò mit yóm dou boluy. Du se dou ngà, ne ou se kun mà. Ne laen dù sónen yóm tendo kogot le bè Israél yó kem sfuhen.’
11Duhen ni, ngà, Dwata he tendo nô béléem ne tnóbóngen u anì gdengem yó kem hloloen kóm bè yóm kehefdaem du yóm kun Gónô yóm sana kóm Dwata hol gónó mogot. 12Ne Dwata he hol bemlay kóm ketngón ne khulung temnef anì nimónem yó kem hlauhen kóm bè yóm igoem kmamal bè Israél. 13Abay se ke hol loloem yó kem hlau Dwata ne yó kem hloloen yó kem tau Israél tehe hlanen bè Musis, angat wen uléken yóm kdê nmoem. Holi hbegel, ne hol hfólem nawam. Béi abay hlikò, ne béem hegdódól nawam.
14Deng tey khotuhu gelu semtifun kul yó kem ngom bè kehefdaem yóm Gónô Dwata. Botong tô fat libu kilu tahu blówón, ne tô fat folò libu kilu se blówón bukay deng sentifunu, ne tey wen he kem bala tók ne kem tembaga deng sentifunu, là kô bud gbekem tmimbang kul. Denge se semtifun kfal ne kem botu mò bengen, bede uu he bud temnù kul. 15Deng tey wen kem tau alì hulung mò nmò bè yóm Gónô Dwata hefdaem, kem tau hulung kemleng botu, ne kem tau hulung hdà gónô, ne yó kem dumu tau dê kay kenhulung tdok le bè yó kem dê kay hmoem kul 16bè tahu blówón ne bè blówón bukay ne bè tembaga ne bè bala tók. Yó ne, nbutem ne hemdà du, ne Dwata he tendo nô béléem.”
17Omin Dabid mdók yóm kdéen tmuha malak bè Israél anì tnóbóng le yóm ngaen Selumun bè kehefdaen du yóm Gónô Dwata. Yó monen mò kul, 18“Yóm sana Dwata hol kuy gónó mogot yóm tendo nô bélê ye. Deng heneken kbenwu ye bè yó kem benwu hmilol kuy, yakà deng sù Dwata du lem hólólu yóm kdéen tau bè yó kem benwu hmilol kuy yó. Dwata se mogot kul yó kem benwu yó ne yó kem tau le. 19Duhen ni, hol hewót ye lem but blutut ye yóm kimón ye yóm sana kuy Dwata hol gónó mogot. Nbut ye ne hdà du yóm kun Gónô yóm sana Dwata hol gónó mogot, anì géhél nwit ye elemen yóm Slungan Fasad ne yó kem ngom deng hetfing ye ebéléen. Nwit ye elem yóm Gónô hdà ye mò gónón megdóyón yóm kun boluy Dwata.”
Currently Selected:
1 Tutul Israél 22: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
