1 Tutul Israél 20
20
Kled Juab yóm syudad Raba
1Tikóng kól bè yóm bulónen kinì kdaw, yóm bulón le gel sgida yó kem tau hol geta, nalak Juab yó kem sendalù Israél anì na le e genlà yó kem benwu lemnek yó kem tau Amunayt. Ne gomong senibut le yóm syudad Raba, ne gotu genbà le. Okóm ke Dabid kun, fen tebel bè Jirusalim.
2Tikóng kól bè Raba Dabid, nwahen yóm kuruna nô bè kulu yóm tau hol geta bélê le, ne sù yó kem tau bè kulu Dabid.#20:2 Yóm kuruna mon le yó, wen se mon du kuruna yóm dwata lennged le boluyen Molék. Yóm kuruna yó, nmò yó kem tau Amunayt gu bè tahu blówón, botong tlu folò limu kilu keblaten, ne wen kem botu sminang mebtes heklóón le du. Tey wen negef Dabid bè yóm syudad yó. 3Gotu negefen yó kem tau bè yó bè Raba, ne henbalingen lu mò hesek. Yó hmoen kul, lemgadì ne smokul ne mogot asay. Bud yó snéen nmoen bè kdê yó kem tau Amunayt bè yóm kdéen syudad gled le. Omin Dabid mulék ebè Jirusalim, mung du yóm kdê sendaluen.
Kesgida le yó kem tau Israél yó kem Flistin
4Kogolen bè yó, bud gnida le Dabid yó kem Flistin bè benwu Gésér. Bè yóm kesfatay le yó, wen tau mung bélê le lemwót bè Husa boluyen Sibikay. Hnatayen Saf yóm tau semfu gu bè yó kem tau lembang. Duhen yó, là kô le gemmò yó kem Flistin. 5Sotu bud kesfatay le bè yó kem Flistin, hnatay Ilhanan ngà Jair yóm sotu tau kesfu tau lembang boluyen Lami yóm dumun setwoli yóm tehe Gulayat lemwót bè Gat. Ya tey sidek kbongen yóm buyus Lami. 6Bè yóm sotu bud kesfatay le bè Gat, bud wen tau bè yó kesfu tau lembang, ket ne nem tdoken, dalang se hólól tihen, ket ne nem kyemeten. 7Lemwót bè yóm kehnéen yó kem tau Israél, botong hnatay Junatan ngà Simiya dumun setwoli Dabid yóm tau yó. 8Ni kem tau Flistin ni, semfu le gu bè yó kem tau lembang bè Gat, okóm Dabid ne yó kem sendaluen hmatay kul.
Currently Selected:
1 Tutul Israél 20: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
