1 Tutul Israél 11
11
Kbaling Dabid tau hol geta bè klamang Israél
1Omin le gotu mógów ebè Dabid bè Hibron yóm kdéen tau Israél, ne yó mon le mò du, “Ngem, mi se yó kem kóm dumu ne kóm litô. 2Bè gnan kdaw bè yóm tolo kogot Sol tekuy, uu se gel tehe malak kul ebè gida yó kem sendalù Israél. Ne yó tehe udél Dwata ebéléem yóm Dwata hol gónóm mogot, monen, ‘Uu se angat semgyok kul yó kem dou tau Israél, ne uu se malak kul.’ ” 3Tahu se, bè yó bè Hibron bè solu Dwata, wen senfasad le Dabid yóm kdéen tau malak bè Israél. Omin le temwél hnolo te kulu Dabid mò ilô yóm deng kbalingen tau hol geta bè Israél, hol lómón yóm deng tehe fasad Dwata ke Dabid hlanen bè Samwél.
Kled Dabid yóm benwu Jirusalim
4Kewót Dabid bè yó mung du yóm kdéen tau Israél, mundug le ebè Jirusalim (yóm benwu tehe bnoluy le Jibus), yóm hol kul benwu yó kem tau Jibusayt.#11:4 Yó kem tau Jibusayt yó, semfu le gu bè yóm tehe Ham ngà Nuwa. Menwu le ta yóm tonok blay Dwata yó kem tau Israél. Yó hmò Dwata yó kem tau Israél bè yóm khusek le bè yóm benwu yó, sulék gotu hdó le lu yó kem tau Jibusayt yó, okóm là. Là kô gbek le du.Yó udél le ebè Dabid yó kem tau Jibusayt, mon le, “Là kô ye na a gusek edini.” Okóm botong gled Dabid yóm benwu gónó le gel heklung boluyen Sayun, ne yó hlós boluy le du nim kmoen ni, Syudad Dabid. 5Yó udél le ebè Dabid yó kem tau Jibusayt, mon le, “Là kô ye na a gusek edini.” Okóm botong gled Dabid yóm benwu gónó le gel heklung boluyen Sayun, ne yó hlós boluy le du nim kmoen ni, Syudad Dabid.
6Yó deng udél Dabid ebè yó kem sendaluen, monen, “Yóm tau fen malak yó kem dumuhen sendalù mundug yó kem tau Jibusayt, du se angat kmandér bè yóm kdê dou sendalù.” Tahu se, yó fen malak yó kem sendalù duhen Juab ngà Siruwaya libun Dabid, ne du baling kmandér bè yóm kdê sendalù Dabid.
7Yóm gónó le gel heklung yó kem tau Jibusayt deng gled Dabid yó, hlós nmò Dabid gónóhen nô. Yó gónóm mon hlós boluy le du Syudad Dabid. 8Bud tennù hlamang Dabid yóm syudad yó nbuten bè hol kilil bè yóm bnoluy le Milo hdà gónô efet glakiten gu hmilol le. Juab fen bud temlob hemdà yó kem dumu gónô bè yó lem syudad. 9Tódô sónmoen tendo temnù kfasang Dabid lemwót bè yóm tendo knóen béléen yóm Dwata laen dù là gbeken du.
Yó kem sendalù Dabid alì hulung sfatay
10Ni se boluy yó kem tau malak yó kem sendalù Dabid alì hulung sfatay. Ni kem tau ni, slomong le bè yóm kdê tau Israél, henbaling le Dabid mò tau hol geta bélê le, hol lómón yóm tehe fasad Dwata yó kem tau Israél. 11Ni se boluy yó kem sendalù Dabid alì hulung sfatay.
Tanayen, Jasubim tau Hakmunayt. Du kmandér bè yóm tlu kem sendalù Dabid alì hulung sfatay bè yóm kdê sendaluen. Botong tlu latu sendalù hohon le ndek Jasubim buyus bè yóm sotu kesgida le.
12Tmodol béléen yóm sotu bè yóm tlu kem sendalù alì hulung sfatay yó koni, duhen Ilisar ngà Doday sfu Ahuwa. 13Du se tehe mung ke Dabid ebè benwu Pas-damim bè yóm kesgida le yó kem Flistin deng eles stifun mit du sfatay bè yó. Bè yó gónó le sfatay, bè yóm tonok gónó mulu barli. Lemwót yó kem dumu sendalù Israél, gotu le mlóy. 14Okóm ke Ilisar lewu le Dabid, tódô le mdà talak yóm tonok gónó mulu barli yó, gotu hnatay le yó kem Flistin. Hewà Dwata lu bè yóm kdaw yó hlanen bè yóm tey kehegmoen kul.
15Bè yóm kdaw tehe knô Dabid bè yóm botu bong moni bè kilib Adulam, fen le kmamfù bè Datal Rifaim yó kem Flistin. Yó se yóm tlu kem sendalù Dabid yó koni yóm mosol ebè Dabid bè yóm kilib yó. (Nim tlu sendalù ni, gomong le bè yóm tlu folò kem sendalù nélék Dabid alì hulung sfatay.) 16Bè yóm kdaw tolo knô Dabid bè yóm kilib yó, deng gled kem Flistin ne yóm benwu Bitlihim. 17Bè yóm kdaw knô le bè Dabid yó, yó mon Dabid bè yóm tlu kem tauhen yó, monen, “Teye móyô ke wen él mò ninumu lemwót bè yóm kokol alì hyu élen moni bè bak tikeb bè Bitlihim.” 18Omin yóm tlu kem sendalù yó hganag holo elem blóng yó kem sendalù Flistin na le e mangay él bè Bitlihim bè yóm kokol moni bè bak tikeb yóm benwu yó, ne nwit le ebè Dabid. Okóm là kô ninum Dabid du, deng mom koken bè solu Dwata. 19Yó monen, “Là, Dwata, là gbeku minum du nim él ni, abay se lómón kebtesen litô yó kem tau tódô hamà le klowil le bè yóm kwa le du nim él ni.” Duhen yó, là kô ninum Dabid du yóm él yó. Yó se botong nmò yóm tlu kem sendalù Dabid alì hulung sfatay.
Yóm tlu folò kem sendalù Dabid hulung sfatay
20Yó fen kmandér bè yóm tlu folò kem sendalù Dabid hulung sfatay, duhen Abisay dumun setwoli Juab. Botong tlu latu kem sendalù hohon le ndeken buyus bè yóm sotu kesgida le. Yó gónón gomong bud tótól se kun lómón yóm tlu kem sendalù Dabid alì hulung sfatay. 21Lemwót bè yóm któtólen senta yóm tlu folò, yó gónón du kmandér le, okóm là gmungen bè yóm tlu kem sendalù alì hulung sfatay.
22Sotuhen, duhen Binaya ngà Jihuyada yóm sendalù hulung sfatay lemwót bè Kabsil. Tey wen se kun gendeng bè yóm kesgida le. Botong hnatayen yóm lewu sendalù Muab alì hulung sfatay bè kdê sendalù le. Sotu kdaw, botong ktesen yóm sotu liyun elem sol bè yóm kdawen kmulón snu. Balù yóm tey kledel yóm tonok, botong ghatayen yóm liyun yó. 23Sotu kdaw, olon bogul nogoten, botong hnatayen yóm sotu sendalù Idyip alì tahà mogot yóm tey buyus bong. Tódô nalaw Binaya béléen yóm buyus nogoten ne deken du, ne matay yóm sendalù Idyip yó. 24Ni se dumu yó kem gel nmò Binaya, ne gónón tô gemsenged yóm tlu kem sendalù alì hulung sfatay. 25Du se tótól senta yóm tlu folò, Okóm là gomongen du bè yóm tlu kem sendalù alì hulung sfatay. Du se nélék Dabid mò kmandér bè yó kem sendalù gel mentey du.
Là gomongen bè nili yóm bérs 26 kól bè bérs 47. Yó tulónen, boluy yóm tlu folò kem sendalù deng nélék Dabid alì hulung sfatay bè Israél. Ke móyói semfala du hnebelem bè Gewu Samwél 23:24-39. Sotu bélê le, duhen Uraya yóm tau Hitayt hfatay Dabid, yehen Batsiba.
Currently Selected:
1 Tutul Israél 11: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
