HOSEA 14

1Samaria musti ihukum awi malekak arepe bara Aku balalu malawan Aku. Rayat ayue akan matei huang parang; kare anak sawae kareh ilitek, tuntang kare oloh bawi je batihi inyila kanaie.”

Hosea balaku uka Israel hobah

2Keleh haluli manempo Tuhan, Hatallam, o bangsa Israel! Dosam jari mawi ikau tanggarisang tuntang lawu. 3Keleh haluli manempo Tuhan tuntang keleh manyampai lakudoa toh kilau parapahm Akae, “Tuhan, ampun uras kare dosan ikei, tuntang tarima lakudoan ikei toh, palus ikei manara Ikau sama kilau je jari injanji awi ikei. 4Asur dia olih manyalamat ikei, tuntang kuda parang dia olih mandohop ikei. Ikei dia hamauh tinai dengan kare hampatong tampan lengen ikei kabuat je ewen te hatallan ikei. O Tuhan, ikau masi kare oloh je dia tempon ewe-eweh je tau iharap ewen.”

Tuhan manjanji pambelom taheta akan Israel

5 Tuhan hamauh,

“Ungkup-Ku je mahiwang, induang-Ku

haluli tuntang inyinta-Ku dengan salepah atei;

ewen dia ilait-Ku tinai.

6Akan oloh Israel aku sama kilau ujan

je mambisa petak keang.

Ewen akan mangambang sama kilau kambang

tuntang sama kilau batang kayu alau je handalem uhate.

7Ewen akan belom tuntang mandahang

sama kilau taloh imbul je manyalundik intu hete-hete,

sama kilau batang saitun kahalape

mangat ewaue sama kilau batang kayu alau!

8Ewen akan haluli manempo Aku

tuntang melai intu kalindong aing-Ku.

Bajeleng ewen sasar sanang, sama kilau

gandom je belom intu kare tana

bajewong tuntang sama kilau kabon anggor.

Sama kilau anggor Libanon aran ewen basewut.

9Oloh Israel akan manganan kare hampatong dewae;

ewen ihaga-Ku tuntang lakudoae inarima awi-Ku.

Sama kilau batang je harajur are dawee,

Aku akan manganjungen ewen.

Aku upon uras berkat akan ewen.

Aku, Tuhan, jari hakotak.”

Panutup

10Keleh uras oloh je pintar harati tau maharati taloh je inyurat intu hetoh, tuntang manumoe. Kare auh bara Tuhan puna toto, tuntang oloh je belom barasih manumon auh te. Tapi oloh badosa mangalapeae sampai tanggarisang tuntang lawu.

Currently Selected:

HOSEA 14: NIJ

Highlight

Copy

Compare