DANIEL 11

1Ie je#11:1: manumon ije salinan je bara jaman horan: Ie je. Ibrani: Aku je. inyoho akan mandohop tuntang milang aku hong nyelo je solake Darius oloh Media te marentah. 2Tuntang taloh je akan ilalusku akam jete toto.”

Karajaan Misir tuntang karajaan Siria

Malekat te hamauh, “Telo raja beken akan marentah Persia, inuntut awi raja je kaepat je labih tatau bara je beken. Hong sakalepah kahain kuasae tuntang katataue, ie akan bahado kaabas dengan karajaan Yunani.

3Limbah te akan lembut ije raja je menteng. Ie akan marentah karajaan je paham hai tuntang marentah tumon kanahuange. 4Tapi metoh intu sakalepah kahaie, karajaae akan bapusit tuntang tabagi-bagi jadi epat kabagi. Kare raja je dia turonae akan marentah kilau gantie, tapi ewen dia olih tumon kaabase.

5Raja tanah salatan akan jadi abas. Tapi ije bara kare pangkalimae akan labih abas bara ie, tuntang ie akan marentah karajaan je labih hai hindai. 6Pire-pire nyelo limbah te raja tanah salatan akan mawi pakat dengan raja tanah utara tuntang mangawin anak bawi ayue dengan raja tanah utara te. Tapi pakat te dia dehen, tuntang anak bawi ain raja te akan impatei, kalote kea banae tuntang anake#11:6: Manumon pire-pire salinan je bara jaman horan: anake. Ibrani: bapae. tuntang kare jipee je jari magah ie. 7Dia tahi limbah te, ije biti je ije keluarga dengan anak bawi te akan jadi raja. Ie akan manyarang tantara raja bara tanah utara, mantakan kotae tuntang mampakalahe. 8Metoh ie haluli akan Misir ie mimbit hampatong dewan musohe tuntang pakakas amas tuntang perak je jari iluput akan dewa te. Pire-pire nyelo katahie ie dia akan mamarang raja tanah utara. 9Limbah te raja tanah utara akan manyarang raja tanah salatan, tapi ie akan imukul mundur tuntang buli akan tanah kabuat.

10Palus kare anak raja tanah utara tata-tatap akan parang tuntang mawi tantara je hai. Ije bara ewen te akan manyarang sama kilau danum soho. Metoh manyarang je kadue te ie manyarang kota ain musoh. 11Palus raja tanah salatan sangit, tuntang ie handak miar akan eka parang malawan raja tanah utara. Ie olih mampakalah tantara hai je iirak awi raja utara. 12Limbah te ie hanjak awi kamanange tuntang awi jari mampatei are musoh, tapi ie dia akan tetep kuasa.

13Akan tingkat je kaduee raja tanah utara akan mawi tantara je hai, labih hai haream bara je solake. Amon katikae sampai, ie akan miar dengan tantara je hai tuntang sanjata je are toto. 14Palus are oloh akan malapas arepe bara raja tanah salatan. Tuntang pire-pire oloh karas bara bangsa ayum, Daniel, akan malapas arepe kea, awi ewen jari mandino paite. Tapi ewen akan gagal. 15Limbah te raja tanah utara akan mangapong ije lewu hakota tuntang marabute. Tantara tanah salatan dia akan olih malawan, tuntang kare pasukan je pangkatamame mahin dia olih tinai malawan. 16Raja tanah utara te akan mawi tumon kanahuange, jaton aton samasinde je malawan. Palus ie melai petak je basiwoh tuntang manguasae.

17Limbah te raja tanah utara akan manatap hapus tantarae akan manyarang tanah salatan. Palus dengan kahandak manguasa hapus karajaan musohe, ie akan mawi pakat dengae tuntang mangawin anak bawi ayue#11:17: anak bawi ayue atawa: ije biti oloh bawi bujang. dengan raja Misir te; tapi rancanae te dia akan aton hasile. 18Limbah te ie akan manyarang kare bangsa intu saran tasik, tuntang are je impakalahe. Ije biti kapalan tanah bangsa beken akan mampatende gawie je manawah te, tuntang mambaleh haream akae. #11:18: Hai kemungkinan riman auh toh iete: mambaleh … akae. 19Raja tanah utara te handak haluli akan kare kota lewun ayue kabuat, tapi ie akan impakalah tuntang jaton aton barita tinai tahiu ie.

20Ie akan ingganti awi ije raja je akan manyoho pagawaie je karas uka mamumpong pajak dengan paksa mangat mandahang panatau karajaae. Huang katika je pandak raja te akan impatei, dia tara-tarang tuntang dia kea huang parang.”

Raja lewu utara je papa

21Malekat te hamauh tinai, “Raja je rahian limbah te marentah tanah utara iete ije biti oloh je randah tuntang jaton hak jadi raja. Tapi ie akan dumah dia inyangka-nyangka tuntang marabut kuasa uka olih marentah dengan bakalilit. 22Uras tantara je malawan ie, yoh Imam Hai haream, akan impalomos. 23Ie mandarhaka dengan kare janji je patut ih iawie dengan kare bangsa beken. Ie palus sasar abas, aloh ie baya marentah lewu je korik. 24Dengan bakalilit ie akan manyarang kare daerah je basiwoh metoh oloh je melai hete mangkeme tadoh sanai into hete. Ie akan malalus en bewei je dia puji ilalus awi tato hiange. Palus ie akan mambagi-bagi akan kare oloh je mandohop ie uras ramo rampasan tuntang panatau je dinoe huang parang. Ie akan mawi siasat akan manyarang kare eka je hakota, tapi katikae bajeleng akan hapus.

25Limbah te dengan kahanyie ie akan manampa tantara je hai akan manyarang tanah salatan je jari tata-tatap kea handak manyarang ie dengan tantara je abas tuntang hai toto. Tapi raja tanah salatan dia olih dehen, awi ie akan buah kadarhaka. 26Kare panasehat aie je tokep dengae akan mampanjato ie. Are kare tantarae akan matei, tuntang pasukae akan impalomos. 27Limbah te due raja te akan mondok hong ije meja tuntang kuman haya-hayak tapi ewen aton kahandak papa tuntang ewen akan hatanjaro. Tapi rancana ewen jaton hasile awi katikae hindai sampai. 28Limbah te raja tanah utara akan buli lewue dengan kare ramo rampasan je dinoe. Ie hajanji akan mamparusak agama je iimbing awi ungkup Hatalla. Ie akan mawi tumon kanahuange palus buli tanahe kabuat.

29Pire-pire katahie ie akan manyarang tanah salatan tinai, tapi kajariae beken bara katika je solake. 30Awi kare oloh Roma dengan kare kapale akan dumah bara Siprus tuntang mamarang ie sampai ie mikeh.

Palus ie buli hayak sangit toto tuntang hanjanji akan marusak agama ain ungkup Hatalla. Ie akan omba nasehat ewen je jari murtad dengan agama te. 31#Dan. 9:27, 12:11; Mat. 24:15; Mrk. 13:14 Palus ie mairak kare pasukan je mamapa Human Tuhan. Ewen palus mampatende parapah sining andau tuntang mampendeng taloh je eka kajilek je inyewut Kapapa je mampahancor.#11:31: Kapapa je mampahancor: Ite 9:27. 32Palus dengan bakalilit raja te mangatau kare oloh je jari malihi agaman ewen uka tau mandohop ie. Tapi kare oloh je manumon auh Hatalla bahanyi malawan ie. 33Kare oloh pintar je mangapala rayat mawi are oloh harati. Tapi akan pire-pire katika katahie are bara ewen akan matei awi parang atawa awi apui, tuntang pire-pire biti tinai akan buah rampok tuntang buah tawan. 34Metoh pampatei te ilalus, ungkup Hatalla akan mandino isut pandohop, tapi are oloh akan hinje dengan ewen baya akan kaontong ewen kabuat. 35Belah bara kare pamimpin je pintar te matei, tapi jete kilau ujian akan ungkup sampai ewen jadi imparasih. Taloh te akan manjadi sampai kahapus jaman, iete jaman je jari inukas Hatalla.

36 # 2 Tes. 2:3-4; Pang. 13:5-6 Raja tanah utara akan malalus taloh tumon kanahuange. Dengan bajoho ie mansanan je ie labih hai bara dewa je kueh bewei, tuntang kea labih hai haream bara Hatalla Pangkahai. Ie tau mawie kalote sampai kasangit Hatalla lepah. Awi taloh je jari inukas Hatalla akan manjadi labih helo. 37Raja te akan dia paduli dewa je kueh bewei je inyembah tato hiange, tamput kea dewa je inara kare oloh bawi. Ie dia paduli kare dewa te awi ie mitong arepe labih hai bara ewen. 38Kabalikae ie akan mahormat dewa je hindai puji inyembah awi tato hiange, iete dewa eka kalindong kare dinding batu je segah. Ia akan maluput emas, perak, permata tuntang kare parapah beken je lara-larang akan dewa je hindai puji inyembah awi tato hiange.

39Ia akan mintih kare oloh je manyembah dewa bangsa beken, uka manyarang kare kota lewun oloh je dehen. Eweh je mangaku dewa te akan inengae hormat je hai tuntang pangkat je gantong tuntang petak akan upah.

40Amon kahapus kuasan raja tanah utara te tokep sampai, raja tanah salatan akan manyarang ie. Palus raja tanah utara akan mambaleh dengan parang manyangit. Ie akan mairak are kareta parang, pasukan manongkang kuda tuntang kapal. Ie akan mantakan sama kilau danum soho, tuntang mampakalah are tanah. 41Petak je basiwoh mahin inyarange kea, tuntang bapuluh koyan oloh impateie. Tapi kare karajaan Edom, Moab tuntang hila je mambatang bara karajaan Amon akan salamat. 42Metoh ie manguasa kare karajaan te, karajaan Misir kea dia akan liwus. 43Ie akan marabut panatau Misir iete amas tuntang perak tuntang panatau beken je paham barega. Ie akan indohop oloh Libia tuntang Sudan. 44Palus barita bara timor tuntang utara akan manarewen ie, sampai ie parang manyangit tuntang are mampatei oloh. 45Ie mampendeng haream tingkap karajaae helat tasik dengan bukit eka Human Tuhan. Tapi limbah te ie akan matei tuntang jaton oloh je akan mandohope.”

Currently Selected:

DANIEL 11: NIJ

Highlight

Copy

Compare