AMOS 7
7
PAITE TAHIU HUKUMAN BARA TUHAN
Sangkalap
1Aku mandino ije paite bara Pangkahai Tuhan. Aku mite Ie manjapa ije kakawan sangkalap je paham are hong katika oloh jari mampalepah gawi manatak oru akan raja, tuntang oru taheta nampara lembut tinai. 2Kakare taloh imbul intu petak bilak lepah kinan awi kare sangkalap te. Palus aku hamauh, “Pangkahai Tuhan, keleh ikau mampun ungkup Ayum! Ewen te pahalau korik tuntang balemo, kilen ampie ewen tau tetep belom?”
3 Tuhan mobah rencana Ayue tuntang hamauh, “Taloh je gitam te dia akan manjadi.”
Apui
4Aku dinon ije paite tinai bara Pangkahai Tuhan. Aku mite Ie kanjerae tata-tatap handak mahukum ugkup Ayue hapan apui. Apui te manjelap lepah tasik intu penda petak#7:4: tasik intu penda petak: Kare oloh jaman horan hong Timor Tengah manyangka hong penda petak te aton tasik lombah je bara hete lembut kare sungei tuntang tahasak danum. tuntang nampara mangehu tana. 5Aku hamauh, “O Tuhan, Hatalla, keleh mambelep apui te! Ungkup Ayum paham korik tuntang balemo, kilen ampie ewen tau tetep belom?”
6 Tuhan mobah rencanae tinai tuntang hamauh, “Jetoh kea dia akan manjadi.”
Tali ukur hambujur pendeng
7Aku mandino ije paite beken bara Tuhan. Gitangku Ie mendeng intu balikat ije dinding je imangun mahapan tali ukur hambujur pendeng. Intu lengen Aie Ie mimbing tali te uka mite en dinding te toto hambujur atawa dia. 8Ie misek aku, “En taloh je gitam, Amos?”
Aku tombah, “Tali ukur hambujur pendeng, Tuhan.”
Palus Tuhan hamauh, “Aku mahapan tali toh mangat mamparahan je ungkup ayung-Ku sama kilau dinding je dia bujur. Aku dia tinai mobah rencana aing-Ku, Aku batantu akan mahukum ewen. 9Kare eka je ihapan awi turonan Isaak akan eka sombayang akan imparusak. Kare eka barasih ain oloh Israel akan induroh. Aku akan mampalomos turonan Raja Yerobeam.”
Amos tuntang Amasia
10Amasia imam intu Betel, mangirim barita toh akan Yerobeam raja Israel, “Amos kanjerae pakat dengan rayat malawan raja. Kare auhe je manyih rayat akan mawi lewu toh hancor. 11Ie hamauh koae tuan raja akan matei huang eka parang, tuntang oloh Israel batantu iimbit akan eka tawanan, kejau bara lewue kabuat.”
12Palus Amasia hamauh dengan Amos, “O nabi, keleh buli akan Yuda! Keleh manyampai auh Hatalla intu kanih. Nauhe ewen manenga pangolih akam! 13Ela tinai mansanan peteh Hatalla intu Betel. Lewu toh tantai akan raja, tuntang eka sombayang akan hapus karajaan.”
14Amos tombah, “Aku dia nabi tagal pangkat. Sapunae aku tukang mahaga meto tuntang tukang mamutik bua ara. 15Tapi Tuhan manduan aku bara gawingku, tuntang manyoho aku manyampai peteh akan oloh Israel. 16Awi te hining taloh je insanan Tuhan akam. Awi ikau mangahana aku mansanan peteh Hatalla je malawan Israel, 17Tuhan hamauh je sawam akan jadi lontei intu kare jalan lewu, tuntang kare anakm impatei hong katika parang. Petakm akan imbagi-bilah akan oloh beken, tuntang ikau kabuat akan matei intu lewun oloh je dia kasene Tuhan. Oloh Israel batantu akan iunda akan eka tawanan, kejau bara lewue kabuat.”
Currently Selected:
AMOS 7: NIJ
Highlight
Copy
Compare
Share
Want to have your highlights saved across all your devices? Sign up or sign in
