AMOS 5

Auh pantehau uka hobah

1Hining, o ungkup Israel! Aku handak manyanyi ije nyanyi kapehen atei:

2Israel sama kilau oloh bujang bawi je manjato

ie dia akan mendeng tinai!

Intu hunjun petak danum ayue kabuat ie inalua,

jaton ije je mandohop mampendeng ie.

3Pangkahai Tuhan hamauh, “Ije lewu hong Israel mirak sakoyan biti tantara, tapi je buli haluli baya saratus biti; lewu ije beken mirak saratus biti, tapi je buli haluli baya sapuluh biti.”

4 Tuhan hamauh dengan ungkup Israel, “Keleh haluli manalih Aku, maka keton akan belom. 5Ela haguet akan Berseba uka sombayang. Ela manggau Aku intu Betel, awi Betel akan lilap. Ela kea haguet akan Gilgal, awi oloh lewu te akan iunda akan eka tawanan.”

6Keleh mules haluli manalih Tuhan, maka keton akan belom. Amon keton dia mules haluli manalih Ie, Ie akan dumah sama kilau apui je tayap tuntang mangehu lepah oloh Israel. Intu Betel jaton oloh ije tau mambelep apui te. 7Calaka keton, keton je mobah taloh bujur manjadi taloh sala tuntang manduan hak oloh!

8 # Yo. 9:9, 38:31 Tuhan manampa kare bintang intu

langit bintang Tampong Bua tuntang Patendo.

Ie mobah kakaput manjadi kalawa

tuntang handau manjadi hamalem;

danum bara tasik inusoh akan petak.

Je manguan kare taloh handiai te arae Tuhan.

9Ie mambinasa oloh je abas

hayak dengan kota ain ewen.

10Keton basingi dengan oloh je malawan katulas tuntang je hakotak bujur huang basara. 11Keton mahenyek oloh je belom susah tuntang gandom ewen irampas keton. Awi te keton akan dia melai huang human keton je bahalap, je jari imangun keton te. Keton dia akan mihop anggor bara kare kabon anggor je imbul keton. 12Aku katawan kapaham kahain kapapan keton tuntang dosan keton. Keton mahenyek oloh bujur; keton manarima suap tuntang manalua oloh je belom susah je imutus dia bujur intu basara. 13Awi gawin keton te, maka kare oloh je pintar mangkeme labih bahalap benyem ih hong wayah je papa kilau te.

14Keleh malalus kahalap tuntang ela malalus kapapa, mangat keton belom. Palus Tuhan Je Jaton Tikas Kuasae akan toto-toto melai marak keton kilau je koan keton. 15Keleh manyingi taloh je papa tuntang sinta taloh je bahalap, hayak mandehen kaadilan. Ayaue Tuhan akan masi dengan kare oloh je batisa bara bangsa Israel.

16 Tuhan, Hatalla Je Jaton Tikas Kuasae hamauh, “Intu kare jalan lewu, oloh akan manangis tuntang mungoh awi kapehen ateie. Kare oloh pamalan mahin intehau mangat omba managis hayak dengan kare oloh je imbayar akan manatum oloh matei. 17Hong kakare kabon anggor oloh akan manangis awi Aku dumah tuntang mahukum keton. Aku, Tuhan jari hakotak.”

18Toto, calaka keton je taharu dengan andau Tuhan! En gunae andau te akan keton? Andau te baya andau je kaput, dia ie andau je balawa akan keton. 19Ampie sama kilau oloh je hadari bara singa, tapi hasondau dengan bahuang. Atawa kilau oloh je buli akan huma tuntang basinggoh hapan lengee intu dinding, palus inutok handipe. 20Andau Tuhan puna mimbit kakaput, andau derem je harenep.

21 # Yes. 1:11-14 Tuhan hamauh, “Aku basingi tuntang muta mite kare andau pesta agaman keton. 22Amon keton mimbit parapah ije ingehu tuntang parapah gandom, Aku dia akan manarimae. Aku dia akan maku manarima kare meto ain keton je basepu-seput te je iluput keton akang-Ku kilau parapah hapan badamai. 23Paterai kare nyanyin keton je mambisau Aku te; Aku dia maku mahining auh kacapin keton. 24Labih bahalap malalus gawin kaadilan uka mahasor sama kilau danum, tuntang kabujur sama kilau sungei je dia puji teah.

25 # Gaw. Ras. 7:42-43 O ungkup oloh Israel, katika Aku magah keton mahalau padang pasir epat puluh nyelo katahie, Aku dia balaku parapah bara keton. 26Tapi toh keton manyembah Sakut je inirok keton rajan keton, tuntang Kewan, bintang je inara keton te. Awi te kare hampatong je jari inampa keton te musti iimbit awi keton kabuat, 27katika Aku manganan keton akan lewu je labih kejau bara Damaskus. Aku Tuhan je bagare Hatalla Je Jaton Tikas Kuasae jari hakotak.”

Currently Selected:

AMOS 5: NIJ

Highlight

Copy

Compare