YIDNAK YIDNAK WENE 22
22
1”Nanggamirak min neidtak min wa-e. Yanem kit kinmbiri bem an nondomok nelat mbarimin wene yu koler-o” luk yij-o. 2Yosoloma-ge, ar-e Iberani wene bem yosola me, kuluruk yigarig-e, unsune mondok lik lak mbogola-ge, at-nen yosolar-e:
3”An-e Yawuri nap-nen yusu-o. Kilikia nggweyak pem Tatus-nen ndet nibidnag-et nde, o siri yu me-nen nusugwe rak piga-o. Nde, nit nenlawingga-nen tena woragwi imiri mbarak pidnak wene-ge mul noroso nap Nggamaliel-nen kwara-t mul nirij-o. Mul norosola-ge, kit pidsa yawo kwatli yu nggal-et an-nen na Mbal Pem Nagawan eyabu kiri keresa wanosolat woragi-o. 4Woralar-e, Nagawan Indo Urula mburugwi nap lel mberel onposolar-e, wat yogola-net keya inpigi-o. Ap min kweyap min kere kamat unpuruk, o kubu me inpil nggosolat woragi-o. 5Tepan ombo nggulok min wene mbarugwi ogore yidnak nap min-nen-e an kwarigi wene iri-ge kenggera yak kunduwa-o. It-nen Ndamsik woragwi onowe onowosi enmanggim engga mbara an wok norogolikma-ge, an-e Ndamsik mbirigirik, Nagawan Indo Urula mburugwi nap tenasa kamat unpuruk, Yerusalem yu me-nen andi bandi rak unpurak pem inmin lobok yekluk mbirigi-o.
Paulus indi nden kaidnak na kinggirid wene
22:6-16
6An-e mbirigirik, Ndamsik iri me panggo panggo wok yosoma-ge, lenggesilmu nggal worala-ge, mimo ereya-t aid arem-nen yaya-ge yembak tak posoloma, an neralu yaya rak pij-o. 7Posoloma-ge, an-e nggweyak ma mbud yiginggal-e, ene misik-nen yak norosolar-e: ’Saulus wa-e. Saulus wa-e. Kar-e noluk-nen lel mberel nubusu-o?’ luk yak norosola, kuligi-o. 8Kulurug-e, an-nen kin wanosolar-e: ’Nagawan Indo wa-e. Kar-e ta-nen yusu-o?’ luk kin wanosoma-ge, at-nen yak norosolar-e: ’An-e Nasaret nap Yesus, kat-nen lel mberel noboso nap-nen yusu-o’ luk yij-o. 9Nde, an totno mbiri-ge nab-e yaya iri-ge kaiga-t nde, wene yak niridnak nap na ene perak kuligit lag-o. 10Nde, an-nen yosolar-e: ’Nagawan Indo wa-e. No kwarimin-o?’ luk yosoloma-ge, Nagawan Indo-nen yak norosolar-e: ’Men luk, Ndamsik mbiri-o. Kat-nen kwarurak mende-ge iri me-nen yak kuruwa-o’ luk yak nirij-o. 11Yaya iri abinal-nen an nerengen ugut tak pidnak me, an totno mbirige nap-nen-e ninggi waruk Ndamsik nibil mbiriga-o.
12Nde, imiri mbarak pidnak wene-nen yidnak yidnak kwaroso nap, Mbal Pem Nagawan aye kaso nap misik unu-ge Ananias na iri me worala-ge, Ndamsik woragwi Yawuri nap pidsa-nen unu kek tak pugwi nap irit woragaij-o. 13At iri lobok yarik, an neralu mendak-nen yosolar-e: ’Nanggam Saulus wa-e. Kerengen ondolma mag-o’ luk yak norosoloma ereya na-net nerengen na ondolma yosola-ge, at yik kagi-o. 14Yik kasoma-ge, at-nen yosolar-e: ’Nit nenlawingga Enmbal Pem Nagawan-nen-e at indi-n pidnak mende karu yonokluk, Mot Mot Yoso Nap kanokluk, at emendam-nen mbiridnak wene kolonokluk, len kibij-o. 15Iri bem-e, at amanggim-e kerengen-nen kaidnak wene min keyanggo-nen kulidnak wene min-e ab-e ap pidsa mondok kenggera yak ondosolat woragun-o. 16Nde, yawo-ge kar-e noluk kindi tusuruk yusu-o? Men yi-o. Yi ma kobosola, Nagawan Indo unu luk wene mbo bosola-net kat meya yidnak masa lak tak puwa-o’ luk yak nirij-o.
”Enlem nin nap endam mbiri-o” luk Paulus yak tidnak wene
22:17-29
17Iri rak puruk, an-e nijok lem Yerusalem lobok yigirik, Mbal Pem Nagawan ama-nen tepan yosolat worasoma-ge, nuruk-net nde nabi nggwe nggal kasolar-e, 18at Nagawan Indo kagi-o. Nde, at-nen yak norosolar-e: ’Ir-e kat-nen an nebem kenggera yak undugun wene-ge wanuwa buk me, kar-e ndaget nak Yerusalem keya buruk mbiri-o’ luk yak nirij-o. 19Yak norosoloma-ge, an-nen yosolar-e: ’Nagawan Indo wa-e. Yawuri nap-nen tepan yugwi ma ya nggwilik waring kasolar-e, inndi kat kebem angin tubu yidnak nab-e an-nen o kubu me inpil nggosolat, linggamburok ondosolat iri kwat tenak woragi wene-ge ir-e enaru nar-o. 20Nde, kat-nen idnak kiring ondoso nap Sepanus eyabi wirik pogola-ge, an-e panggosa iri me mendak worasolar-e, ob-et witli-o luk, at wiriga nap unsum-e parugu woragi nar-o’ luk yigi-o. 21Alat nde, Nagawan Indo-nen an yak norosolar-e: ’Mbiri-o. An-e wandakma enlem nin nap endam wirik kibimin-o’ luk yak nirij-o” luk yij-o.
22Paulus na wene yil mborosola, kolak woraiga-t nde, wene ereya na yosoloma-ge, it ap kwarat-nen enne ya mba mbogolat-nen yogolar-e: ”Ap yu-ge lak tak purag-o! Uruk wolmomtag-e lag-o!” luk yiga-o. 23Yogolar-e, ngasilek kundugu-net it unsum werel kagolat, o liri tenaga ligik pogolat worakmu-ge, 24san winde wari-nen yak ondosolar-e: ”Ap yu-ge san winde nenma imin mburugupndig-e, noluk-nen ap kwarat yu-ge at imin enne ngasilek yili-o luk nenaru yuwok-nen linggamburok worogolat-nen at indi ngarer-o” luk yak indij-o. 25Alat nde, it-nen at kamarogola, Paulus-nen iri me mendak woraidnak san winde nagawan yak tosolar-e: ”An-e Oroma nab-et nde, kir-e wene elem mbenarigit lag-et linggamburok nuruwokluk yili yu-ge ob-er-a?” luk yij-o. 26Nde, san winde nagawan na-ge wene iri yosola kuluruk, san winde wari eram mberarik yak tosolar-e: ”Kar-e ngge kwareyekluk yusu-o? Ap yu-ge Oroma nap-nen yusu-o” luk yij-o. 27Yak tosoloma-ge, san winde wari na Paulus eram lobok yarik-nen yak tosolar-e: ”Kar-e ndemeret Oroma nap-nen yusu, lak?” luk kin wok obosoloma-ge, at-nen yosolar-e: ”Ye. An-e Oroma nap-net yusu-o” luk yij-o. 28Yosoloma-ge, san winde wari iri-nen yosolar-e: ”An-e Oroma nap yekluk onggo kwarat pigi-o” luk yij-o. Yosoloma-ge, Paulus-nen yosolar-e: ”Nde, an perak nde ndet nibidnak pem-nen Oroma nap yusu-o” luk yij-o. 29Yosoloma-ge, at indi ngaruwokluk yiga nap na-ge ereya na-net kwiye mbiriga-o. Nde, Paulus-e Oroma nap alama-ge, san winde wari na-nen kamat ibidnak pem-e kwiye-t kagaij-o.
Paulus-nen wene mbarugwi nap inmbiri bem yidnak wene
22:30–23:11
30Nene luk kub-e, san winde wari na-nen-e: ”Yawuri nap-nen wene ebem pili na elem kwara mbenareyeg-o” perasolug-e, Paulus na o kubu me-nen weserak puruk, tepan ombo nagawan nagawan min wene mbarugwi nap pidsa min ”Ndok werer-o” yak unduruk, Paulus na imin mbarig-e, it endam mendak ibij-o.
Currently Selected:
YIDNAK YIDNAK WENE 22: inondx
Highlight
Share
Compare
Copy
Want to have your highlights saved across all your devices? Sign up or sign in
@LAI 1992, 1994
